ເພື່ອເປັນການຊຸກຍູ້ການຈັດຕັ້ງປະຕິບັດວຽກງານໃນດ້ານຕ່າງໆຢ່າງເຂັ້ມງວດ ໃນການຕ້ານ ແລະ ​ສະກັດ​ກັ້ນ ການ​ແຜ່​ລະບາດ​ເຊື້ອ​ພະຍາດ​ ໂຄ​ວິດ 19 ໃຫ້ເປັນໄປຕາມທິດທາງແຜນການທີ່ວາງໄວ້ ໃນວັນທີ 24 ມີນາ 2020 ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມດ້ວຍຄະນະ ໄດ້ລົງເຄື່ອນໄຫວ ຕິດຕາມກວດກາການຈັດຕັ້ງປະຕິບັດວຽກງານຂອງພະນັກງານແພດ ຢູ່ທີ່ໂຮງໝໍແຂວງ ບໍລິຄໍາໄຊ.  

     ທ່ານ ດຣ ບຸນຍັງ ພົມມະຈັນ ອໍານວຍການໂຮງໝໍແຂວງ ໄດ້ລາຍງານສະພາບລວມ ໃນການກະກຽມຄວາມພ້ອມໃນດ້ານຕ່າງໆ ໂດຍຫຍໍ້ໃຫ້ທ່ານເຈົ້າແຂວງ ພ້ອມດ້ວຍຄະນະ ໄດ້ຮັບຊາບ ພ້ອມທັງນໍາພາລົງເບີ່ງ ຈຸດກວດກາໃຫ້ຄໍາແນະນໍາຕໍ່ກັບພໍ່ແມ່ປະຊາຊົນ ຫ້ອງຮັບຮອງຄົນເຈັບ ຖ້າຫາກກວດພົບກໍລະນີສົງໃສຜູ້ຕິດເຊື້ອດັ່ງກ່າວ ແລະ ອື່ນໆ.   

     ທ່ານເຈົ້າແຂວງ ພ້ອມດ້ວຍຄະນະ ຍັງໄດ້ລົງໄປຕິດຕາມເບີ່ງການຈັດຕັ້ງປະຕິບັດວຽກງານ ຂອງອະນຸກໍາມະການຮັບຜິດຊອບວຽກງານ ໃນການກວດກາຄົນເຂົ້າ - ອອກເມືອງ ຂັ້ນຕອນການກວດກາ ໃນດ້ານຕ່າງໆ ຢູ່ດ່ານສາກົນປາກຊັນ - ບຶງການ  ເປັນຕົ້ນແມ່ນ ​ ການສອບຖາມປະຫວັດຂໍ້ມູນສ່ວນຕົວຂອງນັກເດີນທາງ ສະຖານທີ່ພັກຢູ່ອາໃສ, ການວັດອຸນຫະພຸມ, ການແນະນໍາຄວາມຮູ້ເບື້ອງຕົ້ນໃຫ້ກັບຜູ້ທີ່ເດີນທາງເຂົ້າເມືອງ, ວິທີການ ເພື່ອເຝົ້າລະວັງເຊື້ອພະຍາດດ້ວຍຕົວເອງ ແລະ ວຽກງານອື່ນໆ, ພ້ອມດຽວກັນນັ້ນທ່ານເຈົ້າແຂວງ ພ້ອມດ້ວຍຄະນະ ຍັງໄດ້ ເດີນທາງໄປເບີ່ງໂຮງຮຽນການເມືອງການປົກຄອງຫຼັງເກົ່າ-ຫຼັງໃໝ່, ໂຮງຮຽນ ປກສ ຊັ້ນຕົ້ນ ເລກ 4 ແຂວງ ບໍລິຄໍາໄຊ ເພື່ອຈະກໍານົດເອົາສະຖານທີ່ດັ່ງກ່າວ ເປັນບ່ອນພັກເຊົາຂອງຄົນເຈັບຖ້າຫາກກວດພົບກໍລະນີສົງໃສຕິດເຊື້ອ ເພື່ອເຮັດໃຫ້ຜູ້ທີ່ມີອາການ ຄ້າຍຄຽງການຕິດເຊື້ອ ໄດ້ຮັບການປິ່ນປົວທັນເວລາ  ເຊິ່ງມາຮອດປະຈຸບັນສະຖານະການຕິດເຊື້ອໂຄວິດ-19 ທົ່ວໂລກ ໄດ້ແຜ່ລະບາດແລ້ວ ໃນຫລາຍກ່ວາ 194 ປະເທດ ແລະ ມີຜູ້ຕິດເຊື້ອສະສົມທົ່ວໂລກຫລາຍກ່ວາ 378.000 ຄົນ, ເສຍຊີວິດ 16.000 ກ່ວາຄົນ ແລະ ປິ່ນປົວຫາຍດີ 100.000 ກ່ວາຄົນ.