ເມືອງທ່າພະບາດ ກໍ່ເປັນເມືອງໜຶ່ງທີ່ມີກຸ່ມສ່ຽງຕໍ່ການແຜ່ລະບາດ ຂອງເຊື້ອພະຍາດຈຸລະໂລກສາຍພັນໃໝ່ covid-19 ໂດຍສະເພາະແມ່ນປະຊາຊົນພາຍໃນເມືອງ ທີ່ໄປເຮັດວຽກຢູ່ຕ່າງປະເທດທີ່ເກີດພະຍາດລະບາດ.

        ຕາມການລາຍງານຂອງ ທ່ານ ດຣ ນາງ ດວງຕາ ຄຳພິລາວົງ ອຳນວຍການໂຮງໝໍເມືອງທ່າພະບາດ ໄດ້ໃຫ້ຮູ້ວ່າ: ພາຍຫຼັງປະເທດອ້ອມຂ້າງໄດ້ມີການລະບາດ ທາງໂຮງໝໍພວກເຮົາໄດ້ກະກຽມທີມງານ, ແຕ່ງຕັ້ງຜູ້ຮັບຜິດຊອບຢ່າງລະອຽດ, ກະກຽມຫ້ອງແຍກປ່ຽວ ເພື່ອຮັບປະກັນຄວາມປອດໄພຂອງຜູ້ມານຳໃຊ້ໂຮງໝໍຂອງພວກເຮົາ, ເຊີ່ງໃນປະຈຸບັນນີ້ ໄດ້ຮັບຄົນເຈັບມາປີ່ນປົວຢູ່ໂຮງໝໍ ທີ່ມີອາການຄ້າຍຄຽງ 3 ກໍລະນີ ເຊັ່ນ: ໄອ ແລະ ເຈັບຄໍ ໃນນັ້ນມີຄົນເຈັບ 1 ຄົນ ທີ່ມີອາການເຂົ້າກັບນິຍາມຂອງ covid-19 ຈຶ່ງລາຍງານຂຶ້ນຫາໂຮງໝໍແຂວງເກັບຕົວຢ່າງສົ່ງໄປກວດຢູ່ສູນກາງ, ຜ່ານການວິເຄາະຫາເຊື້ອຈຸລະໂລກ ອອກມາເປັນຜົນລົບ, ສ່ວນຜູ້ໄດ້ຮັບການປີ່ນປົວດີທາງເມືອງໄດ້ສົ່ງເຂົ້າຫາສູນພັກຊົ່ວຄາວເພື່ອຕິດຕາມອາການຕໍ່ໄປຈົນຄົບ 14 ວັນຕາມກຳນົດ.

      ທ່ານ ດຣ ນາງ ດວງຕາ ໄດ້ລາຍງານຕື່ມອີກວ່າ: ເມືອງທ່າພະບາດ ມີສູນພັກຊົ່ວຄາວຂອງແຮງງານ ທີ່ໄປເຮັດວຽກຢູ່ປະເທດທີ່ມີການລະບາດກັບມານັ້ນ ມີຈຳນວນ 3 ຈຸດ ຄື: ມສ ທ່າພະບາດ, ມໍປາຍ ສົມສະອາດ ແລະ ໂຮງຮຽນປະຖົມທ່າບົກ, ຜ່ານການຈັດຕັ້ງປະຕິບັດ ມາຮອດປະຈຸບັນ ໄດ້ຮັບຄົນມາລົງທະບຽນເຂົ້າພັກຕິດຕາມຊົ່ວຄາວແລ້ວ ຈຳນວນ 320 ຄົນ ໂດຍແຍກເປັນແຕ່ລະກຸ່ມຍິງ-ຊາຍ ພ້ອມທັງແນະນຳວິທີຮັກສາຕົນເອງ ຖ້າມີອາການຜິດປົກກະຕິ ກໍ່ໃຫ້ລາຍງານທ່ານໝໍຜູ້ຕິດຕາມດ່ວນ, ສ່ວນບຸກຄົນທີ່ຕິດເຊື້ອຈຸລະໂລກສາຍພັນໃໝ່ covid 19 ຢູ່ເມືອງທ່າພະບາດຍັງເປັນສູນ ບໍ່ທັນມີຈັກກໍລະນີ.