ກອງປະຊຸມໃຫຍ່ ຄັ້ງທີ IV ຂອງໜ່ວຍພັກຮາກຖານອົງການກາແດງສາຂາແຂວງບໍລິຄຳໄຊ ໄດ້ຈັດຂຶ້ນໃນວັນທີ 14 ພຶດສະພາ 2020 ຢູ່ສະໂມສອນໃຫຍ່ຂອງກອງບັນຊາການ ປກສ ແຂວງ ໂດຍພາຍໃຕ້ການເປັນປະທານຂອງ ສະຫາຍນາງ ໂສພາ ຈັນທະວົງ ເລຂາໜ່ວຍພັກຮາກຖານອົງການກາແດງສາຂາແຂວງບໍລິຄຳໄຊ, ເປັນກຽດເຂົ້າຮ່ວມຂອງສະຫາຍ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ, ມີສະມາຊິກພັກສົມບູນ 9 ສະຫາຍ ຍິງ 5 ສະຫາຍ ແລະ ແຂກຖືກເຊີນຈາກຮາກຖານອ້ອມຂ້າງເຂົ້າຮ່ວມ.

​ກອງປະຊຸມ ໄດ້ຮັບຟັງການຜ່ານບົດລາຍງານການເມືອງ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຜ່ານມາວ່າ: ຕະຫຼອດໄລຍະ 5 ປີຜ່ານມາ ການຈັດຕັ້ງປະຕິບັດວຽກງານ ໄດ້ປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍດ້ານ ເປັນຕົ້ນແມ່ນການປຸກລະດົມຂົນຂວາຍແຫຼ່ງທຶນ ເພື່ອເປັນກອງທຶນແຮສຸກເສີນຊ່ວຍເຫຼືອບັນເທົາທຸກ ແລະ ກອງທຶນເລືອດ, ຕໍ່ກັບຄວາມຫຍຸ້ງຍາກດັ່ງກ່າວ ຄະນະໜ່ວຍພັກ ໄດ້ເພີ່ມການຊີ້ນຳ-ນຳພາ ເອົາໃຈໃສ່ປະຕິບັດໜ້າທີ່ວຽກງານຈົນໄດ້ຮັບຜົນສຳເລັດເຊັ່ນ: ໃຫ້ການຊ່ວຍເຫຼືອບັນເທົາທຸກເບື້ອງຕົ້ນ, ປຸກລະດົມຂົນຂວາຍຜູ້ບໍລິຈາກເລືອດ, ສົ່ງເສີມສຸຂະພາບຂັ້ນຕົ້ນ ແລະ ໂຄສະນາ-ຂົນຂວາຍແຫຼ່ງທຶນ, ພົ້ນເດັ່ນແມ່ນປຸກລະດົມຂົນຂວາຍຜູ້ບໍລິຈາກເລືອດໄດ້ 576 ຄັ້ງ, ມີຜູ້ເຂົ້າຮ່ວມ 80.440 ຄົນ ຍິງ 35.566 ຄົນ, ມີຜູ້ບໍລິຈາກ 13.135 ຖົງ ລື່ນຄາດໝາຍ 3.641 ຖົງ, ຈ່າຍເລືອດປອດໄພໃຫ້ແກ່ຄົນເຈັບທີ່ຕ້ອງການປິ່ນປົວດ້ວຍເລືອດ 11.439 ຖົງ, ປ້ອງກັນເວນຍາມສູນເລືອດ 24 ຊົ່ວໂມງ ເພື່ອສະໜອງເລືອດປອດໄພໃຫ້ແກ່ຄົນເຈັບ, ຍ້ອງຍໍຜູ້ບໍລິຈາກເລືອດໄດ້ 34.951 ເທື່ອຄົນ, ຂະຫຍາຍຕາໜ່າງການສະໜອງເລືອດປອດໄພຢູ່ 2 ເມືອງ ຄືເມືອງຄຳເກີດ ແລະ ວຽງທອງ, ຊ່ວຍເຫຼືອດບັນເທົາທຸກປະຊາຊົນທີ່ຖືກເຄາະຮ້າຍຈາກໄຟໄໝ້ເຮືອນຢູ່ 7 ເມືອງ ຈຳນວນ 64 ຄອບຄົວ ມູນຄ່າ 131.069.000 ກີບ, ໄດ້ຮັບຜົນກະທົບຈາກໄພນ້ຳຖ້ວມ ແລະ ດິນເຈື່ອນ 942 ຄອບຄົວ, 23 ບ້ານ ຢູ່ເມືອງທ່າພະບາດ, ປາກກະດິງ, ຄຳເກີດ, ວຽງທອງ ມູນຄ່າການຊ່ວຍເຫຼືອ 345.587.000 ກີບ, ທຸກຍາກ, ອານາຖາ 1.549 ຄອບຄົວ 110 ບ້ານ 7 ຕົວເມືອງ ມູນຄ່າ 763.001.000 ກີບ. ລວມມູນຄ່າການຊ່ວຍເຫຼືອ 1.239.657.000 ກີບ.

