ໃນວັນທີ 18 ພຶດສະພາ2020 ຢູ່ບ້ານ ນໍ້າກູ້, ເມືອງວຽງທອງ, ແຂວງ ບໍລິຄໍາໄຊ ໄດ້ຈັດພິທີມອບ-ຮັບ ເປີດການນໍາໃຊ້ກະແສໄຟຟ້າ ໂດຍເປັນກຽດເຂົ້າຮ່ວມຂອງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງ ບໍລິຄໍາໄຊ, ມີທ່ານເຈົ້າເມືອງວຽງທອງ, ການນໍາຂັ້ນແຂວງ-ຂັ້ນເມືອງ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດພໍ່ແມ່ປະຊາຊົນພາຍໃນບ້ານ ເຂົ້າຮ່ວມ.

    ໃນພິທີ ທ່ານ ຊຽງເພັດ ອິນທໍາມະວົງ ຜູ້ອໍາອວຍການ ບໍລິສັດວັນດີການໄຟຟ້າ ຈໍາກັດ ໄດ້ຂຶ້ນຜ່ານບົດລາຍງານການຈັດຕັ້ງປະຕິບັດໂຄງການກໍ່ສ້າງຕາຂ່າຍໄຟຟ້າ ເຂົ້າບ້ານນໍ້າກູ້ໄລຍະຜ່ານມາ ໂດຍເລີ່ມຈັດຕັ້ງປະຕິບັດແຕ່ເດືອນ ກຸມພາ 2020 ເປັນຕົ້ນມາໄດ້ສໍາເລັດ 100%. ໂຄງການກໍ່ສ້າງຕາຂ່າຍໄຟຟ້າ 22 ກິໂລໂວ່ນ, ຍາວ 13 ກິໂລແມັດ, ຕິດຕັ້ງຕາຂ່າຍ 0,4 ກິໂລໂວນ, ຍາວ 1,15 ກິໂລແມັດ, ຕິດຕັ້ງໝໍ້ແປງ 50 ກິໂລໂວ່ນອໍາແປ, ພ້ອມທັງດຶງສາຍໄຟເຂົ້າເຮືອນ, ຕິດຕັ້ງດອກໄຟ, ກົງເຕີ, ປັກສຽບ ສໍາເລັດ  50 ຫຼັງຄາເຮືອນ, ຍັງເຫຼືອ 8 ຫຼັງຄາເຮືອນ, ຕິດຕັ້ງໄຟເຂົ້າໂຮງຮຽນ ລວມມູນຄ່າການກໍ່ສ້າງທັງໝົດ 8,271,771,007 ກີບ.

   ບ້ານນໍ້າກູ້ ເປັນບ້ານທີ່ໄດ້ເປີດນໍາໃຊ້ກະແສໄຟຟ້າບ້ານສຸດທ້າຍຂອງເມືອງ, ໃນພິທີໄດ້ມີການເຊັນມອບ-ຮັບລະຫວ່າງ ທ່ານ ຊຽງເພັດ ອິນທໍາມະວົງ ຜູ້ອໍານວຍການບໍລິສັດວັນດີການໄຟຟ້າ ຈໍາກັດ ຜູ້ຮັບເໝົາກໍ່ສ້າງ, ເຊັນຮັບໂດຍ ທ່ານ ມະນີວັນ ໄຊຍະເພັດ ຫົວໜ້າພະແນກພະລັງງານ ແລະ ບໍແຮ່ ແຂວງບໍລິຄາໄຊ ເຈົ້າຂອງໂຄງການ ໂດຍຊ້ອງໜ້າທ່ານເຈົ້າແຂວງ, ເຈົ້າເມືອງ ແລະ ບັນດພະແນກການ ພໍ່ ແມ່ປະຊາຊົນເປັນສັກຂີພິຍານ.

      ໃນໂອກາດທີ່ ທ່ານ ເຈົ້າແຂວງລົງມານີ້ ໄດ້ນໍາເອົາເຄື່ອງນຸ່ງຫົ່ມ ແລະ ອຸປະກອນການຮຽນ-ການສອນ ຈໍານວນໜຶ່ງມາມອບໃຫ້ພໍ່ແມ່ປະຊາຊົນແລະ ນໍາທີມງານແພດຈາກໂຮງໝໍແຂວງ, ເມືອງມາບໍລິການກວດສຸຂະພາບຟຣີ ໃຫ້ພໍ່ແມ່ປະຊາຊົນພາຍໃນບ້ານນ້ຳກູ້.