ພິທີປະກາດປັບປຸງການຈັດຕັ້ງຂອງພະແນກກະສິກຳ ແລະ ປ່າໄມ້ແຂວງບໍລິຄຳໄຊ ໄດ້ຈັດຂຶ້ນໃນທ້າຍອາທິດຜ່ານມາ ຢູ່ທີ່ຫ້ອງປະຊຸມຂອງຕົນ ໃຫ້ກຽດເຂົ້າຮ່ວມຂອງທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ ມີບັນດາຄະນະພັກຄະນະພະແນກ, ຄະນະຈັດຕັ້ງແຂວງ, ບັນດາຕາງໜ້າພະແນກການທີ່ຖືກເຊີນ ຕະຫຼອດຮອດພະນັກງານວິຊາການທົ່ວພະແນກເຂົ້າຮ່ວມ.

          ອີງຕາມ ກົດໝາຍວ່າດ້ວຍ ການປົກຄອງທ້ອງຖິ່ນແຫ່ງ ສປປ ລາວ ສະບັບເລກທີ 68/ສພຊ ລົງວັນທີ 14 ທັນວາ 2015, ອິງຕາມການຄົ້ນຄ້ວາຕົກລົງເຫັນດີເປັນເອກະພາບຂອງຄະນະປະຈຳພັກແຂວງ ບໍລິຄຳໄຊຄັ້ງວັນທີ 24 ກຸມພາ 2020 ແລະ ໜັງສືແຈ້ງຕອບຂອງລັດຖະມົນຕີກະຊວງກະສິກຳ ແລະ ປ່າໄມ້ສະບັບເລກທີ 0269, ລົງວັນທີ 07 ເມສາ 2020 ເຈົ້າແຂວງບໍລິຄຳໄຊ ຕົກລົງ: ແຕ່ງຕັ້ງທ່ານ ພັດທະຈອນ ແກ້ວພຸດທະວົງ ຂຶ້ນເປັນຮັກສາການຫົວໜ້າພະແນກກະສິກໍາ ແລະ ປ່າໄມ້ແຂວງ, ແຕ່ງຕັ້ງທ່ານ ສົມຫວັງ ແກ້ວວົງວິຈິດ ເປັນຮອງຫົວໜ້າພະແນກກະສິກໍາ ແລະ ປ່າໄມ້ແຂວງ ພ້ອມທັງອະນຸມັດໃຫ້ທ່ານ ພອນສະຫວັນ ຫອມນະບຸນລັດ ຫົວໜ້າພະແນກກະສິກຳ ແລະ ປ່າໄມ້ແຂວງຜູ້ເກົ່າອອກພັກຜ່ອນລໍຖ້າຮັບບຳນານ.

    ຕອນທ້າຍຂອງພິທີ ຍັງໄດ້ຮັບຟັັງການໂອ້ລົມຈາກທ່ານປະທານ ເພື່ອສືບຕໍ່ພາລະກິດຂອງໜ້າທີ່ການເມືອງທີ່ພັກ-ລັດ ທີ່ໄດ້ມອບໝາຍໃຫ້ນັ້ນ ທ່ານ ໄດ້ຍົກໃຫ້ເຫັນເຖິງການປະກາດແຕ່ງຕັ້ງຄັ້ງນີ້ ແມ່ນຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່  ແລະ ແມ່ນຄວາມຈຳເປັນຂອງໜ້າທີ່ວຽກງານພາຍໃນກົມກອງພ້ອມນັ້ນ ທ່ານຍັງໃດ້ເນັ້ນໃຫ້ບັນດາສະຫາຍທີ່ໄດ້ຮັບການແຕ່ງຕັ້ງໃໝ່ ຕະຫຼອດຮອດພະນັກງານວິຊາການທີ່ຂື້ນກັບ ຈົ່ງໄດ້ເພີ່ມທະວີເຕົ້າໂຮມຄວາມສາມັກຄີປອງດອງເປັນປຶກແຜ່ນ, ສືບຕໍ່ປະຕິບັດໜ້າທີ່ດ້ວຍຄວາມຮັບຜິດຊອບສູງ, ມີຜົນສຳເລັດຍິ່ງໃຫຍ່ກ່ວາເກົ່າ ປະຕິບັດຫຼັກການລວມສູນປະຊາທິປະໄຕ ສູ້ຊົນບັນດາວຽກງານຮອບດ້ານທີ່ວາງໄວ້ນັ້ນໃຫ້ສຳເລັດຕາມແຜນການທີ່ວາງໄວ້ ພ້ອມທັງຮັບປະກັນທາງດ້ານປະລິມານ ແລະ ດ້ານຄຸນນະພາບ.