ໃນວັນທີ 21 ພຶດສະພາ 2020 ໄດ້ຈັດກອງປະຊຸມປະຊາສໍາພັນອອກໃບຕາດີນແບບເປັນລະບົບຢູ່ບ້ານນາດີ, ເມືອງວຽງທອງ, ແຂວງບໍລິຄໍາໄຊ ໂດຍເປັນກຽດເຂົ້າຮ່ວມເປີດຂອງ ທ່ານ ອາລຸນສັກ ປະທໍາມະວົງ ຮອງເຈົ້າເມືອງວຽງທອງ, ມີຮອງຫົວໜ້າຫ້ອງການ, ພະນັກງານທີ່ກ່ຽວຂ້ອງ, ແຂກຖືກເຊີນ ແລະ ການຈັດຕັ້ງບ້ານ ຕະຫຼອດຮອດພໍ່-ແມ່ປະຊາຊົນພາຍໃນບ້ານ ເຂົ້າຮ່ວມ.

 

   ທ່ານ ພູທອນ ຈິນດາວົງ  ຮອງຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ ໄດ້ອະທິບາຍກ່ຽວກັບບັນດາມາດຕາຂອງກົດໝາຍ ວ່າດ້ວຍທີ່ດິນ ເພື່ອເຮັດໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ.

    ຈາກນັ້ນ ທ່ານ ໄມມູນ ຄໍາບຸນວົງ ຮອງຫົວໜ້າໜ່ວຍງານທີ່ດິນ ໄດ້ຜ່ານຂັ້ນຕອນ ແລະ ວິທີການອອກໃບຕາດິນເປັນລະບົບໃຫ້ປະຊາຊົນໄດ້ຮູ້ ເປັນຕົ້ນແມ່ນການປັກຫຼັກໝາຍ, ການຈົ່ງທາງເຂົ້າ-ອອກ, ການຂຶ້ນບັນຊີລາຍຊື່ຂອງຜູ້ຄອບຄອງທີ່ດິນ. ພ້ອມນີ້ຜູ້ຕາງໜ້າຫ້ອງການທີ່ກ່ຽວຂ້ອງໄດ້ຂຶ້ນອະທິບາຍຊີ້ແຈງກ່ຽວກັບຄວາມສໍາຄັນຂອງດິນ, ການນໍາໃຊ້ທີ່ດິນຢູ່ເຂດສະຫງວນ, ຫວງຫ້າມ ແລະ ດິນກະສິກໍາ.

     ຈາກນັ້ນ ບັນດາຜູ້ເຂົ້າຮ່ວມໄດ້ຜັດປ່ຽນກັນປະກອບຄໍາຄິດ-ຄໍາເຫັນຕໍ່ການອອກໃບຕາດິນເພື່ອໃຫ້ເຂົ້າໃຈ ແລະ ນໍາໄປຈັດຕັ້ງປະຕິບັດໃຫ້ໄດ້ຮັບຜົນດີ.   

    ຕອນທ້າຍ ທ່ານ ອາລຸນສັກ ປະທໍາມະວົງ ຮອງເຈົ້າເມືອງ ໄດ້ໃຫ້ກຽດໂອ້ລົມຕໍ່ພໍ່ແມ່ປະຊາຊົນ ໃຫ້ມີສ່ວນຮ່ວມກັບພະນັກງານທີ່ດິນ ໃຫ້ຖືເປັນວຽກສໍາຄັນ ແລະ ເປັນຂອງໝົດທຸກຄົນ ເພື່ອເຮັດໃຫ້ການອອກໃບຕາດິນຄັ້ງນີ້ສໍາເລັດຢ່າງຈົບງາມ.