ຕອນເຊົ້າວັນທີ 21 ພຶດສະພາ 2020 ນີ້ ຢູ່ກອງບັນຊາການ ປກສ ເມືອງປາກຊັນ ແຂວງບໍລິຄຳໄຊ ໄດ້ເປີດກອງປະຊຸມລາຍງານຜົນສຳເລັດ ກອງປະຊຸມໃຫຍ່ ຜູ້ແທນອົງຄະນະພັກກອງບັນຊາການ ປກສ ແຂວງ ຄັ້ງທີ 3 ຢູ່ທີ່ຫ້ອງປະຊຸມຂອງກອງບັນຊາການ ປກສ ເມືອງປາກຊັນ, ໂດຍໃຫ້ກຽດເຂົ້າຮ່ວມ ເປັນປະທານ ຂອງທ່ານ ພັນໂທ ກົງຈັນ ໄຊປັນຍາ ເລຂາຄະນະພັກ ຫົວໜ້າກອງບັນຊາການ ປກສ ແຂວງລິຄຳໄຊ ມີຄະນະພັກກອງບັນຊາການ ປກສ ເມືອງປາກຊັນ ພ້ອມພະນັກງານສຳມະຊິກພັກ, ພະນັກງານນັກ-ຮົບທົ່ວກອງບັນຊາການ ປກສ ເມືອງ ເຂົ້າຮ່ວມ.

 

       ກອງປະຊຸມ ຄະນະພັກກອງບັນຊາການ ປກສ ແຂວງ ໄດ້ຜັດປ່ຽນກັນຂຶ້ນຜ່ານບັນດາເອກະສານສຳຄັນຕ່າງໆເປັນຕົ້ນແມ່ນ: ຂໍ້ຫ້າມຕໍ່ນາຍ ແລະ ພົນຕຳຫຼວດ, ຂໍ້ຕົກລົງວ່າດ້ວຍແບບແຜນ ວິທີເຮັດວຽກ ຂອງກະຊວງປ້ອງກັນຄວາມສະຫງົບ ທັງນີ້ກໍ່ເພື່ອແນ່ໃສ່ໃຫ້ພະນັກງານ-ນັກຮົບທົ່ວກອງບັນຊາການມີຫຼັກການ, ລະບຽບການກ່ຽວກັບແບບແຜນວິທີເຮັດວຽກ ຂອງກະຊວງປ້ອງກັນຄວາມສະຫງົບ ເພື່ອຄຸ້ມຄອງ, ຕິດຕາມ, ກວດກາ, ການປະຕິບັດໜ້າທີ່ວຽກງານວິຊາສະເພາະຂອງຫ້ອງວ່າການກະຊວງ, ກົມໃຫຍ່, ກົມ, ກອງບັນຊາການ, ວິທະຍາຄານ ອ້ອມຂ້າງກະຊວງ ແລະ ກອງບັນຊາການປ້ອງກັນຄວາມສະຫງົບ ຂັ້ນແຂວງ ແນໃສ່ຮັບປະກັນການປະຕິບັດວຽກງານວິຊາສະເພາະໃຫ້ເຂົ້າສູ້ລະບົບ ແລະ ມີແບບແຜນວິທີເຮັດວຽກທີ່ມີວິທະຍາສາດ, ເຮັດໃຫ້ການປະຕິບັດໜ້າທີ່ວຽກງານວ່ອງໄວທັນກັບສະພາບ ໃຫ້ນັບມື້ກ້າວໜ້າທັນສະໄໝ, ມີລະບຽບວິໄນເຂັ້ມງວດ ແລະ ເຮັດສຳເລັດໜ້າທີ່ຕາມການມອບໝາຍ.

     ຈາກນັ້ນ ທ່ານ ພັນໂທ ກົງຈັນໄຊປັນຍາ ໄດ້ຜ່ານບົດລາຍງານຜົນສຳເລັດກອງປະຊຸມໃຫຍ່ ຄັ້ງທີ 3 ຂອງອົງຄະນະພັກກອງບັນຊາການ ປກສ ແຂວງ ເຊິ່ງກອງປະຊຸມໄດ້ໄຂຂຶ້ນແຕ່ວັນທີ 10 ຫາ 11 ມີນາ 2020 ດ້ວຍຜົນສຳເລັດອັນສະຫງ່າງາມ, ມີຜູ້ແທນສົມບູນເຂົ້າຮ່ວມກອງປະຊຸມ 81 ສະຫາຍ, ຍິງ 03 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດທົ່ວກຳລັງປ້ອງກັນຄວາມສະຫງົບແຂວງບໍລິຄຳໄຊ ຜົນສໍາເລັດອັນໃຫຍ່ຫຼວງຂອງກອງປະຊຸມໃນຄັ້ງນີ້ ແມ່ນໝາກຜົນລວມຍອດແຫ່ງສະຕິປັນຍາເປັນໝູ່ຄະນະ, ຄວາມສາມັກຄີພ້ອມພຽງ, ພາກພຽນພະຍາຍາມບຸກບືນ, ສູ້ຊົນໃນທົ່ວພັກ-ທົ່ວກຳລັງປ້ອງກັນຄວາມສະຫງົບແຂວງບໍລິຄຳໄຊ ທີ່ໄດ້ເຊີດຊູນໍ້າໃຈຮັກຊາດ , ເປັນເຈົ້າຕົນເອງ, ປະຕິບັດສອງໜ້າທີ່ຍຸດທະສາດ ແລະ ພັດທະນາກົມກອງ ຢ່າງບໍ່ຮູ້ອິດຮູ້ເມື່ອຍຕະຫຼອດໄລຍະ 5 ປີຜ່ານມາ, ຄຽງຄູ່ກັບຜົນສຳເລັດອັນພົ້ນເດັ່ນ ແລະ ເປັນພື້ນຖານດັ່ງກ່າວນັ້ນ ກອງປະຊຸມຍັງໄດຍົກໃຫ້ເຫັນ ດ້ານອ່ອນ-ຂໍ້ຄົງຄ້າງ ທີ່ຈະຕ້ອງປັບປຸງແກ້ໄຂໃຫ້ດີຂື້ນກວ່າເກົ່າ ແລະ ມີໃບໜ້າໃໝ່.

          ທ່ານປະທານ ຍັງໄດ້ເນັ້ນໃຫ້ພະນັກງານຂັ້ນນຳພາ-ບັນຊາ ແລະ ພະນັກງານ-ນັກຮົບ ທົ່ວກອງບັນຊາການ ປກສ ເມືອງປາກຊັນ ຈົ່ງເພີ່ມທະວີເອົາໃຈໃສ່ແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນໃຫ້ນັບມື້ຫຼຸດໜ້ອຍຖອຍລົງເທື່ອລະກ້າວ ແລະ ສຶກສາອົບຮົມການເມືອງແນວໃຫ້ແກ່ພະນັກງານສຳມະຊິກພັກ ແລະ ມະຫາຊົນ ໃຫ້ມີຄຸນທາດການເມືອງໜັກເໜັ້ນ ເພື່ອເຮັດແຂວງບໍລິຄຳໄຊ ມີຄວາມສະຫງົບ ມີຄວາມເປັນລະບຽບຮຽບຮ້ອຍດີຂຶ້ນເລື້ອຍໆ.