ທ່ານຮອງນາຍົກລັດຖະມົນຕີ ຢ້ຽມຢາມ ແລະ ຊີ້ນຳວຽກ ຢູ່ແຂວງບໍລິຄຳໄຊ

ໃນວັນທີ 25 ພະຈິກ 2020 ຢູ່ຫ້ອງວ່າການແຂວງ ທ່ານ ວັນວິໄລ ແດນພູຫຼວງ ຮອງເລຂາພັກແຂວງ ພ້ອມດ້ວຍຄະນະ ໄດ້ເປັນກຽດຕ້ອນຮັບ ທ່ານ ສົມດີ ດວງດີ ຮອງນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີກະຊວງການເງິນ ຫົວໜ້າຄະນະຊີ້ນຳການສຳຫຼວດກະສິກຳທົ່ວປະເທດ ຄັ້ງທີ 3 ພ້ອມດ້ວຍຄະນະ ເນື່ອງໃນໂອກາດທີ່ໄດ້ລົງມາຢ້ຽມຢາມ ແລະ ເຮັດວຽກຢູ່ແຂວງບໍລິຄຳໄຊ.

ໃນພິທີ ກໍ່ໄດ້ຮັບຟັງລາຍງານການຈັດຕັ້ງປະຕິບັດແຜນງົບປະມານແຫ່ງລັດ ປີ 2020 ວ່າ: ໃນໄລຍະ 10 ເດືອນຜ່ານມາ ແຂວງບໍລິຄຳໄຊ ສາມາດເກັບລາຍຮັບໄດ້ 437,23 ຕື້ກີບ ເທົ່າກັບ 73,46% ໃນນັ້ນ ລາຍຮັບພູດສູນກາງ 328,79 ຕື້ກີບ ເທົ່າກັບ 74,85% ພູດທ້ອງຖິ່ນ 108,44 ຕື້ກີບ ເທົ່າກັບ 69,55%, ໂດຍອີງໃສ່ສະພາບເງື່ອນໄຂຄວາມເປັນຈິງໃນປະຈຸບັນ ທາງດ້ານເສດຖະກິດ ແລະ ການແຜ່ລະບາດຂອງພະຍາດໂຄວິດ 19, ເຊິ່ງໄດ້ສົ່ງຜົນກະທົບຕໍ່ການຈັດເກັບລາຍຮັບເຂົ້າງົບປະມານໂດຍກົງ, ແຕ່ຂະແໜງການເງິນ ກໍ່ໄດ້ເປັນເຈົ້າການໃນການຄຸ້ມຄອງຈັດເກັບລາຍຮັບເຂົ້າງົບປະມານຢ່າງຮັດກຸມ.

ສຳລັບການຈັດຕັ້ງປະຕິບັດການສຳຫຼວດສະຖິຕິກະສິກຳທົ່ວປະເທດ ຄັ້ງທີ 3 ປີ 2020 ໄດ້ເລີ່ມຈັດຕັ້ງປະຕິບັດພາກສະໜາມໃນວັນທີ 15 ຕຸລາ 2020 ຢູ່ 7 ຕົວເມືອງ 99 ບ້ານ ແລະ ໄດ້ແບ່ງອອກເປັນ 12 ທີມ ມີນັກກວດກາ 12 ທ່ານ ນັກເດີນສຳຫຼວດ 24 ທ່ານ ເຊິ່ງມາຈາກສູນສະຖິຕິປະຈຳແຂວງ ແລະ ເມືອງ, ພະແນກກະສິກຳແຂວງ, ເມືອງ ແລະ ພາກສ່ວນອື່ນຈຳນວນໜຶ່ງ ຮອດປະຈຸບັນ ໄດ້ສຳເລັດແລ້ວ 53 ບ້ານ ເທົ່າກັບ 56% ຂອງບ້ານຕົວແທນທັງໝົດ ສ່ວນບ້ານທີ່ຍັງບໍ່ທັນສຳເລັດ ມີ 59 ບ້ານ ທີ່ຕ້ອງໄດ້ສືບຕໍ່ປະຕິບັດໃຫ້ສຳເລັດກ່ອນວັນທີ 25 ທັນວາ 2020 ທົ່ວແຂວງ.

ໃນຕອນທ້າຍ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ກໍ່ໄດ້ໂອ້ລົມພະນັກງານຫຼັກແຫຼ່ງຂອງແຂວງ, ໂດຍສະເພາະພະແນກການເງິນແຂວງ ສຸມໃສ່ໃນການຈັດເກັບລາຍຮັບຂອງແຂວງ ປີ 2020 ໃຫ້ໄດ້ຕາມເປົ້າໝາຍທີ່ວາງໄວ້ ແລະ ວາງແຜນປີ 2021 ໃຫ້ທັນເວລາ ເພື່ອຮັບປະກັນໃນການຈັດເກັບລາຍຮັບໃນປີຕໍ່ໜ້າ.

ພ້ອມດຽວກັນນັ້ນ ທ່ານກໍ່ຍັງເນັ້ນໃຫ້ສຸມໃສ່ວຽກງານທີ່ສຳຄັນຫຼາຍດ້ານ ໂດຍສະເພາະແມ່ນວຽກງານການສຳຫຼວດເສດຖະກິດ ແລະ ກະສິກຳ ໃຫ້ທັນຕາມກຳນົດເວລາ ແລະ ເປັນຂໍ້ມູນທີ່ຖືກຕ້ອງຊັດເຈນ ມີຄຸນນະພາບ ເພື່ອເຮັດໃຫ້ຮູ້ເຖິງສະພາບຄວາມເປັນຈິງຂອງເສດຖະກິດຂອງແຂວງ ກໍ່ຄືຂອງປະເທດ ເພື່ອເປັນພື້ນຖານໃນການຄົ້ນຄວ້າວາງນະໂຍບາຍໃນການພັດທະນາເສດຖະກິດສັງຄົມໃນຕໍ່ໜ້າ ໃຫ້ຖືກຕ້ອງຕາມຄວາມຕ້ອງການຕົວຈິງໃນການພັດທະນາ.

About Bolikhamxay Journalist