ສະຫະພັນແມ່ຍິງຮາກຖານ ປກສ ແຂວງ ປາຖະກະຖາວັນສ້າງຕັ້ງແມ່ຍິງລາວ ຄົບຮອບ 65 ປີ


ຕອນເຊົ້າວັນທີ 17 ກໍລະກົດ 2020 ນີ້, ສະຫະພັນແມ່ຍິງຮາກຖານ ປກສ ແຂວງບໍລິຄໍາໄຊ ໄດ້ຈັດພິທິປາຖະກະຖາວັນສ້າງຕັ້ງແມ່ຍິງລາວຄົບຮອບ 65 ປີ ( 20 ກໍລະກົດ 1955 – 20 ກໍລະກົດ 2020 ) ຢູ່ທີ່ສະໂມສອນໃຫຍ່ກອງບັນຊາການ ປກສ ແຂວງ, ໂດຍເປັນກຽດເຂົ້າຮ່ວມຂອງທ່ານ ພທ ຜາຂົງ ດອກມະນີຈັນ ຮອງຫົວໜ້າກອງບັນຊາການ ປກສ ແຂວງ.


ໃນພິທີ ທ່ານ ພັນໂທ ນາງ ຈັນສີ ສຸກສໍາລານ ປະທານຮາກຖານແມ່ຍິງ ປກສ ແຂວງ ໄດ້ໃຫ້ກຽດເລົ່າຄືນມູນເຊື້ອວັນສ້າງຕັ້ງສະຫະພັນແມ່ຍິງລາວຄົບຮອບ 65 ປີ ເຊິ່ງໄດ້ຍົກໃຫ້ເຫັນປະຫວັດຄວາມເປັນມາແຫ່ງການກໍາເນີດ, ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ທ່ານໄດ້ກ່າວບາງຕອນສຳຄັນວ່າ: ນັບແຕ່ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ເປັນຕົ້ນມາ ພັກກໍ່ໄດ້ເອົາໃຈໃສ່ຢ່າງຈົດຈໍ່ໃນການປຸກລະດົມຂົນຂວາຍ, ກໍ່ສ້າງແມ່ຍິງລາວໃຫ້ມີຄວາມຕື່ນຕົວປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ຖືເອົາແມ່ຍິງເປັນພາກສ່ວນໜຶ່ງໃນກໍາລັງແຮງທີ່ສໍາຄັນຂອງພັກ, ພາຍ ໃຕ້ການນໍາພາຂອງພັກ ແລະ ໄດ້ຮັບຜົນສະທ້ອນຈາກຂະບວນການຕໍ່ສູ້ປະຕິວັດຂອງແມ່ຍິງໃນທົ່ວໂລກ ທີ່ເລັ່ງທວງໃຫ້ປະຕິບັດສິດເສລີພາບ, ຄວາມສະເໝີພາບລະຫວ່າງຍິງ-ຊາຍທາງດ້ານການເມືອງ, ເສດຖະກິດ, ວັດທະນາທໍາ-ສັງຄົມເທື່ອລະກ້າວ, ອົງການຈັດຕັ້ງແມ່ຍິງຂັ້ນຮາກຖານຈຶ່ງໄດ້ກໍາເນີດຂຶ້ນໃນວັນທີ 20 ກໍລະກົດ 1955 ໂດຍເລີ່ມຈາກການຈັດຕັ້ງໜ່ວຍແມ່ຍິງຢູ່ຊົນນະບົດ, ຢູ່ຕົວເມືອງ, ການຈັດຕັ້ງແມ່ຍິງຈຶ່ງໄດ້ເຄື່ອນໄຫວ ແລະ ເຕີບໃຫຍ່ຂະຫຍາຍຕົວນັບແຕ່ນັ້ນມາ, ນອກນັ້ນ ຍັງໄດ້ຍົກໃຫ້ເຫັນຄວາມສາມັກຄີ, ມູນເຊື້ອຮັກຊາດ, ມູນເຊື້ອຕໍ່ສູ້ອັນພິລະອາດຫານຂອງແມ່ຍີງລາວໃນແຕ່ລະໄລຍະ ທີ່ໄດ້ຄຽງບ່າຄຽງໄລ່ກັບເພດຊາຍໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ ໂດຍພາຍໃຕ້ການຊີ້ນໍາ-ນໍາພາໂດຍກົງ ແລະ ຮອບດ້ານຂອງພັກປະຊາຊົນປະຕິວັດລາວ, ທ່ານຍັງໄດ້ເນັ້ນໜັກໃຫ້ສະມາຊິກແມ່ຍິງທຸກສະຫາຍ ຈົ່ງພ້ອມກັນປົກປັກຮັກສາ ແລະ ເສີມຂະຫຍາຍຄຸນລັກ ສະນະທີ່ເປັນມູນເຊື້ອອັນດີງາມຂອງແມ່ຍິງລາວບັນດາເຜົ່າໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ.

         ໂອກາດດຽວກັນນີ້ ຍັງໄດ້ເຜີຍແຜ່ເຊື່ອມຊືມມະຕິກອງປະຊຸມໃຫຍ່ຜູ້ແທນແມ່ຍິງແຂວງບໍລິຄໍາໄຊ ຄັ້ງທີ VII, ບົດໂອ້ລົມຂອງ ທ່ານ ດຣນາງວິລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ, ພ້ອມທັງຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 03 ດີ ປະຈໍາປີ 2019 ແລະທິດທາງແຜນການປີ 2020 ຂອງຮາກຖານສະຫະພັນແມ່ຍິງ ປກສ ແຂວງ.

        ໃນພິທີ ຍັງໄດ້ມອບໃບຢັ້ງຢືນ 03 ດີ ໃຫ້ແກ່ສະຫະພັນແມ່ຍິງຮາກຖານ ປກສ ແຂວງ ແລະ 09 ໜ່ວຍແມ່ຍິງອ້ອມຂ້າງຮາກຖານ, ໃຫ້ກຽດຂຶ້ນມອບໂດຍ ທ່ານ ພັນໂທ ຜາຂົງ ດອກມະນີຈັນ.

About Bolikhamxay Journalist