ບັນຍາກາດມື້ເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ຢູ່ແຂວງບໍລິຄຳໄຊ

ບັນຍາກາດການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ແຂວງບໍລິຄຳໄຊ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 21 ກຸມພາ 2021 ເຊີ່ງມວນຊົນຊາວແຂວງບໍລິຄຳໄຊ ໂດຍສະເພາະຜູ້ມີສິດເລືອກຕັ້ງ ກໍ່ໄດ້ໄປປ່ອນບັດຕາມໜ່ວຍເລືອກຕັ້ງຂອງຕົນ ເພື່ອປະຕິບັດສິດ ແລະ ໜ້າທີ່ຂອງຕົນ ໃນຖານະເປັນພົນລະເມືອງລາວ ຢ່າງເປັນຂະບວນຟົດຟື້ນ.

ຢູ່ໜ່ວຍປ່ອນບັດເລືອກຕັ້ງທີ 8 ບ້ານຫົງໄຊ-ບ້ານໂພນໄຊເໜືອ ເມືອງປາກຊັນ ແຂວງບໍລິຄຳໄຊ ເຊີ່ງໄດ້ຈັດຢູ່ເດີ່ນກິລາເປຕັ່ງຂອງແຂວງ ກໍໄດ້ມີທ່ານ ນາງ ສີໃສ ລືເດດມູນສອນ ກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ຊຸດທີ VIII ປະຈຳເຂດເລືອກຕັ້ງທີ 11 ແຂວງບໍລິຄຳໄຊ, ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ, ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງ, ມີການນຳຂອງແຂວງ, ຂອງເມືອງ ແລະ ພໍ່ແມ່ປະຊາຊົນບັນດາເຜົ່າຜູ້ມີສິດເລືອກຕັ້ງ ເຂົ້າຮ່ວມ.

ຕາມການລາຍງານຂອງຄະນະກຳມະການເລືອກຕັ້ງຂັ້ນແຂວງ ໃຫ້ຮູ້ວ່າ: ທົ່ວແຂວງບໍລິຄຳໄຊ ມີຜູ້ມີສິດປ່ອນບັດເລືອກຕັ້ງທັງໝົດ 173.010 ຄົນ, ຍິງ 83.699 ຄົນ, ມີ 201 ໜ່ວຍປ່ອນບັດເລືອກຕັ້ງ ໃນນັ້ນ ເມືອງປາກຊັນ ມີ 32 ໜ່ວຍເລືອກຕັ້ງ, ເມືອງທ່າພະບາດ 18 ໜ່ວຍເລືອກຕັ້ງ, ເມືອງປາກກະດິງ 26 ໜ່ວຍເລືອກຕັ້ງ, ເມືອງບໍລິຄັນ 43 ໜ່ວຍເລືອກຕັ້ງ, ເມືອງຄຳກີດ 40 ໜ່ວຍເລືອກຕັ້ງ, ເມືອງວຽງທອງ 25 ໜ່ວຍເລືອກຕັ້ງ, ເມືອງໄຊຈຳພອນ 8 ໜ່ວຍເລືອກຕັ້ງ, ກອງບັນຊາການ ປກຊ ແຂວງ 8 ໜ່ວຍເລືອກຕັ້ງ ແລະ ກອງບັນຊາການ ປສກ ແຂວງ 1 ໜ່ວຍເລືອກຕັ້ງ.

ສະເພາະເຂດເລືອກຕັ້ງທີ 11 ແຂວງບໍລິຄຳໄຊ ມີຜູ້ຮັບສະໝັກເລືອກຕັ້ງເປັນສະມາຊິກສະພາແຫ່ງຊາດ 10 ທ່ານ, ຍິງ 2 ທ່ານ, ເລືອກເອົາ 7 ທ່ານ ແລະ ມີຜູ້ຮັບສະໝັກເລືອກຕັ້ງເປັນສະມາຊິກສະພາປະຊາຊົນແຂວງ ໃນເຂດເລືອກຕັ້ງທັງໝົດ 39 ທ່ານ ໃນນັ້ນ ເຂດເລືອກຕັ້ງເມືອງປາກຊັນ ຜູ້ສະໝັກ 6 ທ່ານ, ຍິງ 2 ທ່ານ ເລືອກເອົາ 4 ທ່ານ, ເມືອງທ່າພະບາດ 5 ທ່ານ, ຍິງ 1 ທ່ານ ເລືອກເອົາ 3 ທ່ານ, ເມືອງບໍລິຄັນ 6 ທ່ານ, ຍິງ 2 ທ່ານ ເລືອກເອົາ 4 ທ່ານ, ເມືອງປາກກະດິງ 6 ທ່ານ, ຍິງ 1 ທ່ານ ເລືອກເອົາ 4 ທ່ານ, ເມືອງຄໍາເກີດ 6 ທ່ານ, ຍິງ 3 ທ່ານ ເລືອກເອົາ 4 ທ່ານ, ເມືອງວຽງທອງ 5 ທ່ານ, ຍິງ 2 ທ່ານ ເລືອກເອົາ 3 ທ່ານ ແລະ ເມືອງໄຊຈໍາພອນ 5 ທ່ານ, ຍິງ 1 ທ່ານ ເລືອກເອົາ 3 ທ່ານ.

About Bolikhamxay Journalist