ກອງປະຊຸມໃຫຍ່ ຄັ້ງທີ II ຂອງຄະນະພັກຮາກຖານພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ ໄດ້ຈັດຂຶ້ນໃນວັນທີ 12 ພຶດສະພາ 2020 ຢູ່ສະໂມສອນໃຫຍ່ຂອງກອງບັນຊາການ ປກສ ແຂວງ ໂດຍພາຍໃຕ້ການເປັນປະທານຂອງ ສະຫາຍ ລັງສີ ແກ້ວວິເສດ ເລຂາຄະນະພັກຮາກຖານພະແນກ ປທສ ແຂວງ, ເປັນກຽດເຂົ້າຮ່ວມຂອງສະຫາຍ ບຸນຄຳ ໄຊເຍ່ຍລໍວື່ ຄະນະປະຈຳພັກແຂວງ ປະທານກວດກາພັກ-ລັດແຂວງ, ມີສະມາຊິກພັກສົມບູນ 62 ສະຫາຍ ຍິງ 19 ສະຫາຍ ແລະ ແຂກຖືກເຊີນຈາກຮາກຖານອ້ອມຂ້າງ ເຂົ້າຮ່ວມ.

​ໃນພິທີໄດ້ຮັບຟັງການຜ່ານບົດລາຍງານການເມືອງ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 1 ຜ່ານມາວ່າ: ຮາກຖານພັກພະແນກ ປທສ ແຂວງ ມີ 4 ໜ່ວຍພັກຂຶ້ນກັບ, ມີສະມາຊິກພັກທັງໝົດ 62 ສະຫາຍ ຍິງ 19 ສະຫາຍ, ສະມາຊິກພັກສຳຮອງ 2 ສະຫາຍ, ຕະຫຼອດໄລຍະຜ່ານມາ ຄະນະພັກໄດ້ເອົາໃຈໃສ່ສຶກສາອົບຮົມສະມາຊິກພັກ, ມະຫາຊົນໃຫ້ມີຄວາມເປັນເອກະພາບຕໍ່ແນວທາງປ່ຽນແປງໃໝ່ຂອງພັກ, ມີແບບແຜນວິທີນຳພາທີ່ແທດເໝາະກັບຕົວຈິງ ສາມາດຕີຖອຍພະຍາດອາດຍາສິດເທື່ອລະກ້າວ ຮັກສາບົດບາດການນຳພາພັກໄດ້ເປັນຢ່າງດີ ແລະ ສາມາດໄດ້ຮັບຜົນສຳເລັດໃນຫຼາຍດ້ານ ເປັນຕົ້ນ ລົງກວດກາສັນຍານຄື້ນຄວາມຖີ່ລົບກວນຂ້າມຊາຍແດນ, ຕິດຕັ້ງທົດລອງນຳໃຊ້ລະບົບປະຊຸມທາງໄກກັບສູນອີໂກເວີມັນ ແລະ ບັນດາພະແນກ ປທສ ແຂວງ, ຄຸ້ມຄອງ ແລະ ອອກອະນຸຍາດໃຫ້ບັນດານິຕິບຸກຄົນ, ຫ້າງຮ້ານທີ່ໃຫ້ບໍລິການຈຳໜ່າຍ ແລະ ສ້ອມແປງອຸປະກອນໂທລະສັບຄົມມະນາຄົມ ຄື: ຮ້ານສ້ອມແປງ ແລະ ຈຳໜ່າຍອຸປະກອນໄອທີຊີ, ຮ້ານບໍລິການອິນເຕີເນັດກາເຟ 30 ຮ້ານ, ຮ້ານໃຫ້ບໍລິການອິນເຕີເນັດ ISP, ຮ້ານບໍລິການຕູ້ເຕີມເງິນໂທລະສັບ ແລະ ອອກອະນຸຍາດຄື້ນຄວາມຖີ່ວິທະຍຸກະຈາຍສຽງລະບົບ FM ຈຳນວນ 1 ແຫ່ງ, ອອກອະນຸຍາດເລກໝາຍໂທລະສັບສາຍດ່ວນໄດ້ 5 ພາກສ່ວນ, ເວັບໄຊ 5 ພາກສ່ວນ, ມີລະບົບສາຍສົ່ງສາຍໄຍແກ້ວ 3.959 ກິໂລແມັດ, ກວມເອົາ 7 ເມືອງ, ມີເສົາຮັບ-ສົ່ງສັນຍານໂທລະສັບ 272 ເສົາ, ມີເຄື່ອງຮັບສົ່ງສັນຍານມືຖື 621 ເຄື່ອງ, ສັນຍານ 2G ກວມ 279 ບ້ານ ເທົ່າກັບ 95,87%, ສັນຍານ 3G ກວມເອົາ 233 ບ້ານ ເທົ່າກັບ 80,06% ແລະ ສັນຍານ 4G ກວມເອົາ 173 ບ້ານ ເທົ່າກັບ 59,45%, ມີຜູ້ນຳໃຊ້ອິນເຕີເນັດທຸກລະບົບ ທັງໝົດ 1.410 ລູກຄ້າ, ນຳໃຊ້ໝາຍເລກໂທລະສັບ 181.187 ເລກໝາຍ ສະເລ່ຍໃສ່ປະຊາກອນແມ່ນ 60 ເລກໝາຍ ຕໍ່ປະຊາກອນ 100.

