ໂທລະພາບ ຟອມແຮງ ຄວ້າແຊ້ມເປຕັງ ງານກິລາທົ່ວພະແນກ ຖວທ

ເພື່ອເປັນການສ້າງຂະບວນການ ຂ່ຳນັບຮັບຕ້ອນບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ໃນວັນທີ 4 ກຸມພາ 2021 ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງບໍລິຄຳໄຊ ໄດ້ຈັດການແຂ່ງຂັນກິລາເປຕັ່ງຂຶ້ນ ຢູ່ເດີ່ນຂອງຕົນ ໃຫ້ກຽດເຂົ້າຮ່ວມໂດຍ ທ່ານ ອຸດອນ ສອນສຸລິນ ຫົວໜ້າພະແນກ ຖວທ ແຂວງບໍລິຄຳໄຊ, ມີຄະນະພະແນກ ແລະ ພະນັກງານລັດຖະກອນ ເຂົ້າຮ່ວມ.

ການແຂ່ງຂັນ ແມ່ນເປັນປະເພດທີມຊຸດປະສົມ ຊາຍ 2 ຍິງ 1 ເຊີ່ງມີ 10 ທີມ ເຂົ້າຮ່ວມແຂ່ງຂັນ.

ການແຂ່ງຂັນ ດຳເດີນໄປດ້ວຍບັນຍາກາດຟົດຟື້ນມ່ວນຊື່ນ ເຕັມໄປດ້ວຍຄວາມສາມັກຄີຮັກແພງເຊີ່ງກັນ ແລະ ກັນ, ໃນຮອບຊີງຊະນະເລີດເປັນການພົບກັນລະຫວ່າງ ທີມຖະແຫຼງຂ່າວ 1 ທີ່ເອົາຊະນະ ທີມຖະແຫຼງຂ່າວ 2 ມາໄດ້ດ້ວຍຄະແນນ 9 ຕໍ່ 7 ພົບກັບ ທີມສະຖານີວິທະຍຸ-ໂທລະພາບ ທີ່ເອົາຊະນະ ທີມທ່ອງທ່ຽວ ມາໄດ້ດ້ວຍຄະແນນ 9 ຕໍ່ 4.

ບັນຍາກາດຂອງຄູ່ຊີງຊະນະເລີດ ແມ່ນດຳເນີນໄປຢ່າງດຸເດື່ອດ, ຕ່າງຝ່າຍຕ່າງກໍ່ມີການວາງແຜນ ແລະ ແກ້ເກມກັນຢ່າງເຕັມທີ່, ແຕ່ສຸດທ້າຍ ທີມຖະແຫຼງຂ່າວ 1 ສູ້ການເຂົ້າທີ່ລະອຽດ ແລະ ການຕີທີ່ແມ່ນຍຳ ຂອງທີມສະຖານີວິທະຍຸ-ໂທລະພາບ ບໍ່ໄດ້, ເສຍໄຊໄປຢ່າງໜ້າເສຍດາຍ ດ້ວຍຄະແນນ 9 ຕໍ່ 5 ເຮັດໃຫ້ທີມສະຖານີວິທະຍຸ-ໂທລະພາບ ຍາດເອົາຂັນຊະນະເລີດ ຂອງທ່ານຫົວພະແນກ ຖວທ ແຂວງ ໄປຄອງໄດ້ສຳເລັດ, ອັນດັບທີ 2 ແມ່ນທີມຖະແຫຼງຂ່າວ 1 ແລະ ອັນດັບທີ 3 ແມ່ນທີມທ່ອງທ່ຽວ, ໃຫ້ກຽດມອບຂັນລາງວັນໃນຄັ້ງນີ້ໂດຍ ທ່ານ ອຸດອນ ສອນສຸລິນ.

About Bolikhamxay Journalist