ໃນຕອນເຊົ້າຂອງວັນທີ 10 ພຶດສະພາ 2020 ຄະນະປະຕິບັດງານພິເສດ ແຂວງບໍລິຄໍາໄຊ-ແຂວງຮ່າຕິ້ງ ໄດ້ຈັດພິທີສົ່ງອັດທິທະຫານອາສາສະໝັກ ແລະ ຊ່ຽວຊານຫຽວດນາມ ທີ່ເສຍຊີວິດໃນປາງສົງຄາມຢູ່ ສ ປປ ລາວ ຈຳນວນ 9 ອັດຖິ ຢ່າງເປັນທາງການ ແລະ ສົມກຽດ ໂດຍໄດ້ເຄື່ອນຍ້າຍຈາກຫໍບູຊາ ເດີນທາງເຂົ້າສູ່ດິນແດນບ້ານເກີດເມືອງນອນຂອງຕົນ ສສ ຫວຽດນາມ ຜ່ານດ່ານສາກົນນໍ້າພາວ-ເກົາແຈ່ວ ເປັນກຽດຕ້ອນຮັບຂະບວນການດັັ່ງກ່າວຂອງ ທ່ານ ດັ້ງກວັກວິງ ຄະນະປະຈໍາພັກແຂວງ, ຮອງປະທານຜູ້ປະຈໍາການຄະນະກຳມະການປະຊາຊົນແຂວງ, ຫົວໜ້າຄະນະປະຕິບັດງານພິເສດແຂວງຮ່າຕິ້ງ, ທ່ານ ພັອ ຫງວຽນເຕິດເຍິນ  ຫົວໜ້າການເມືອງ ກອງບັນຊາຫານທະຫານແຂວງ, ຫົວໜ້າຜູ້ປະຈໍາການຄະນະປະຕິບັດງານພິເສດແຂວງຮ່າຕິ້ງ ພ້ອມດ້ວຍເຈົ້າໜ້າທີ່ ແລະ ພະນັກງານທີ່ປະຕິໜ້າທີ່ ຢູ່ດ່ານເກົາແຈວ ຄອຍຕ້ອນຮັບຢ່າງອົບອຸ່ນ ພ້ອມໄດ້ຈັດພິທີໄຫ້ວອາໄລ ເຊິ່ງເລີ່ມຕົ້ນໂດຍຄະນະທ່ານ ດັ້ງກວັກວິງ-ຄະນະປະຈໍາພັກແຂວງ, ຮອງປະທານຜູ້ປະຈໍາການຄະນະກຳມະການປະຊາຊົນແຂວງ, ຫົວໜ້າຄະນະປະຕິບັດງານພິເສດແຂວງຮ່າຕິ້ງ, ຕໍ່ດ້ວຍຄະນະພັກ-ຄະນະປົກຄອງແຂວງແຂວງບໍລິຄຳໄຊ ນຳໂດຍ ທ່ານ ພົນຈັດຕະວາ ຈວງຈັນ ລາດສະວົງ ຄະນະປະຈຳພັກແຂວງ ຫົວໜ້າການເມືອງກອງບັນຊາການທະຫານແຂວງ ທັງເປັນຮອງຫົວໜ້າຜູ້ປະຈຳການຄະນະປະຕິບັດງານພິເສດແຂວງ ຕາງໜ້າໃຫ້ຄະນະພັກຄະນະປົກຄອງແຂວງບໍລິຄໍາໄຊ, ຕໍ່ດ້ວຍບັນດາພາກສ່ວນຕ່າງໆ ເຂົ້າຮ່ວມໄຫວ້ອາໄລ, ຈູດທູບບູຊາຈາລຶກບຸນຄຸນ ແລະ ຄຸນງາມຄວາມດີ ເຖິງບັນດານັກຮົບວິລະຊົນ, ທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດ ເພື່ອປະເທດຊາດ, ເພື່ອປະຊາຊົນທັງສອງຊາດລາວ-ຫວຽດນາມ ໃນປາງສົງຄາມຢູ່ ສປປ ລາວ ກັບຄືນພູມລໍາເນົາບ້ານເກີດເມືອງນອນ.

    ຈາກນັ້ນໄດ້ເຄື່ອນຍ້າຍອັດຖິເຂົ້າສູ່ສຸສານເນີ່ມ ເມຶອງເຮືອງເຊີນ ແຂວງຮ່າຕິ້ງ ແລະ ໄດ້ຈັດພິທີທາງສາສະໜາ ຕາມຮີດຄອງປະເພນີຢ່າງສົມກຽດ, ໂອກາດນີ້ ທ່ານ ດັ້ງກວັກວິງ ຕາງໜ້າໃຫ້ຄະນະພັກຄະນະປົກຄອງແຂວງຮ່າຕິ້ງ ຍັງໄດ້ກ່າວຄວາມຍ້ອງຍໍຊົມເຊີຍ ມາຍັງຄະນະຕິບັດງານພິເສດບໍລິຄຳໄຊ-ຮ່າຕິ້ງ ທີ່ມີຜົນງານໃຫຍ່ຫຼວງ ສາມາດປະຕິບັດໜ້າທີ່ຂອງຕົນດ້ວຍຜົນສຳເລັດຕາມແຜນການທີ່ວາງໄວ້. ພ້ອມນັ້ນ ທ່ານຍັງໄດ້ມອບອຸປະກອນເຄື່ອງມືຮັບໃຊ້ທາງການແພດເພື່ອນຳໃຊ້ເຂົ້າໃນການຕ້ານໂຄວິດ-19 ປະກອບມີ ຖັງສີດຢາຂ້າເຊື້ອ 4 ຊຸດ, ເຄື່ອງວັດອຸນຫະພູມ 40 ອັນ, ຖັງຂີ້ເຫຍື້ອຂະໜາດ 60 ລິດ ຈໍານວນ 36 ຖັງ, ນໍ້າຢາລ້າງມື 250 ml ຈໍານວນ 350 ຂວດ, ຜ້າອັດປາກ-ດັງ 20.000 ອັນ ລວມມູນຄ່າ 200 ລ້ານດົ່ງ ໃຫ້ກອງບັນຊາການທະຫານແຂວງບໍລິຄໍາໄຊ ກ່າວຮັບໂດຍ ທ່ານ ພົນຈັດຕະວາ ຈວງຈັນ ລາດສະວົງ ຫົວໜ້າການເມືອງ ກອງບັນຊາການທະຫານແຂວງບໍລິຄຳໄຊ.