ກອງປະຊຸມໃຫຍ່ຄັ້ງທີ Vຂອງຄະນະພັກຮາກຖານພະແນກ ຍທຂ ແຂວງ

   ກອງປະຊຸມໃຫຍ່ຄັ້ງທີ V ຂອງຄະນະພັກຮາກຖານ ພະແນກໂຍທາທິການ ແລະ ຂົນສົ່ງແຂວງບໍລິຄຳໄຊ ໄດ້ໄຂຂຶ້ນໃນ ວັນທີ 19 ມິຖຸນາ 2020 ຢູ່ສະໂມສອນໃຫຍ່ຂອງແຂວງ ພາຍໃຕ້ການເປັນປະທານຂອງ ສະຫາຍ ທອນ ຈັນທະມີນາວົງ ຮອງເລຂາຄະນະພັກຮາກຖານພະແນກ ຍທຂ ແຂວງ, ໃຫ້ກຽດເຂົ້າຮ່ວມຂອງ ສະຫາຍ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງບໍລິຄຳໄຊ, ມີສະມາຊິກພັກສົມບູນເຂົ້າຮ່ວມທັງໝົດ 113 ສະຫາຍ, ຍິງ 30 ສະຫາຍ ແລະ ແຂກຖືກເຊີນຈາກຄະນະພັກຮາກຖານອ້ອມຂ້າງແຂວງ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການຕີລາຄາຜົນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IV ຂອງຄະນະພັກຮາກຖານພະແນກ ຍທຂ ແຂວງ ຈາກສະຫາຍ ທອນ ຈັນທະມີນາວົງ ໂດຍໄດ້ຍົກໃຫ້ເຫັນວ່າ ໄລຍະຜ່ານມາທາງຄະນະພັກຮາກຖານ ໄດ້ຖືເອົາວຽກງານການເມືອງ-ແນວຄິດເປັນກົກ, ເອົາໃຈໃສ່ສຶກສາອົບຮົມເຊື່ອມຊືມບັນດາແນວທາງນະໂຍບາຍຂອງພັກ ໃຫ້ແກ່ສະມະຊິກພັກ ແລະ ພະນັກງານ, ໄດ້ກໍ່ສ້າງ ແລະ ປັບປຸງພັກຕາມ 5 ຫຼັກການ 3 ທິດນໍາ ໂດຍຢຶດໝັ້ນລັດທິມາກ-ເລນິນ, ແນວຄິດໄກສອນພົມວິຫານ, ປະຕິບັດຕາມຫຼັກການ ລວມສູນປະຊາທິປະໄຕຢ່າງເຂັ້ມງວດ ສາມາດຍາດໄດ້ຜົນສຳເລັດໃນຫຼາຍດ້ານ ເປັນຕົ້ນແມ່ນ ການປົກປັກຮັກສາເສັ້ນທາງທີ່ມີແລ້ວ ແລະ ກໍ່ສ້າງໃຫມ່ ບັນດາເສັ້ນທາງໄປເຖິງຊາຍແດນ ແລະ ເຂດຈຸດສຸມ ໃຫ້ຢູ່ໃນສະພາບຄົມມະນາຄົມໄດ້, ຮັບປະກັນການຈະລາຈອນບໍ່ໃຫ້ຖືກຕ້ດຂາດ.

