ໃນຕອນບ່າຍຂອງວັນທີ 13 ກຸມພາ 2020 ທ່ານ ນວນສະຫວັນ ແສງມະນີ ຮອງປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ລົງໄປເຄື່ອນໄຫວກວດກາເຂດຈຸດສຸມພັດທະນາບ້ານນ້ຳອ້ອນ ໂດຍການນຳພາທາງຂອງທ່ານ ກອງສີ ໄຊຍະວົງ ຮອງເຈົ້າເມືອງ-ເມືອງໄຊຈຳພອນ.

          ທ່ານ ກອງສີ ໄຊຍະວົງ ໄດ້ໃຫ້ສຳພາດວ່າ: ປະຈຸບັນ ໂຄງການພັດທະນາຜັງເມືອງໃໝ່ບ້ານນ້ຳອ້ອນນີ້ ແມ່ນສຳເລັດແລ້ວ 70% ເປັນຕົ້ນ ຫ້ອງວ່າການ, ຫ້ອງການຖະແຫຼງຂ່າວ, ຫ້ອງການສຶກສາ, ກະສິກຳ, ຫໍພັກຍິງ-ຊາຍ, ເຮືອນພັກການນຳ, ຫ້ອງການໄຟຟ້າ, ໂຮງໝໍ, ນ້ຳປະປາ ແມ່ນສຳເລັດແລ້ວ 50%, ປກສ 70%, ປະຈຸບັນ ຍັງສືບຕໍ່ໃນການວາງແຜນປັບປຸງໃຫ້ສົມບູນແບບ ຈັດສັນບ້ານເຮືອນໃຫ້ປະຊາຊົນເພື່ອຄວາມຈົບງາມ, ສຳລັບການຍົກຍ້າຍ ແມ່ນລໍຖ້າການປັບປຸງເສັ້ນທາງແຕ່ບ້ານໂພນສີ ຫານ້ຳອ້ອນສຳເລັດ ຈຶ່ງຈະໄດ້ຍົກຍ້າຍ. ທ່ານຍັງກ່າວອີກວ່າ ນີ້ກໍ່ຍ້ອນຄວາມເປັນຫ່ວງເປັນໄຍ ທາງຄະນະພັກການນຳຂັ້ນສູນກາງ-ແຂວງ-ເມືອງ ເຫັນໄດ້ເຖິງຄວາມສຳຄັນຂອງການພັດທະນາປະເທດຊາດ ກໍ່ຄືເມືອງໄຊຈຳພອນ ເພື່ອເຮັດໃຫ້ເມືອງໄຊຈຳພອນມີບາດກ້າວຂະຫຍາຍຕົວດີຂຶ້ນ.

ການລົງເຄື່ອນໄຫວຕິດຕາມກວດກາການຈັດຕັ້ງປະຕິບັດວຽກງານເຂດພັດທະນາບ້ານນ້ຳອ້ອນໃນຄັ້ງນີ້ ທ່ານ ນວນສະຫວັນ ແສງມະນີ ພ້ອມຄະນະ ຍັງໄດ້ພົບປະຢ້ຽມຢາມພໍ່ແມ່ປະຊາຊົນເຂດດັ່ງກ່າວ ພ້ອມທັງຮັບຟັງຄຳເໜີຂອງພໍ່ແມ່ປະຊາຊົນ ເປັນຕົ້ນແມ່ນຢາປິ່ນປົວພະຍາດຍັງບໍ່ພຽງພໍ, ຫົນທາງຍັງຫຍຸ້ງຍາກໃນການນຳຄົນເຈັບໄປປິ່ນປົວຢູ່ເມືອງ-ແຂວງ ແລະ ບັນຫາອື່ນໆທີ່ເຫັນວ່າຍັງພົບຄວາມຫຍຸ້ງຍາກ. ຈາກນັ້ນ ຄະນະ ຍັງໄດ້ເລາະເບິ່ງສະພາບຕົວຈິງພາຍໃນເຂດດັ່ງກ່າວ ເປັນຕົ້ນໂຮງໝໍ ແລະ ຄວາມຄືບໜ້າຂອງການກໍ່ສ້າງໂຮງຮຽນອະນຸບານບ້ານນ້ຳອ້ອນ. ສສຂ ຍັງໄດ້ມອບປື້ມຂຽນຈຳນວນໜຶ່ງ ໃຫ້ແກ່ທ່ານຮອງເຈົ້າເມືອງ ເພື່ອຈະໄດ້ນຳໄປມອບຕໍ່ໃຫ້ບັນດາໂຮງຮຽນທີ່ຢູ່ຫ່າງໄກສອກຫຼີກ.