ບໍລິຄຳໄຊເຊື່ອມຊຶມວຽກງານແນວໂຮມ ແລະ ວຽກງານມະຫາຊົນຂອງພັກໃນໄລຍະໃໝ່

ກອງປະຊຸມເຜີຍແຜ່ມະຕິວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່ ໄດ້ຈັດຂຶ້ນໃນວັນທີ 19 ສິງຫາ 2020 ທີ່ຫ້ອງປະຊຸມ ປກສ ແຂວງ ໂດຍການເປັນປະທານຂອງ ທ່ານ ວັນວິໄລ ແດນພູຫຼວງ ປະທານແນວລາວສ້າງຊາດແຂວງບໍລິຄຳໄຊ.

ມະຕິກົມການເມືອງສູນກາງພັກ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່ ສະບັບເລກທີ 108/ກມສພ, ລົງວັນທີ 30 ເມສາ 2020 ໄດ້ຍົກໃຫ້ເຫັນເຖິງສະພາບຄວາມເປັນຈິງ ຂອງວຽກງານແນວໂຮມ ແລະ ວຽກງານມະຫາຊົນຂອງພັກ ທີ່ມີພາລະບົດບາດ, ສິດ ແລະ ໜ້າທີ່ໃນການສຶກສາອົບຮົມ, ປຸກລະດົມ, ເຕົ້າໂຮມຄວາມສາມັກຄີປອງດອງບັນດາຊົນເຜົ່າ, ຊັ້ນຄົນ, ສາສະໜາ, ເພດ, ໄວ ໃຫ້ເປັນປຶກແຜ່ນແໜ້ນໜາ ພາຍໃຕ້ການນຳພາຂອງພັກ, ປະຕິບັດແນວທາງ, ນະໂຍບາຍ, ກົດໝາຍ, ເຂົ້າຮ່ວມການພັດທະນາເສດຖະກິດ-ສັງຄົມ ແລະ ການປ້ອງກັນຊາດ-ປ້ອງກັນຄວາມສະຫງົບ ຢ່າງຕັ້ງໜ້າ, ພ້ອມດຽວກັນ ຍັງເອົາໃຈໃສ່ປົກປ້ອງສິດຜົນປະໂຫຍດອັນຊອບທຳ ແລະ ຖືກກົດໝາຍ, ເສີມຂະຫຍາຍປະຊາທິປະໄຕ, ສິດເປັນເຈົ້າ ຂອງປະຊາຊົນ.

ມະຕິສະບັບນີ້ ຍັງໄດ້ຍົກໃຫ້ເຫັນເຖິງທັດສະນະພື້ນຖານ, ທິດທາງວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່, ການຊີ້ນຳຜັນຂະຫຍາຍ ແລະ ມາດຕະການຈັດຕັ້ງປະຕິບັດ.

ສຳລັບທິດທາງຕົ້ນຕໍວຽກງານແນວໂຮມ ແລະ ວຽກງານມະຫາຊົນ ມີຄື: ສືບຕໍ່ປັບປຸງນິຕິກຳ, ພາລະບົດບາດ, ຮູບການ, ວິທີການເຄື່ອນໄຫວ ແລະ ຂະຫຍາຍການຈັດຕັ້ງ ໃຫ້ເຖິງທຸກຮາກຖານ, ສືບຕໍ່ປ່ຽນແປງໃໝ່ແບບແຜນການນຳພາຂອງພັກ ຕໍ່ວຽກງານແນວໂຮມ ແລະ ວຽກງານມະຫາຊົນ, ຊຸກຍູຂະບວນການແຂ່ງຂັນຮັກຊາດ ແລະ ພັດທະນາຢ່າງແຂງແຮງ, ຈັດຕັ້ງເຄື່ອນໄຫວສ້າງຂະບວນການມະຫາຊົນ ດ້ວຍຫຼາຍຮູບຫຼາຍສີ ແລະ ແທດເໝາະກັບແຕ່ລະເປົ້າໝາຍ, ຍົກສູງບົດບາດຕິດຕາມ, ກວດກາຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ໂດຍຜ່ານຄຳຄິດຄຳເຫັນ, ຄຳສະເໜີ ຕໍ່ການຈັດຕັ້ງປະຕິບັດແນວທາງ, ລັດຖະທຳມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ, ສ້າງເງື່ອນໄຂໃນການເຄື່ອນໄຫວຕົວຈິງດ້ານງົບປະມານ ແລະ ພື້ນຖານໂຄງລ່າງ, ສົ່ງເສີມການມີສ່ວນຮ່ວມໃນການປະຕິບັດໂຄງການຕ່າງໆຂອງລັດຖະບານ, ເອົາໃຈໃສ່ປັບປຸງກົງຈັກການຈັດຕັ້້ງ, ການກໍ່ສ້າງພະນັກງານ ຕາມທິດຮັບປະກັນຄຸນນະພາບ, ກະທັດຮັດ ແລະ ສົມເຫດສົມຜົນ, ຕັ້ງໜ້າເຂົ້າຮ່ວມ ແລະ ປຸກລະດົມຂົນຂວາຍມະຫາຊົນ ໃຫ້ມີສ່ວນຮ່ວມໃນການຈັງຕັ້ງປະຕິບັດ ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ຮອບດ້ານ, ເພີ່ມທະວີການການທູດຕາມແນວທາງການຕ່າງປະເທດຂອງພັກ ໃນສະເພາະໜ້າ ແລະ ຍາວນານ.

