ຕອນເຊົ້າ ວັນທີ 23 ມີນາ 2020 ນີ້ ເມືອງປາກຊັນ ແຂວງບໍລິຄໍາໄຊ ໄດ້ຈັດພິທີປິດສະຫຼຸບ ການຈັດຕັ້ງປະຕິບັດ          ຝຶກອົບຮົມ, ຫັດແອບ, ຮໍ່າຮຽນສ້າງບ້ານປ້ອມໝັ້ນສູ້ຮົບ ໃຫ້ບ້ານໜອງສາມານ ແລະ ບ້ານ ທົ່ງຫວ້ານ ກຸ່ມໂພນໄຊໃຕ້ ເມືອງປາກຊັນ ແຂວງບໍລິຄໍາໄຊ, ໂດຍການເປັນປະທານຂອງທ່ານ ແສງອາລຸນ ແສງອາພອນ ຮອງເຈົ້າເມືອງປາກຊັນ, ມີທ່ານ ພັນໂທ ສາຍເງີນ ແກ້ວຈັນທະສີນ ຮອງຫົວໜ້າຫ້ອງເສນາທິການ ກອງບັນຊາການທະຫານ ແຂວງບໍລິຄໍາໄຊ, ພັນໂທ ແກ້ວອຸດອນ ເພັງພະຈັນ ຫົວໜ້າກອງບັນຊາການທະຫານເມືອງ, ທ່ານ ພັນໂທ ທົນທະວີ ໂພຄໍາ ຮອງຫົວໜ້າກອງບັນຊາການ ປກສ ເມືອງ, ມີອໍານາດການປົກຄອງບ້ານ-ນາຍບ້ານ 16 ບ້ານ, ກໍາລັງປ້ອງກັນຊາດ-ປ້ອງກັນຄວາມສະຫງົບບ້ານ, ກອງຫຼອນບ້ານ ຕະຫຼອດຮອດພໍ່ແມ່ປະຊາຊົນ  ເຂົ້າຮ່ວມ.

ທ່ານ ພັນຕີ ແກ້ວວິໄລ ປະເສີດ ຄະນະຮັບຜິດຊອບບ້ານປ້ອມໝັ້ນສູ້ລົບ ໄດ້ຜ່ານບົດສະຫຼຸບ ການຈັດຕັ້ງປະຕິບັດ ຝຶກອົບຮົມ, ຫັດແອບ, ຮໍ່າຮຽນສ້າງບ້ານປ້ອມໝັ້ນສູ້ລົບ ໃຫ້ບ້ານ ໜອງສາມານ ແລະ ບ້ານ ທົ່ງຫວ້ານ  ກຸ່ມໂພນໄຊໃຕ້ ເມືອງປາກຊັນ ແຂວງບໍລິຄໍາໄຊ  ເຊີ່ງໄດ້ດໍາເນີນມາເປັນເວລາ 08 ວັນ ເລີ່ມແຕ່ວັນທີ 16 – 23  ມີນາ 2020 ຈຶ່ງໄດ້ປິດສະຫຼຸບລົງຢ່າງເປັນທາງການ, ໄດ້ຍົກໃຫ້ເຫັນສະພາບຈຸດພິເສດຂອງບ້ານ, ດ້ານດີ ໃນການຈັດຕັ້ງປະຕິບັດວຽກງານຕົວຈິງ, ເຫັນວ່າອໍານາດການປົກຄອງບ້ານ, ພໍ່ແມ່ປະຊາຊົນ ແມ່ນມີຄວາມຕື່ນຕົວ ເອົາໃຈໃສ່ປະຕິບັດໜ້າທີ່ວຽກງານຕາມການມອບໝາຍ ແລະ ເຂົ້າຮ່ວມໃນການ ຝຶກອົບຮົມ, ຫັດແອບ, ຮໍ່າຮຽນສ້າງບ້ານປ້ອມໝັ້ນສູ້ລົບ ໃນຄັ້ງນີ້ເປັນຢ່າງດີ, ບັນດາຄະນະພັກບ້ານ,  05 ໜ່ວຍງານຂອງບ້ານ ກໍ່ໄດ້ເຮັດໜ້າທີ່ວຽກງານຂອງຕົນ ໃນການເປັນເສນາທິການໃຫ້ເລຂາພັກບ້ານ, ອໍານາດການປົກຄອງບ້ານ ເພື່ອກຽມພ້ອມ ແລະ ຮັບມືກັບສະພາບການທີ່ອາດຈະເກີດຂື້ນ, ສ່ວນພາກສະໜາມ ບັນດາອ້າຍນ້ອງກອງຫຼອນ ແລະ ປກສ ບ້ານ ແຕ່ລະສະຫາຍ ແມ່ນໄດ້ເອົາໃຈໃສ່ປະຕິບັດໜ້າທີ່ ຕໍ່ການຝຶກຊ້ອມ, ຮໍ່າຮຽນໃນແຕ່ລະວັນເຖິງວ່າຈະພົບຄວາມຫຍຸ້ງຍາກລໍາບາກ, ກໍ່ບໍ່ມີສະຫາຍໃດຈົ່ມວ່າ, ແຕ່ລະສະຫາຍຕ່າງກໍ່ມີຄວາມມານະອົດທົນຈົນສາມາດເຮັດສໍາເລັດໜ້າທີ່ຕາມແຜນການ ແລະ ລະດັບຄາດໝາຍທີ່ວາງໄວ້, ສ່ວນທາງດ້ານພະນັກງານວິຊາການ, ຄູຝຶກແຕ່ລະສະຫາຍ ກໍ່ໄດ້ເອົາໃຈໃສ່ໃນການສິດສອນ, ຖ່າຍທອດຄວາມຮູ້ຄວາມສາມາດຂອງຕົນ ໃຫ້ຜູ້ເຂົ້າຮ່ວມຝຶກອົບຮົມ, ຫັດແອບ ເຫັນວ່າເຮັດໄດ້ດີ, ມີຄວາມຖືກຕ້ອງ ແລະ ເປັນໄປຕາມບາດກ້າວຂອງການສ້າງບ້ານປ້ອມໝັ້ນສູ້ລົບ.

      ຜ່ານການຝຶກອົບຮົມ, ຫັດແອບ, ຮໍ່າຮຽນບ້ານປ້ອມໝັ້ນສູ້ລົບຕົວຈິງ ພາກການເມືອງ ຕີລາຄາໄດ້ 70%, ພາກສ້າງແຜນການ ຕີລາຄາໄດ້ 75%, ພາກຍຸດທະວິທີ  ຮຽນບຸກເຄື່ອນໄຫວຢູ່ພາກສະໜາມ, ຮຽນ 7 ຈັງຫວະພື້ນຖານອາໃສພູມີປະເທດ, ຮຽນໝວດກອງຫຼອນດັກສະກັດຕີສັດຕູຢູ່ສະໜາມ ພາກຍຸດທະວິທີຕີລາຄາໄດ້ 76%, ພາກສິນລະປະຍຸດຍິງລູກປືນແທ້ ຈໍານວນພົນເຂົ້າຮ່ວມ 50 ສະຫາຍ, ຍິງເກັ່ງ 15 ສະຫາຍ, ໄດ້ຄາດໝາຍ 35 ສະຫາຍ ຕີລາຄາໄດ້ 73,41%, ສະຫຼຸບສັງລວມຕີລາຄາທັງ 04 ພາກ ສະເລ່ຍໄດ້ 73,60%.