ສ້າງຜັງເມືອງ ແລະ ນ້ຳປະປາ ຢ່າງເປັນລະບົບ, ກໍ່ສ້າງກັນເຈື່ອນ ຈຸດທີ່ມີການເຊາະເຈື່ອນຮ້າຍແຮງຕາມແຄມນໍ້າຂອງ ແລະ ແມ່ນໍ້າສາຂາ, ໃນໄລຍະ 5 ປີຜ່ານມາ ຂະແໜງ ຍທຂ ແຂວງ ໄດ້ສະເໜີໂຄງການກໍ່ສ້າງ, ສ້ອມແປງພື້ນຖານໂຄງລ່າງ ເພື່ອໃຫ້ສະພາຮັບຮອງເຂົ້າສາລະບານງົບປະມານແຜນລາຍຈ່າຍລົງທຶນຂອງລັດ ມີຈໍານວນທັງໝົດ 301 ໂຄງການ, ມີມູນຄ່າທັງໝົດ 3.947,42 ຕື້ກ່ວາກີບ, ສະພາຮັບຮອງແຜນລາຍຈ່າຍອະນຸມັດ 72 ໂຄງການ ມີມູນຄ່າທັງໝົດ 2.549,90 ຕືກ່ວາກີບ ຄິດເປັນເປີເຊັນທຽບໃສ່ໂຄງການທີ່ສະເໜີເຂົ້າແຜນ ເທົ່າກັບ 23,92% ແລະ ຄິດເປັນເປີເຊັນຂອງມູນຄ່າເງິນ ທີ່ສະເໜີເຂົ້າແຜນງົບປະມານຂໍອະນຸມັດເທົ່າກັບ 64,59%, ການອອກທະບຽນຖາວອນ, ໃບຂັບຂີ່ຖາວອນ ແມ່ນໃຊ້ລະບົບອອນລາຍທັນສະໄຫມ ເຮັດໄດ້ໄວຂຶ້ນກ່ວາເກົ່າ ໃນນັ້ນ ລົດຈັກ ແລະ ລົດ 3 ລໍ້ ປະຕິບັດຕົວຈິງໄດ້ 8.414 ຄັນ, ລົດ 4 ລໍ້ຂຶ້ນໄປ ປະຕິບັດຕົວຈິງໄດ້ 2.779 ຄັນ, ກວດເຕັກນິກ ລົດ 4 ລໍ້ ຂຶ້ນໄປ ປະຕິບັດຕົວຈິງໄດ້ 10.742 ຄັນ, ສອບເສັງໃບຂັບຂີ່ ທຸກປະເພດ ປະຕິບັດຕົວຈິງໄດ້ 7.120 ຄົນ, ອອກເອກະສານໜັງສືຜ່ານແດນລົດ (ຕຣັງຊິດ) ປະຕິບັດຕົວຈິງໄດ້ 3.531 ຄັນ, ໃນໄລຍະຜ່ານມາ ທັງ 9 ໜ່ວຍພັກສາມາດຈັດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ກວມເອົາປະມານ 88% ໃນນັ້ນ ສະມາຊິກພັກປະເພດ ແຂງ 379 ສະຫາຍ, ຍີງ 91 ສະຫາຍ ແລະ ປະເພດກາງ 64 ສະຫາຍ, ຍີງ 19 ສະຫາຍ.

ບັນດາຜູ້ແທນ ຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຮາກຖານຊຸດໃໝ່ ແລະ ກອງປະຊຸມຄັ້ງປະຖົມມະລືກ ໄດ້ເປັນເອກະສັນເລືອກເອົາ ສະຫາຍ ວິໄຊ ພູມີ ເປັນເລຂາຄະນະພັກຮາກຖານ, ສະຫາຍ ທອນ ຈັນທະມີນາວົງ ເປັນຮອງເລຂາຄະນະພັກຮາກຖານ, ສະຫາຍ ທອງລິດ ຟອງສີນວນ ເປັນປະທານກວດກາ, ສະຫາຍ ແກ້ວ ບົວທອງ ເປັນຮອງປະທານກວດກາ, ສະຫາຍ ວິໄລຄອນ ພີມມະສອນ, ສະຫາຍ ທະນູສອນ ນວນຜາລີ ແລະ ສະຫາຍ ໄຂທອງ ຄໍາສູນທອນ ເປັນຄະນະພັກຮາກຖານ. ພ້ອມກັນນັ້ນຍັງໄດ້ເລືອກຕັ້ງເອົາຜູ້ແທນສົມບູນ 4 ສະຫາຍ, ຍິງ 0 ສະຫາຍ ແລະ ສໍາຮອງ 1 ສະຫາຍ, ຍິງ 0 ສະຫາຍ ໄປຮ່ວມກອງປະຊຸມໃຫຍ່ອົງຄະນະພັກແຂວງບໍລິຄໍາໄຊ ຄັ້ງທີ VII.

About admins11