ໃນພິທີ ຍັງໄດ້ຮັບຟັງການຜ່ານມະຕິ ກອງປະຊຸມໃຫຍ່ຜູ້ແທນສະພັນກຳມະບານແຂວງ ຄັ້ງທີ VII , ຜູ້ແທນສະຫະພັນແມ່ຍິງແຂວງ ຄັ້ງທີ VII ແລະ ກອງປະຊຸມໃຫຍ່ຜູ້ແທນຊາວໜຸ່ມແຂວງ ຄັ້ງທີ VI, ໃນກອງປະຊຸມໃຫຍ່ຂອງແຕ່ລະອົງການ ໂດຍໄດ້ເປັນເອກະສັນຮັບຮອງເອົາເນື້ອໃນສໍາຄັນ ເປັນຕົ້ນຮັບຮອງເອົາບົດລາຍງານການເມືອງຂອງຄະນະບໍລິຫານງານສະຫະພັນກຳມະບານ, ແມ່ຍິງແຂວງ ແລະ ຊາວໜຸ່ມແຂວງ ເຊິ່ງໄດ້ສະຫຼຸບຢ່າງພາວະວິໄສ, ທິດທາງແຜນການ 5 ປີຕໍ່ໜ້າ (2021-2025) ແລະ ຍັງໄດ້ພ້ອມກັນໃຊ້ສິດປະຊາທິປະໄຕຂອງຕົນ ເລືອກເອົາຄະນະບໍລິຫານງານຊຸດໃໝ່ ໃນນັ້ນສະຫະພັນກຳມະບານແຂວງແມ່ນ ສະຫາຍ ດຳລົງ ທັບລາດ ເປັນປະທານສະຫະພັນກຳມະບານແຂວງບໍລິຄໍາໄຊ ສະໄໝທີ VII, ສະຫາຍ ສີສົມພອນ ອິນທະວົງ ເປັນຮອງ, ສະຫາຍນາງ ພູເວີນ ສີຫາລາດ ເປັນຮອງ ທັງເປັນປະທານກວດກາ ແລະ ສະຫາຍນາງ ແຫວນຄຳ ເພຍແກ້ວ ເປັນຮອງປະທານກວດກາ; ສະຫະພັນແມ່ຍິງແຂວງ ສະຫາຍ ນາງ ຄໍາປິວ ສີສົມບັດ ເປັນປະທານຄະນະບໍລິຫານງານສະຫະພັນແມ່ຍິງແຂວງ ສະໄໝທີ VII, ສະຫາຍ ນາງ ຂັນທອງ ພັນທະຈັກ ເປັນຮອງປະທານ, ສະຫາຍ ນາງ ຄໍາໃບ ບໍລິວັນ ເປັນຮອງປະທານ ທັງເປັນປະທານກວດກາ ແລະ ສະຫາຍ ນາງ ວິລະພອນ ພົມມະວົງສາ ເປັນຮອງປະທານກວດກາ ແລະ ຄະນະບໍລິຫານງານຊາວໜຸ່ມແຂວງ ສະຫາຍ ທອງມະນີ ໂຄດປັນຍາ ເປັນເລຂາຄະນະບໍລິຫານງານຊາວໜຸ່ມແຂວງບໍລິຄໍາໄຊ ສະໄໝທີ VI, ສະຫາຍ ທະນູວັນ ວົງມະນີ ເປັນຮອງ, ສະຫາຍ ວັນນະສິນ ສອນວິໄລ ເປັນຮອງທັງເປັນປະທານກວດກາ, ສະຫາຍນາງ ນິດຕາ ເພັງສະຫວັດ ແລະ ສະຫາຍ ສົມພຽນ ຊ້ອນພາ ເປັນຮອງປະທານກວດກາ.

About Bolikhamxay Journalist