ພິມ
ໝວດ: ຂ່າວປະຈຳວັນ.
ກົດເບິ່ງ: 138

 

          ເຈົ້າໜ້າທີ່ ປກສ  ແຂວງບໍລິຄໍາໄຊ ໃຫ້ຮູ້ວ່າ: ໃນວັນທີ 15 ມີນາ 2020  ໄດ້ຮັບແຫຼ່ງຂ່າວຈາກພົນລະເມືອງດີວ່າ: ມີກຸ່ມຄົນຈຳນວນໜຶ່ງຈະມີການເຄື່ອນໄຫວ ຂົນສົ່ງ, ຄ້າ - ຂາຍ ຢາເສບຕິດ ໃສ່ລົດອອກຈາກນະຄອນຫຼວງວຽງຈັນ ມຸ້ງໜ້າມາທາງ ແຂວງບໍລິຄໍາໄຊ ພາຍຫຼັງໄດ້ຮັບແຫຼ່ງຂ່າວ  ເຈົ້າໜ້າທີ່ຈຶ່ງໄດ້ແຕ່ງຕັ້ງພະນັກງານວິຊາສະເພາະ ໂດຍສົບທົບກັບພາກສ່ວນຕ່າງໆ ອອກຕິດຕາມກວດກາ ແລະ ຈັດວາງກໍາລັງຢູ່ຕາມຈຸດຕ່າງໆ ໃນຂອບເຂດແຂວງຕາມເສັ້ນທາງເລກທີ 13 ໃຕ້, ຮອດເວລາປະມານ 16 ໂມງ 30 ນາທີ  ຂອງວັນ 18 ມີນາ 2020 ເຈົ້າໜ້າທີ່ໄດ້ພົບເຫັນລົດເປົ້າໝາຍສົງໃສ 02 ຄັນ ແລ່ນດ້ວຍຄວາມໄວສູງ  ຈຶ່ງໄດ້ໄລ່ຕິດຕາມລົດ ດັ່ງກ່າວໄປ ຄື: ລົດກະບະຍີຫໍ້ນິດສັນນາວາລ່າ ສີປອນເທົາ ໝາຍເລກທະບຽນ ກຳແພງນະຄອນ ກພ 3926 ແລະ ລົດວີໂກ່ສີຂາວໝາຍເລກທະບຽນ ກຳແພງນະຄອນ ມຫ 6868, ພໍມາຮອດເຂດບ້ານນ້ຳງຽບ ເມືອງ ປາກຊັນ ແຂວງ ບໍລິຄຳໄຊ ລົດເປົ້າໝາຍທີ່ຕ້ອງສົງໃສໄດ້ຈອດຢູ່ແຄມທາງເພື່ອຂົນສົ່ງ ເຄື່ອນຍ້າຍຢາເສບຕິດອອກຈາກລົດວີໂກ ມາໃສ່ລົດ ນິດສັນນາວາລາ ແຕ່ຖືກເຈົ້າໜ້າທີ່ນຳກຳລັງເຂົ້າສະແດງຕົວເພື່ອກວດຄົ້ນ ຈຶ່ງພົບເຫັນຂອງກາງ ມີຢາບ້າ 120 ມັດ ເທົ່າກັບ 240.000 ເມັດ, ນໍ້າໜັກ 29 ກິໂລກຼາມ, ຢາໄອ້ 60 ຫໍ່ ນໍ້າໜັກ 60 ກິໂລກຼາມ ລວມມີຢາເສບຕິດທັງໝົົດ 89 ກິໂລກຼາມ ແລະ ລົດໃຫຍ່ 02 ຄັນ ພ້ອມຈັບຕົວພວກຖືກຫາໄດ້ທັງໝົດ ຈໍານວນ 04 ຄົນ ຍິງ 02 ຄົນ ມາທຳການສືບສວນ- ສອບສວນ ດໍາເນີນຄະດີຕາມລະບຽບກົດໝາຍ.

          ຜ່ານການສືບສວນ-ສອບສວນເບື້ອງຕົ້ນ ຮູ້ວ່າ: ພວກຖືກຫາດັ່ງກ່າວ ຊື່ ທ້າວ ຢົ້ງຢ່າງ ອາຍຸ 37 ປີ ອາຊີບ ຄ້າ-ຂາຍ  ຢູ່ບ້ານ ຫ້ວຍຫົງ ເມືອງ ໄຊເສດຖາ ນະຄອນຫຼວງວຽງຈັນ, ທ້າວ ໄມຊົ່ງ ອາຍຸ 27 ປີ ອາຊີບ ປະຊາຊົນ ຢູ່ບ້ານ ໂພນຄຳ ເມືອງ ໄຊຈຳພອນ, ນາງ ຕົງຊົ່ງ ອາຍຸ 30 ປີ ອາຊິບ ຄ້າ-ຂາຍ ຢູ່ບ້ານ ທົ່ງນາມີ ເມືອງ ປາກກະດິງ, ນາງ ມໍວ່າງ ອາຍຸ 21 ປີ ອາຊີບ ຄ້າ-ຂາຍ ຢູ່ບ້ານ ໜອງປາດ ເມືອງ ວຽງທອງ ທັງ 03 ຢູ່ແຂວງ ບໍລິຄຳໄຊ ພວກກ່ຽວທັງ 04 ຍອມຮັບສາລະພາບວ່າ: ຢາບ້າ ແລະ ຢາໄອ້ ຈຳນວນດັ່ງກ່າວແມ່ນເປັນຂອງພວກກ່ຽວແທ້ ເຊີ່ງໄດ້ຮັບມາຈາກພວກຮ່ວມຂະບວນການ.

       ປະຈຸບັນຄະດີຍັງຢູ່ໃນຂັ້ນຕອນການສືບສວນ-ສອບສວນ ຂະຫຍາຍຜົນເພື່ອຊອກຫາ ກຸ່ມແກ້ງ ພວກຮ່ວມຂະບວນການມາດໍາເນີນຄະດີຕາມລະບຽບກົດໝາຍຢ່າງເຂັ້ມງວດ.