ວັນທີ 20 ພຶດສະພາ 2020 ນີ້ຢູ່ທີ່ຫ້ອງປະຊຸມຊັ້ນ III  ຫ້ອງວ່າການເມືອງຄຳເກີດ ແຂວງບໍລິຄຳໄຊ ໄດ້ຈັດກອງປະຊຸມເຊື່ອມຊືມມະຕິຂອງກົມການເມືອງສູນກາງພັກ ແລະ ຄຳແນະນຳຂອງຄະນະປະຈຳສູນກາງແນວລາວສ້າງຊາດ ພາຍໃຕ້ການເປັນປະທານຂອງທ່ານ ສອນແກ້ວ ກາງປາວວື່ ຮອງປະທານ ແນວລາວສ້າງຊາດແຂວງບໍລິຄຳໄຊ, ໃຫ້ກຽດເຂົ້າຮ່ວມໂດຍ ທ່ານ ວິໄລ ສີສະມຸດ ຮອງເລຂາພັກເມືອງ, ປະທານກວດກາພັກ-ລັດເມືອງຄຳເກີດ, ມີບັນດາຫົວໜ້າຫ້ອງການ-ຄະນະຫ້ອງການ ແລະ ຕົວແທນສາສະໜາພາຍໃນເມືອງຄຳເກີດ  ເຂົ້າຮ່ວມ.

ກອງປະຊຸມ ໄດ້ເຊື່ອມຊືມເອກະສານຂອງກົມການເມືອງສູນກາງພັກ ສະບັບເລກທີ 108/ກມສພ, ລົງວັນທີ 30 ເມສາ 2020 ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກໃນໄລຍະໃໝ່ ແລະ ຄຳແນະນຳຂອງຄະນະປະຈຳສູນກາງແນວລາວສ້າງຊາດ ສະບັບເລກທີ 047/ຄປຈ, ລົງວັນທີ 27 ມີນາ 2020 ກ່ຽວກັບການສະຫຼອງວັນບຸນຕ່າງໆ ຈາກ ທ່ານ ສອນແກ້ວ ກາງປາວວື່ ໂດຍທ່ານໄດ້ເວົ້າເຖີງການຈັດງານບຸນຕ່າງໆຂອງເຜົ່າ ການເຕົ້າໂຮມຄວາມສາມັກຄີ, ການປົກປັກຮັກສາ ອະນຸລັກຮີດຄອງປະເພນີອັນດີງາມຂອງຊາດ ໃຫ້ຢູ່ຄູ່ຄົນລາວຕະຫລອດໄປ, ພ້ອມນັ້ນ ທ່ານປະທານ ຍັງໄດ້ມີຄຳເຫັນຕໍ່ກັບບັນດາແນວໂຮມຂັ້ນເມືອງ-ຂັ້ນບ້ານ ແລະ ຕົວແທນສາສະໜາ, ຄະນະກຳມະການ ທີ່ເຂົ້າຮ່ວມກອງປະຊຸມ ຈົ່ງປະຕິບັດໜ້າທີ່ທີ່ສຳຄັນຕາມພາລະບົດບາດ, ນຳເອົາບົດຮຽນໃໝ່ໆໃນກອງປະຊຸມ ກໍ່ຄືມະຕິ 108/ກມສພ ຂອງກົມການເມືອງສູນກາງພັກໄປເຜີຍແຜ່ໃຫ້ບັນດາບ້ານໄດ້ຮັບຮູ້ ເຂົ້າໃຈ ແລະ ພ້ອມກັນຈັດຕັ້ງປະຕິບັດໃຫ້ສຳເລັດ ດ້ວຍຄຸນນະພາບສູງ.