ກອງປະຊຸມເຜີຍແຜ່ມະຕິວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່ ໄດ້ຈັດຂຶ້ນໃນວັນທີ 14 ພຶດສະພາ 2020 ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ທ່ານ ວັນວິໄລ ແດນພູຫຼວງ ຄະນະປະຈຳພັກແຂວງ ປະທານແນວລາວສ້າງຊ້າດແຂວງບໍລິຄຳໄຊ ມີຄະນະແນວລາວສ້າງຊາດແຂວງ, ອົງການຈັດຕັ້ງມະຫາຊົນ ແລະ ບັນດາພາກສ່ວນອ້ອມຂ້າງແຂວງ ເຂົ້າຮ່ວມ.

   ມະຕິກົມການເມືອງສູນກາງພັກ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່ ສະບັບເລກທີ 108/ກມສພ, ລົງວັນທີ 30 ເມສາ 2020 ໄດ້ຍົກໃຫ້ເຫັນເຖິງສະພາບຄວາມເປັນຈິງ ຂອງວຽກງານແນວໂຮມ ແລະ ວຽກງານມະຫາຊົນຂອງພັກ ທີ່ມີພາລະບົດບາດ, ສິດ ແລະ ໜ້າທີ່ ໃນການສຶກສາອົບຮົມ, ປຸກລະດົມ, ເຕົ້າໂຮມຄວາມສາມັກຄີປອງດອງບັນດາຊົນເຜົ່າ, ຊັ້ນຄົນ, ສາສະໜາ, ເພດ, ໄວ ໃຫ້ເປັນປຶກແຜ່ນແໜ້ນໜາ ພາຍໃຕ້ການນຳພາຂອງພັກ, ປະຕິບັດແນວທາງ, ນະໂຍບາຍ, ກົດໝາຍ ແລະ ເຂົ້າຮ່ວມການພັດທະນາເສດຖະກິດ-ສັງຄົມ ແລະ ການປ້ອງກັນຊາດ-ປ້ອງກັນຄວາມສະຫງົບ ຢ່າງຕັ້ງໜ້າ ພ້ອມດຽວກັນຍັງເອົາໃຈໃສ່ປົກປ້ອງສິດຜົນປະໂຫຍດອັນຊອບທຳ ແລະ ຖືກກົດໝາຍ, ເສີມຂະຫຍາຍປະຊາທິປະໄຕ, ສິດເປັນເຈົ້າ ຂອງປະຊາຊົນ. 

     ມະຕິສະບັບນີ້ ຍັງໄດ້ຍົກໃຫ້ເຫັນເຖິງທັດສະນະພື້ນຖານ, ທິດທາງວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່, ການຊີ້ນຳຜັນຂະຫຍາຍ ແລະ ມາດຕະການຈັດຕັ້ງປະຕິບັດ.

  ໃນສະເພາະໜ້າ ພັກໄດ້ວາງທິດທາງຕົ້ນຕໍວຽກງານແນວໂຮມ ແລະ ວຽກງານມະຫາຊົນ ຄື: ສືບຕໍ່ປັບປຸງນິຕິກຳ, ພາລະບົດບາດ, ຮູບການ, ວິທີການເຄື່ອນໄຫວ ແລະ ຂະຫຍາຍການຈັດຕັ້ງ ໃຫ້ເຖິງທຸກຮາກຖານ, ສືບຕໍ່ປ່ຽນແປງໃໝ່ແບບແຜນການນຳພາຂອງພັກ ຕໍ່ວຽກງານແນວໂຮມ ແລະ ວຽກງານມະຫາຊົນ, ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາຢ່າງແຂງແຮງ, ຈັດຕັ້ງເຄື່ອນໄຫວສ້າງຂະບວນການມະຫາຊົນ ດ້ວຍຫຼາຍຮູບຫຼາຍສີ ແລະ ແທດເໝາະກັບແຕ່ລະເປົ້າໝາຍ, ຍົກສູງບົດບາດຕິດຕາມ, ກວດກາຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ໂດຍຜ່ານຄຳຄິດຄຳເຫັນ, ຄຳສະເໜີ ຕໍ່ການຈັດຕັ້ງປະຕິບັດແນວທາງ, ລັດຖະທຳມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ, ສ້າງເງື່ອນໄຂໃນການເຄື່ອງໄຫວຕົວຈິງດ້ານງົບປະມານ ແລະ ພື້ນຖານໂຄງລ່າງ, ສົ່ງເສີມການມີສ່ວນຮ່ວມໃນການປະຕິບັດໂຄງການຕ່າງໆຂອງລັດຖະບານ, ເອົາໃຈໃສ່ປັບປຸງກົງຈັກການຈັດຕັ້້ງ, ການກໍ່ສ້າງພະນັກງານ ຕາມທິດຮັບປະກັນຄຸນນະພາບ, ກະທັດຮັດ ແລະ ສົມເຫດສົມຜົນ, ຕັ້ງໜ້າເຂົ້າຮ່ວມ ແລະ ປຸກລະດົມຂົນຂວາຍມະຫາຊົນ ໃຫ້ມີສ່ວນຮ່ວມໃນການຈັງຕັ້ງປະຕິບັດ ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ຮອບດ້ານ ແລະ ເພີ່ມທະວີການທູດປະຊາຊົນ ຕາມແນວທາງການຕ່າງປະເທດຂອງພັກ ໃນສະເພາະໜ້າ ແລະ ຍາວນານ.