ເພື່ອເປັນການປັບປຸງລະບົບກົງຈັກການຈັດຕັ້ງຂັ້ນນຳພາ-ບັນຊາ ໃຫ້ຖືກຕ້ອງສອດຄ່ອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ກໍ່ຄືວຽກງານວິຊາສະເພາະໃນໄລຍະໃໝ່ ຕອນເຊົ້າວັນທີ 13 ກຸມພາ 2020 ນີ້ ປກສ ແຂວງບໍລິຄຳໄຊ ໄດ້ປະກາດແຕ່ງຕັ້ງນາຍຕຳຫຼວດຂັ້ນນຳພາ-ບັນຊາ ຢູ່ທີ່ຫ້ອງປະຊຸມໃຫຍ່ຂອງກອງບັນຊາການ ປກສ ແຂວງບໍລິຄຳໄຊ ໂດຍການເປັນປະທານຂອງທ່ານ ພັນໂທ ກົງຈັນ ໄຊປັນຍາ ວ່າການເລຂາຄະນະພັກ ຮັກສາການຫົວໜ້າກອງບັນຊາການ ປກສ ແຂວງບໍລິຄຳໄຊ, ມີຄະນະພັກ, ຄະນະຫ້ອງ, ປກສ ເມືອງ, ຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ.

          ທ່ານພັນໂທ ອວດ ວົງໄຊ ຫົວໜ້າຫ້ອງການເມືອງ ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນຄວາມສະຫງົບ ວ່າດ້ວຍການໂຍກຍ້າຍ ນາຍຕຳຫຼວດ ທີ່ຂຶ້ນກັບກອງບັນຊາການ ປກສ ແຂວງບໍລິຄຳໄຊ ສະບັບເລກທີ 427/ປກສ, ລົງວັນທີ 07 ກຸມພາ 2020 ໃນນີ້ ຕົກລົງໂຍກຍ້າຍ ພັນໂທ ດວງໄຊ ຈັນທະວັງໂສ ຈາກກອງບັນຊາການ ປກສ ເມືອງຄຳເກີດ ໄປຮັບໜ້າທີໃໝ່ຢູ່ກອງບັນຊາການ ປກສ ເມືອງທ່າພະບາດ, ຈາກນັ້ນ ຍັງໄດ້ຜ່ານຂໍ້ຕົກລົງຂອງກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງນາຍຕຳຫຼວດ ທີ່ຂຶ້ນກັບກອງບັນຊາການ ປກສ ແຂວງບໍລິຄຳໄຊ ສະບັບເລກທີ 428/ປກສ ລົງວັນທີ 07 ກຸມພາ 2020 ໂດຍແຕ່ງຕັ້ງ ພັນໂທ ສຸກສະຫວັນ ບຸບຜາພັນ ເປັນຫົວໜ້າຫ້ອງສັນຕິບານ ແລະ ພັນໂທ ສີຂັນໄຊ ໄຊມົນຕີ ເປັນຮອງ, ແຕ່ງຕັ້ງ ພັນໂທ ດວງໄຊ ຈັນທະວັງໂສ ເປັນຫົວໜ້າກອງບັນຊາການ ປກສ ເມືອງທ່າພະບາດ, ແຕ່ງຕັ້ງ ທ່ານ ພັນຕີ ດາພອນ ໄພມະນີ ເປັນຮອງກອງບັນຊາການ ປກສ ເມືອງຄຳເກີດ.

         ທ່ານ ພັນໂທ ກົງຈັນ ໄຊປັນຍາ ໄດ້ມີຄຳເຫັນໂອລົມ ເຊີ່ງທ່ານໄດ້ເນັ້ນໜັກບັນດາສະຫາຍທີ່ມີການໂຍກຍ້າຍຊັບຊ້ອນແຕ່ງຕັ້ງໜ້າທີໃໝ່ໃນຄັ້ງນີ້ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ ສຸມສະຕິປັນຍາ, ຄວາມຮູ້-ຄວາມສາມາດຂອງຕົນເຂົ້າໃນການຊີ້ນຳ-ນຳພາວຽກງານທີ່ໄດ້ມອບໝາຍ ໃຫ້ມີຜົນງານພົ້ນເດັ່ນ, ເພີ່ມທະວີສຶກສາອົບຮົມແນວຄິດ, ພໍ່-ແມ່ປະຊາຊົນໃຫ້ມີຄວາມອຸ່ນອຽນທຸ່ນທ່ຽງ ເພີມທະວີຄວາມສາມັກຄີພາຍໃນໃຫ້ເປັນປຶກແຜ່ນ ແລະ ສາມັກຄີກັບພາຍນອກໃຫ້ກ້ວາງຂວາງແໜ້ນແຟ້ນ, ຕ້ານ ແລະ ສະກັດກັ້ນທຸກປະກົດການຫຍໍ້ທໍ້ທີ່ອາດຈະເກີດຂຶ້ນໃຫ້ທັນເວລາ, ເຮັດໃຫ້ຂອບເຂດຄວາມຮັບຜິດຊອບຂອງຕົນ ມີຄວາມເປັນລະບຽບຮຽບຮ້ອຍຢ່າງໜັກແໜ້ນ.