ພິທີປະກາດ-ປັບປຸງການຈັດຕັ້ງການນຳຂັ້ນສູງພັກການຮັບອຸດໜຸນບຳນານ ແລະ ຍົກຍ້າຍບ່ອນປະຈຳການຂອງພະນັກງານຫຼັກແຫຼ່ງຈຳນວນໜຶ່ງ ໄດ້ຈັດຂຶ້ນ ໃນຕອນທ້າຍຂອງກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 15 ສະໄໝທີ VI ວັນທີ 7 ພຶດສະພາ 2020 ຢູ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ ແລະ ບັນດາພາກສ່ວນຂັ້ນແຂວງ ເຂົ້າຮ່ວມ.

          ໃນພິທີ ໄດ້ຮັບຟັງການຜ່ານມະຕິຕົກລົງຂອງຄະນະເລຂາທິການສູນກາງພັກ ເລກທີ 27/ຄລສພ ລົງວັນທີ 10 ມີນາ 2020 ວ່າດ້ວຍການອະນຸມັດໃຫ້ ສະຫາຍ ແດນປີ ມູນທະດີ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງບໍລິຄຳໄຊ ເກີດເມື່ອວັນທີ 04 ພຶດສະພາ 1954 ລວມອາຍຸກະສຽນໄດ້ 66 ປີ, ເຂົ້າສັງກັດລັດວັນທີ 1 ກັນຍາ 1976 ລວມອາຍຸການ 44 ປີ ອອກພັກການ-ຮັບອຸດໜູນບຳນານ, ມະຕິຕົກລົງຂອງຄະນະເລຂາທິການສູນກາງພັກ ເລກທີ 43/ຄລສພ ລົງວັນທີ 13 ມີນາ 2020 ວ່າດ້ວຍການອະນຸມັດໃຫ້ ສະຫາຍ ພອນທິລາດ ສິດສາທອນ ກຳມະການພັກແຂວງ, ອາດີດ ຫົວໜ້າພະແນກແຜນການ ແລະ ການລົງທຶນ ແຂວງບໍລິຄຳໄຊ ເກີດເມື່ອວັນທີ 08 ກຸມພາ 1961 ລວມອາຍຸກະສຽນໄດ້ 59 ປີ, ເຂົ້າສັງກັດລັດວັນທີ 15 ຕຸລາ 1981 ລວມອາຍຸການ 39 ປີ ອອກພັກການ-ຮັບອຸດໜູນບຳນານ, ຂໍ້ຕົກລົງທ່ານເຈົ້າແຂວງບໍລິຄຳໄຊ ສະບັບເລກທີ 209/ຂບຊ ລົງວັນທີ 28 ເມສາ 2020 ວ່າດ້ວຍການແຕ່ງຕັ້ງ ທ່ານ ບຸນສົງ ເພັດຈະເລີນ ເປັນຮັກສາການຫົວໜ້າຄະນະຈັດຕັ້ງແຂວງບໍລິຄຳໄຊ, ຂໍ້ຕົກລົງຂອງເຈົ້າແຂວງບໍລິຄຳໄຊ ສະບັບເລກທີ 212/ຂບຊ ລົງວັນທີ 28 ເມສາ 2020 ວ່າດ້ວຍການແຕ່ງຕັ້ງ ທ່ານ ພັນລອນ ແກ້ວວິເສດ ເປັນຮັກສາການຫົວໜ້າຫ້ອງວ່າການແຂວງບໍລິຄຳໄຊ ແລະ ຂໍ້ຕົກລົງຂອງເຈົ້າແຂວງບໍລິຄຳໄຊ ສະບັບເລກທີ 211/ຂບຊ ລົງວັນທີ 28 ເມສາ 2020 ວ່າດ້ວຍການແຕ່ງຕັ້ງ ທ່ານ ສາຍຄຳ ວົງຄຳທອງ ເປັນຮອງຫົວໜ້າຫ້ອງວ່າການແຂວງ.