ວັນທີ 19 ມີນາ 2020 ນີ້ ຢູ່ທີ່ສະໂມສອນບ້ານ ໜອງປອງ ເມືອງຄຳເກີດ ແຂວງບໍລິຄຳໄຊ ໄດ້ຈັດພິທີມອບ - ຮັບ ໃບຢັ້ງຢືນ ບ້ານ ປ້ອງກັນຄວາມສະຫງົບດີ ຈຳນວນ 54 ບ້ານ ທີ່ຂຶ້ນກັບເມືອງຄຳເກີດ ໂດຍການເປັນປະທານຂອງທ່ານ ພັນໂທ ກົງຈັນ ໄຊປັນຍາ   ຫົວໜ້າກອງບັນຊາການ ປກສ ແຂວງບໍລິຄຳໄຊ, ໃຫ້ກຽດເຂົ້າຮ່ວມຂອງທ່ານ ວິໄລ ສີສະມຸດ ຮອງເຈົ້າເມືອງຄຳເກີດ, ມີພະນັກງານພາກສ່ວນທີ່ກ່ຽວຂ້ອງ, ອຳນາດການປົກຄອງບັນດາບ້ານ ແລະ ພໍ່ແມ່ປະຊາຊົນ ເຂົ້າຮ່ວມ.

          ທ່ານ ພັນໂທ ລຳເງີນ ພະບາດໄຊ ຫົວໜ້າກອງບັນຊາການ ປກສ ເມືອງຄຳເກີດ ໄດ້ຂຶ້ນຜ່ານບົດສະຫຼຸບຫຍໍ້ໃນການເຄື່ອນໄຫວປະຕິບັດການສ້າງບ້ານປ້ອງກັນຄວາມສະຫງົບດີ ໃນປີ 2019 ຜ່ານມາ ເຊີ່ງໄດ້ຍົກໃຫ້ເຫັນຜົນງານທີ່ເຮັດໄດ້ ຄື: ໄດ້ລົງແນະນຳໃຫ້ປະຊາຊົນນຳເອົາສຳເນົາປື້ມສຳມະໂນຄົວ ມາກວດກາເກັບກຳຂໍ້ມູນ ການເໜັງຕີງຂອງພົນລະເມືອງ, ຈັດຕັ້ງແບ່ງຄວາມຮັບຜິດຊອບໃຫ້ພະນັກງານວິຊາສະເພາະນຳພາກຳລັງ ປກສ ບ້ານ ເພື່ອເຄື່ອນໄຫວເກັບກຳຂໍ້ມູນສະຖິຕິໃຫ້ຖືກຕ້ອງຕາມແບບຟອມນິຕິກຳຕົວຈິງ, ປະສານສົມທົບກັບຄະນະພັກບ້ານ, ເພື່ອຄົ້ນຄ້ວາປຶກສາຫາລື ຈັດຕັ້ງປະເມີນຜົນ ແລະ ເຮັດບົດລາຍງານໃຫ້ພະແນກສຳມະໂນຄົວ ແລະ ກໍ່ສ້າງຮາກຖານ ປກສ ກຸ່ມບ້ານ ເພື່ອສະເໜີຂັ້ນເທີງອອກໃບຢັ້ງຢືນຄອບຄົວປ້ອງກັນຄວາມສະຫງົບດີໃຫ້ແກ່ບ້ານທີ່ໄດ້ຕາມມາດຖານເງື່ອນໄຂ. ໃນນີ້ ບ້ານປ້ອງກັນຄວາມສະຫງົບດີມີທັງໝົດ 54 ບ້ານ ຈຶ່ງໄດ້ຈັດຕັ້ງພິທີ ມອບໃບຢັ້ງຢືນ ບ້ານປ້ອງກັນຄວາມສະຫງົບດີ ໃຫ້ຢ່າງສົມກຽດ.