ກອງປະຊຸມຄັ້ງນີ້ ຍັງໄດ້ມີມະຕິຮັບຮອງເອົາຮ່າງລາຍງານການເມືອງທັງສອງພາກ ແລະ ພ້ອມກັນຄົ້ນຄ້ວາປະກອບຄຳຄິດ, ຄຳເຫັນໃສ່ບົດລາຍງານການເມືອງ ບົດສຳຫຼວດການນຳພາຂອງຄະນະພັກ ແລະ ຮັບຮອງເອົາທິດທາງແຜນການໃນ 5 ປີຕໍ່ໜ້າ ໂດຍຈະສືບຕໍ່ນຳເອົາແນວທາງ, ນະໂຍບາຍ, ມະຕິຄຳສັ່ງຕ່າງໆ ຂອງພັກ-ລັດ ເຜີຍແຜ່ ຮ່ຳຮຽນໃຫ້ສະມາຊິກພັກ, ຊີ້ນຳ-ນຳພາທຸກຂະແໜງການພາຍໃນອົງການກາແດງສາຂາແຂວງ ແຕ່ລະດ້ານໃຫ້ມີຜົນສຳເລັດ, ນຳເອົາແນວທາງປ້ອງກັນຊາດ, ປ້ອງກັນຄວາມສະຫງົບ ມາຈັດຕັ້ງເຜີຍແຜ່ ຮ່ຳຮຽນໃຫ້ສະມາຊິກພັກຂອງຕົນໃຫ້ຮັບຮູ້ເຂົ້າໃຈ, ອຳນວຍຄວາມສະດວກໃຫ້ບັນດາອົງການຈັດຕັ້ງມະຫາຊົນໄດ້ເຄື່ອນໄຫວຕາມພາລະບົດບາດ, ໜ້າທີ່ ສິດຂອງຕົນຢ່າງເຂັ້ມງວດ ແລະ ຈະສືບຕໍ່ກໍ່ສ້າງ ແລະ ຂະຫຍາຍສະມາຊິກພັກໃຫ້ໄດ້ 3 ສະຫາຍ, ພ້ອມດຽວກັນນີ້ ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະໜ່ວຍພັກຮາກຖານຊຸດໃໝ່ ຜ່ານການປ່ອນບັດລົງຄະແນນສຽງ ແລະ ກອງປະຊຸມຄັ້ງປະຖົມມະລຶກເລືອກໄດ້ ສະຫາຍນາງ ວັນເພັງ ໄຊສົງຄາມ ເປັນເລຂາໜ່ວຍພັກຮາກຖານ ຊຸດທີ IV ແລະ ສະຫາຍ ສີສຸພັນ ວົງວິໄລ ເປັນຮອງເລຂາ ທັງເປັນຜູ້ກວດກາ, ແລະ ຍັງໄດ້ປ່ອນບັດເອົາຜູ້ແທນສົມບູນ 1 ສະຫາຍ ໄປຮ່ວມກອງປະຊຸມໃຫ່ຍ ຄັ້ງທີ VII ຂອງອົງຄະນະບໍລິຫານງານພັກແຂວງບໍລິຄຳໄຊ.