ບັ້ນດຳເນີນຊີວິດການເມືອງຄະນະພັກຮາກຖານ ແລະ ທາບທາມບຸກຄະລາກອນ ຮອບທີ 2 ຂອງຄະນະພັກຮາກຖານພະແນກພະລັງງານ ແລະ ບໍ່ແຮ່ແຂວງ ໄດ້ຈັດຂຶ້ນໃນວັນທີ 13 ພຶດສະພາ 2020 ຢູ່ສະໂມສອນໃຫຍ່ຂອງແຂວງ ໂດຍການເປັນປະທານຂອງ ທ່ານ ບຸນເສັງ ປະທຳມະວົງ ຄະນະປະຈຳພັກແຂວງ ຮອງເຈົ້າແຂວງບໍລິຄຳໄຊ ມີສະມາຊິກພັກພາຍໃນຮາກຖານ ແລະ ພາກສ່ວນກ່ຽວຂ້ອງ ເຂົ້າຮ່ວມ.

   ບັ້ນດຳເນີນຊີວິດການເມືອງໃນຄັ້ງນີ້ ໄດ້ເຊື່ອມຊືມເອກະສານເສີມຂະຫຍາຍມູນເຊື້ອ ແລະ ຄວາມສາມັກຄີເປັນເອກະພາບພາຍໃນພັກ ໂດຍມີຫຼາຍເນື້ອໃນທີ່ສຳຄັນ ເປັນຕົ້ນແມ່ນ ການກຳເນີດ ແລະ ທາດແທ້ຂອງພັກປະຊາຊົນປະຕິວັດລາວ ພັກເຮົາມີຄວາມຈົງຮັກພັກດີ ແລະ ຢຶດໝັ້ນທິດສະດີມາກ-ເລນິນ ກໍ່ຄືຈຸດໝາຍສັງຄົມນິຍົມຢ່າງໜັກແໜ້ນ, ຢຶດໝັ້ນ ແລະ ປະຕິບັດຕາມບັນດາຫຼັກການພື້ນຖານການຈັດຕັ້ງ ເຄື່ອນໄຫວຂອງພັກຢ່າງຖືກຕ້ອງ ນັ້ນຄືຫຼັກການລວມສູນປະຊາທິປະໄຕ, ຖືການສະໜັບສະໜູນຂອງປະຊາຊົນເປັນສິ່ງສຳຄັນ ແລະ ເປັນປັດໄຈຕັດສິນບົດບາດການນຳພາ ແລະ ກຳອຳນາດຂອງພັກ ມີຄວາມເປັນເຈົ້າການປັບປຸງແບບແຜນວິທີນຳພາຂອງພັກ ເຄື່ອນໄຫວຕິດແທດກັບປະຊາຊົນ ເຄົາລົບສິດເປັນເຈົ້າຂອງປະຊາຊົນ ເຮັດທຸກສິ່ງທຸກຢ່າງເພື່ອຄວາມຮັ່ງມີຜາສຸກຂອງປະຊາຊົນ ແລະ ຄວາມມັ່ງຄັ່ງເຂັ້ມແຂງຂອງປະເທດຊາດ, ເຂັ້ມງວດໃນການກຳຈັດແກ້ໄຂປະກົດການຫຍໍ້ທໍ້ ທີ່ເຮັດໃຫ້ພັກເສື່ອມອິດທິພົນບົດບາດ ແລະ ຂາດຄວາມເຊື່ອໝັ້ນຈາກປະຊາຊົນ, ຕັ້ງໜ້າເສີມຂະຫຍາຍກຳລັງພາຍໃນຊາດສົມທົບກັບການພົວພັນຮ່ວມມືກັບພັກປະເທດເພື່ອນມິດຍຸດທະສາດ ແລະ ຍາດແຍ່ງເອົາການສະໜັບສະໜູນຊ່ວຍເຫຼືອ ຈາກພາຍນອກຢ່າງມີຫຼັກການ ສ້າງເປັນກຳລັງແຮງສັງລວມເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ຄວາມສາມັກຄີເປັນເອກະພາບພາຍໃນພັກ ແມ່ນເນື້ອໃນຕົ້ນຕໍອັນໜຶ່ງ ໃນການສ້າງພັກໃຫ້ມີຄວາມໜັກແໜ້ນທາງດ້ານການຈັດຕັ້ງ, ເປັນປັດໄຈສຳຄັນຄ້ຳປະກັນການຄົງຕົວ ແລະ ຂະຫຍາຍຕົວຂອງພັກເຮົາ.

      ກອງປະຊຸມ ຍັງຈະໄດ້ເຊື່ອມຊຶມເອກະສານຍົກສູງຄວາມສາມາດນຳພາ ແລະ ຄວາມເປັນແບບຢ່າງນຳໜ້າຂອງພັກ, ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທຳປະຕິວັດ ແລະ ເອກະສານສຳຄັນ ອີກຈຳນວນໜຶ່ງ. ກອງປະຊຸມດັ່ງກ່າວຈະໄດ້ດຳເນີນໄປ 3 ວັນຈຶ່ງຈະສໍາເລັດ ໂດຍຈະໄດ້ຮັບຟັງການຜ່ານຮ່າງລາຍງານການເມືອງທັງ 2 ພາກ ແລະ ຮ່າງສຳຫຼວດການນຳພາຂອງຄະນະພັກຮາກຖານ, ແບ່ງໜ່ວຍສຳຫຼວດແຕ່ລະໜ່ວຍພັກ, ປະກອບຄຳເຫັນຕີລາຄາແບ່ງປະເພດໃຫ້ຄະນະພັກ, ຜ່ານມາດຖານເງື່ອນໄຂຜູ້ຮັບສະໝັກເລືອກຕັ້ງເຂົ້າໃນຄະນະພັກຮາກຖານ ແລະ ອື່ນໆ.