ໃນວັນທີ 19 ພຶດສະພາ 2020 ຢູ່ໂຮງຮຽນ ປະຖົມ ບ້ານ ໂພນເມືອງ ແລະ ບ້ານ ວັງແປ້ນ, ເມືອງວຽງທອງ, ແຂວງບໍລິຄໍາໄຊ ໄດ້ຈັດພິທີມອບ-ຮັບໂຮງຮຽນຫຼັງໃໝ່ ພາຍຫຼັງກໍ່ສ້າງສໍາເລັດ ລະຫວ່າງ ບໍລິສັດສົມໄຊ ພັດທະນາ ກໍ່ສ້າງຈໍາກັດຜູ້ດຽວ(ຜູ້ຮັບເໝົາ) ແລະ ຫ້ອງການສຶກສາທິການ ແລະ ກິລາເມືອງ (ເຈົ້າຂອງໂຄງການ) ໂດຍເປັນກຽດເຂົ້າຮ່ວມຂອງ ທ່ານ ອາລຸນສັກ ປະທໍາມະວົງ, ຮອງເຈົ້າເມືອງ, ປະທານຊີ້ນໍາການປະຕິບັດກິດຈະກໍາແຜນງານ ລາວ/030 ຂັ້ນເມືອງ, ມີຄະນະກໍາມະການ, ພະແນກການທີ່ກ່ຽວຂ້ອງ, ຫົວໜ້າບໍລິສັດ, ພະນັກງານຕິດຕາມປະຈໍາພາກສະໜາມ, ຄູ-ອາຈານ, ນາຍບ້ານ ແລະ ພໍ່ແມ່ປະຊາຊົນພາຍໃນບ້ານ ເຂົ້າຮ່ວມ.

ທ່ານ ກົງໃຈ ແສງພະຈັນ ຕາງໜ້າ ຜູ້ອໍານວຍການບໍລິສັດ ໄດ້ຜ່ານບົດລາຍງານການກໍ່ສ້າງໂຮງຮຽນຢູ່ບ້ານ ໂພນເມືອງ ເຊີ່ງໄດ້ເລີ່ມຈັດຕັ້ງປະຕິບັດຕົວຈິງ ແຕ່ວັນທີ 5 ກັນຍາ 2019 ຫາ ວັນທີ 31 ມີນາ 2020 ໄດ້ສໍາເລັດ 100%. ໂຄງການກໍ່ສ້າງໂຮງຮຽນຄັ້ງນີ້ ມີຈໍານວນ 1 ຫຼັງ, ຂະໜາດ 16X9 ແມັດ, ແບ່ງອອກເປັນ 2 ຫ້ອງຮຽນ. ໂຮງຮຽນເປັນລັກສະນະເຮືອນກໍ່ມຸງດ້ວຍກະເບື້ອງ, ປູກະໂລ່, ແຕ່ລະຫ້ອງປະກອບດ້ວຍໂຕະຕັ່ງ ແລະ ກະດານ ຄົບຊຸດ ລວມມູນຄ່າການກໍ່ສ້າງທັງໝົດ 251.144.900 ກີບ ໂດຍການສະໜັບສະໜູນທຶນຈາກ ລັດຖະບານອານາຈັກລູກຊໍາບວກ (ແຜນງານລາວ/030).

       ໃນພິທີ ໄດ້ມີການເຊັນມອບ-ຮັບລະຫວ່າງຜູ້ຮັບເໝົາກໍ່ສ້າງ ແລະ ເຈົ້າຂອງໂຄງການ ໂດຍໃຫ້ກຽດເຊັນມອບຂອງ ທ່ານ ບຸນສວນ ຫຼ້າຈັນທະວົງ ຜູ້ອໍານວຍການບໍລິສັດ ແລະ ໃຫ້ກຽດເຊັນຮັບໂດຍ ທ່ານ ສົມຫວັງ ວິໄລວັນ ຫົວໜ້າຫ້ອງການສຶກສາທິການ ແລະ ກິລາເມືອງ ແລ້ວມອບຕໍ່ໃຫ້ຄູ-ອາຈານ ແລະ ບ້ານ ປົກປັກຮັກສາຕໍ່ໄປ.

         ໃນມື້ດຽວກັນນີ້ ຄະນະກໍາມະການກວດກາການກໍ່ສ້າງໄດ້ລົງກວດກາຄວາມມາດຕະຖານຂອງໂຮງຮຽນບ້ານວັງແປ້ນ ທີຄໍ້າປະກັນ10% ຂອງໂຄງການກໍ່ສ້າງໂຮງຮຽນພາຍຫຼັງການມອບ-ຮັບແລ້ວ  ເຊິ່ງໄດ້ເອກະພາບໃຫ້ຜູ້ຮັບເໝົາປັບປຸງປົວແປງຄືນບາງຈຸດ ຄື: ສ້ອມແປງຫຼັງຄາບ່ອນລົບສັນ, ໃສ່ວາວປິດ-ເປີດນໍ້າເຂົ້າຫ້ອງນໍ້າ ແລະ ຈຸດອຶ່ນໆອີກຈຳນວນໜຶ່ງ.