ໃນວັນທີ 9 ພຶດສະພາ 2020 ຢູ່ຫໍບູຊາອັດຖິທະຫານອາສາສະໝັກ ແລະ ຊຽ່ວຊານຫວຽດນາມ ກອງບັນຊາການທະຫານແຂວງບໍລິຄຳໄຊ ໄດ້ຈັດພິທີວາງພວງມາລາໄຫວ້ອາໄລເຖິງດວງວິນຍານທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ ສປປ ລາວ ເຊິ່ງເລີ່ມຕົ້ນດ້ວຍຄະນະພັກ-ຄະນະປົກຄອງແຂວງ ນຳໂດຍທ່ານ ພົນຈັດຕະວາ ຈວງຈັນ ລາດສະວົງ ຄະນະປະຈຳພັກແຂວງ ຫົວໜ້າການເມືອງກອງບັນຊາການທະຫານແຂວງ ທັງເປັນຮອງຫົວໜ້າຜູ້ປະຈຳການຄະນະປະຕິບັດງານພິເສດແຂວງບໍລິຄຳໄຊ, ຕໍ່ດ້ວຍຄະນະພັກ ກຳມະການປະຊາຊົນແຂວງຮ່າຕິ້ງ, ຄະນະພັກຄະນະບັນຊາກອງບັນຊາການທະຫານແຂວງບໍລິຄຳໄຊ, ຄະນະພັກຄະນະບັນຊາແຂວງຮ່າຕິ້ງ ນອກນັ້ນຍັງໄດ້ມີຕາງໜ້າບັນດາພະແນກການ, ບໍລິສັດ, ຜູ້ປະກອບການດ້ານວິສາຫະກິດທັງພາຍໃນແຂວງ ແລະ ຕ່າງແຂວງເຂົ້າຮ່ວມໄຫວ້ອາໄລ.

    ໃນເວລາຕໍ່ມາຢູ່ທີ່ຫ້ອງປະຊຸມຫໍບູຊາ ຄະນະປະຕິບັດງານທັງສອງຝ່າຍ ຍັງໄດ້ລົງນາມເຊັນບົດບັນທຶກມອບ-ຮັບ ຮ່າງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ ສປປ ລາວ ຈຳວນ 9 ຮ່າງ ໃນນັ້ນຈາກນະຄອນຫຼວງ 2 ຮ່າງ ແລະ ແຂວງບໍລິຄຳໄຊ ຈຳນວນ 7 ຮ່າງ ເຊິ່ງຕ່າງໜ້າຝ່າຍແຂວງບໍລິຄຳໄຊ ເຊັນໂດຍທ່ານ ພົນຈັດຕະວາ ຈວງຈັນ ລາດສະວົງ ແລະ ເຊັນຮັບໂດຍ ທ່ານ ພັນໂທ ພິເສດ ຮ່າດຶກຮູ່ງ ຫົວໜ້າໜ່ວຍຂຸດຄົ້ນອັດຖິກອງບັນຊາການທະຫານແຂວງ ຕາງໜ້າໃຫ້ຄະນະປະຕິບັດງານພິເສດແຂວງຮ່າຕິ້ງ ໂດຍມີພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.  ທັງນີ້ ກໍ່ເພື່ອປະຕິບັດຕາມເນື້ອໃນຈິດໃຈການຊີ້ນຳຂອງສອງພັກ-ສອງລັດຖະບານ ແລະ ຄະນະປະຕິບັດງານພິເສດແຂວງ ບໍລິຄຳໄຊ-ແຂວງຮ່າຕິ້ງ ກ່ຽວກັບວຽກງານການຊອກຫາ, ຂຸດຄົ້ນ, ມອບ-ຮັບ ແລະ ຈັດສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ລາວກັບຄືນປະເທດ. ໃນສົກປີ 2019-2020 ຢູ່ແຂວງບໍລິຄຳໄຊ ສາມາດຂຸດຄົ້ນໄດ້ທັງໝົດຈໍານວນ 7 ຮ່າງ ໃນນັ້ນຢູ່ເມືອງວຽງທອງ 2 ຮ່າງ, ເມືອງປາກຊັນ 1 ຮ່າງ, ເມືອງປາກກະດິງ 3 ຮ່າງ ແລະ ເມືອງ ໄຊຈໍາພອນ 1 ຮ່າງ ມາຮອດປະຈຸບັນທົ່ວແຂວງສາມາດຂຸດຄົ້ນໄດ້ທັງໝົດ 525 ຮ່າງ.