ໃນວັນທີ  24 ມີນາ 2020 ທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ ປະທານຄະນະກຳມະການສະເພາະກິດຂັ້ນແຂວງ ເພື່ອປ້ອງກັນ, ຄວບຄູມ ແລະ ແກ້ໄຂການລະບາດພະຍາດອັກເສບປອດເຊື້ອຈຸລະໂລກສາຍພັນໃໝ່ ໂຄວິດ-19 ໄດ້ລົງກວດກາ, ຕິດຕາມ ສະພາບຄົນເຂົ້າ - ອອກເມືອງ ຢູ່ດ່ານສາກົນນໍ້າ - ພາວ ເມືອງຄຳເກີດ ໂດຍມີພະແນກການທີ່ກ່ຽວຂ້ອງຂັ້ນແຂວງ ທີ່ນອນຢູໃນຄະນະກຳມະການຂັ້ນແຂວງ ແລະ ຂັ້ນເມືອງຄໍາເກີດຮ່ວມພາທາງ.

     ທ່ານ ພັນຕີ ສຸກສາຄອນ ພົງວິຈິດ ຫົວໜ້າດ່ານຕຳຫຼວດກວດກາ, ຄົນເຂົ້າອອກເມືອງ ປະຈຳດ່ານສາກົນນໍ້າພາວ ໄດ້ລາຍງານການຈັດຕັ້ງປະຕິບັດວຽກງານຄວບຄູມ, ປ້ອງກັນພະຍາດໂຄວິດ-19 ວ່າ ໄດ້ເລີ່ມປະຕິບັດມາຕັ້ງແຕ່ວັນທີ 2 ກູມພາ 2020 ໂດຍປະຕິບັດຕາມ ແຈ້ງການຂອງກົມຕຳຫຼວດກວດກາຄົນເຂົ້າ - ອອກເມືອງ ວ່າດ້ວຍການຕິດຕາມ ແລະ ຄວບຄູມພະຍາດໂຄວິດ-19, ແຈ້ງການຂອງກະຊວງສາທາລະນະສຸກ ວ່າດ້ວຍການກະກຽມຄວາມພ້ອມຮັບມືໃນການປ້ອງກັນ ແລະ ຄວບຄູມໂຄວິດ-19 ແລະ ຄໍາສັ່ງແນະນໍາ ຂອງທ່ານເຈົ້າແຂວງບໍລິຄຳໄຊ ວ່າດ້ວຍການປະຕິບັດມາດຕະການປ້ອງກັນ, ຕ້ານ, ຄວບຄູມ ແລະ ຕອບໂຕ້ການລະບາດຂອງພະຍາດໂຄວິດ-19 ໂດຍໄດ້ຕັ້ງຈຸດກວດກາສຸຂະພາບຄົນທີ່ເດີນທາງເຂົ້າ-ອອກເມືອງຢູ່ສົ້ນຂົວນໍ້າຕວງ ໂດຍມີເຈົ້າໜ້າທີ່ ຕມ 2 ທ່ານ ແລະ ເຈົ້່າໜ້າທີ່ສາທາລະນະສຸກ 3 ທ່ານ ທີ່ມີອຸປະກອນເຄື່ອງມືການແພດຄົບຊຸດ.

        ສຳລັບການເຂົ້າອອກເມືອງຢູ່ດ່ານສາກົນນໍ້າພາວ ແມ່ນອະນຸຍາດໃຫ້ລົດບັນທຸກສິນຄ້າເຂົ້າ - ອອກໄດ້ ແຕ່ໂຊເຟີແມ່ນບໍ່ອະນຸຍາດໃຫ້ເຂົ້າ ໂດຍມີການຊັບປ່ຽນໂຊເຟີ ລົດບັນທຸກສິນຄ້າທີ່ເຂົ້າມາລາວຕ້ອງໄດ້ຮັບການພົ່ນຢາຂ້າເຊື້ອ ແລະ ປ່ຽນໂຊເຟີເປັນຄົນລາວ, ສຳລັບບຸກຄົນທີ່ເຂົ້າເມືອງ ແມ່ນຮັບແຕ່ນັກສຶກສາລາວທີ່ໄປສຶກສາຕໍ່ຢູ່ຫວຽດນາມເທົ່ານັ້ນ ແລະ ວຽກລັດຖະການ ຕ້ອງໄດ້ຜ່ານການກວດກາສຸຂະພາບຈາກເຈົ້າໜ້າທີ່ທັງ 2 ດ່ານລາວ-ຫວຽດນາມ, ໄດ້ຢຸດຕິການອອກວິຊ່າຊົ່ວຄາວ ແລະ ນັກທ່ອງທ່ຽວ ເດັດຂາດບໍ່ໃຫ້ຜ່ານ, ໄດ້ພົວພັນປະສານສົມທົບກັບເຈົ້າໜ້າທີ່ດ່ານເກົາແຈວ ສສ ຫວຽດນາມ ເປັນປະຈຳ ໂດຍສະເພາະແມ່ນເວລາປິດ - ເປີດໄລຍະ 7 ໂມງ-22 ໂມງຂອງທຸກໆວັນ.

   ໂອກາດນີ້ ທ່ານຮອງເຈົ້າແຂວງບໍລິຄຳໄຊ ໄດ້ເນັ້ນໃຫ້ເຈົ້າໜ້າທີ່ທຸກພາກສ່ວນທີ່ປະຕິບັດງານຢູ່ດ່ານສາກົນນໍ້າພາວ ຈົ່ງໄດ້ໃຊ້ມາດຕະການທີ່ເດັດຂາດ, ເຂັ້ມງວດ ໂດຍອິງໃສ່ນິຕິກຳຂອງຂັ້ນເທິງວາງອອກ, ຕ້ອງໄດ້ຕິດຕາມ, ກວດກາຢ່າງລະອຽດ ທັງລົດບັນທຸກສິນຄ້າ ແລະ ຄົນທີ່ເຂົ້າ - ອອກເມືອງ, ມີການສ່ອງແສງລາຍງານເປັນປະຈຳ, ປະສານພົວພັນເຊີ່ງກັນ ແລະ ກັນ ດ້ານຂໍ້ມູນຂ່າວສານ, ເຄື່ອງມືຮັບໃຊ້ກັບເຈົ້າໜ້າທີ່ດ່ານເກົ່າແຈວ ທັ້ງນີ້ກໍ່ເພື່ອສະກັດກັ້ນ, ການແຜ່ລະບາດຂອງເຊື້ອພະຍາດ ບໍ່ໃຫ້ເກີດຂຶ້ນຢູ່ແຂວງບໍລິຄຳໄຊ.