ນອກຈາກນັ້ນກອງປະຊຸມຄັ້ງນີ້ ຍັງໄດ້ມີມະຕິຮັບຮອງເອົາຮ່າງລາຍງານການເມືອງທັງສອງພາກ ແລະ ພ້ອມກັນຄົ້ນຄວ້າປະກອບຄຳຄິດ, ຄຳເຫັນໃສ່ບົດລາຍງານການເມືອງ ບົດສຳຫຼວດການນຳພາຂອງຄະນະພັກ ແລະ ຮັບຮອງເອົາທິດທາງແຜນການໃນ 5 ປີຕໍ່ໜ້າ ເປັນຕົ້ນແມ່ນ ສູ້ຊົນສ້າງບັນດາໜ່ວຍພັກທີ່ຂຶ້ນກັບໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນຢ່າງຕໍ່ເນື່ອງ, ຂະຫຍາຍຕາໜ່າງໄປສະນີ, ໂທລະຄົມມະນາຄົມລົງສູ່ຊົນນະບົດ, ເຂດຫ່າງໄກສອກຫຼີກ, ຊຸກຍູ້ອົງການຈັດຕັ້ງພັກລັດ ແລະ ເອກະຊົນໃນການນຳໃຊ້ໄອຊີທີ ເຂົ້າໃນການບໍລິຫານລັດ ແລະ ການບໍລິການຢ່າງກວ້າງຂວາງ. 

      ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະພັກຮາກຖານຊຸດໃໝ່ ຜ່ານການປ່ອນບັດລົງຄະແນນສຽງ ແລະ ກອງປະຊຸມຄັ້ງປະຖົມມະລຶກເລືອກໄດ້ ສະຫາຍ ລັງສີ ແກ້ວວິເສດ ເປັນເລຂາຄະນະພັກຮາກຖານ ຊຸດທີ II, ສະຫາຍ ຫົງວິໄລ ຈຸນລະມຸນຕີ ເປັນຮອງເລຂາ, ສະຫາຍ ວັດທະນາ ໄຊຍະແສງ ເປັນປະທານກວດກາ, ສະຫາຍ ວິລອນ ວັນນະບົວທອງ ແລະ ສະຫາຍ ສາຍເພັດ ໄຊສົມພູ ເປັນຄະນະພັກຮາກຖານ, ສະຫາຍນາງ ເຂັມມາລາ ລໍວັນໄຊ ເປັນຮອງປະທານກວດກາ ແລະ ຍັງໄດ້ປ່ອນບັດເອົາຜູ້ແທນສົມບູນ 3 ສະຫາຍ ແລະ ສຳຮອງ 1 ສະຫາຍ ໄປຮ່ວມກອງປະຊຸມໃຫຍ່ ຄັ້ງທີ VII ຂອງຄະນະບໍລິຫານງານພັກແຂວງບໍລິຄຳໄຊ.