ໃນຕອນເຊົ້າຂອງວັນທີ່ 13 ກຸມພາ 2020 ຢຸ່ຫ້ອງວ່າການເມືອງໄຊຈໍາພອນ ທ່ານ ນວນສະຫວັນ ແສງມະນີ ກໍາມະການພັກແຂວງ ຮອງປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ເດີນທາງມາເຄື່ອນໄຫວຕິດຕາມກວດກາວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຢູ່ເມືອງໄຊຈໍາພອນ.

     ທ່ານ ກອງສີ ໄຊຍະວົງ ຮອງເຈົ້າເມືອງ ໄດ້ລາຍງານ ການຈັດຕັ້ງປະຕິບັດແຜນພັດທະນາຊົນນະບົດ ແລະ ລຶບລ້າງຄວາມທຸກຍາກຂອງເມືອງ ແລະ ແຜນພັດທະນາເສດຖະກິດ-ສັງຄົມຈຸດສຸມນໍ້າອ້ອນວ່າ: ເມືອງໄຊຈໍາພອນ ຍັງຮັກສາຄວາມສະຫງົບໄດ້ໂດຍພື້ນຖານ, ພະນັກງານ, ປະຊາຊົນ ແມ່ນມີແນວຄິດອຸ່ນອຽນທຸ່ນທ່ຽງ ເຊື່ອໝັ້ນຕໍ່ການຊີ້ນໍາ-ນໍາພາຂອງພັກ-ລັດ ເຊິ່ງເມືອງໄຊຈໍາພອນເປັນເມືອງທີ 7 ຂອງແຂວງບໍລິຄໍາໄຊ ເປັນເມືອງພູດອຍ ເນື້ອທີ່ກວມ 95%  ເປັນພູຜາ, ຫ່າງຈາກເທດສະບານແຂວງເກືອບ 300 ກິໂລແມັດ ຊື່ງໄດ້ຮັບການສ້າງຕັ້ງຂຶ້ນຕາມດຳລັດຂອງນາຍົກລັດຖະມົນຕີສະບັບເລກທີ 125/ນຍ ລົງວັນທີ 11 ພຶດສະພາ 2009 ໂດຍມີເນື້ອທີ່ທັງໝົດ 2.265 ກມ2 ປະກອບມີ 10.817 ຄົນ ຍິງ 5.140 ຄົນ. ການພັດທະນາເສດຖະກິດ-ສັງຄົມ ໄດ້ຖືເອົາການສົ່ງເສີມການຜະລິດເປັນສິນຄ້າສ້າງລາຍຮັບໃຫ້ປະຊາຊົນ ເຫັນໄດ້ວ່າ ນັບມື້ນັບດີຂຶ້ນເປັນກ້າວໆ ເປັນຕົ້ນແມ່ນ ການກໍ່ສ້າງພື້ນຖານໂຄງລ່າງ, ອາຄານ, ສະຖານທີ່, ຖະໜົນຫົນທາງເຂົ້າເຖິງບ້ານ, ບ້ານມີໄຟຟ້າໃຊ້ 17 ບ້ານ ກວມ 100% ແຕ່ລະບ້ານມີລະບົບນໍ້າລິນ, ລະບົບໂທລະຄົມມະນາຄົມ ກວມເອົາ 70-80% ຂອງພື້ນທີ່, ປະຊາຊົນສ່ວນໃຫຍ່ແມ່ນເຮັດອາຊີບກະສິກໍາ ເປັນຕົ້ນແມ່ນເຮັດນາ, ເຮັດໄຮ່ ແລະ ລ້ຽງສັດ, ມາຮອດປະຈຸບັນ ມີເນື້ອທີ່ນາທັງໝົດ 975 ເຮັກຕ່າ, ເນື້ອທີ່ໄຮ່ 373 ເຮັກຕ່າ ລວມຜົນຜະລິດເຂົ້າທັງໝົດ 3.338.77 ໂຕ່ນ ຄິດໄລ່ສະເລ່ຍຫົວຄົນ 304 ກິໂລ/ຄົນ/ປີ, ການລ້ຽງສັດກໍ່ນັບມື້ນັບເພີ່ມຂຶ້ນ ເຊັ່ນ: ມີຄວາຍ 2.774 ໂຕ, ນອກນັ້ນກໍ່ມີໝູ ແລະ ສັດປີກເຊິ່ງເຮັດໃຫ້ການສະໜອງຊີ້ນໃນການບໍລິໂພກແຕ່ລະປີເພີ່ມຂຶ້ນ.

     ໃນປີ 2019 ການລົງທຶນຂອງລັດຂັ້ນເມືອງຄຸ້ມຄອງ ມີ 26 ໂຄງການ ມີມູນຄ່າທັງໝົດ 153, 391 ຕື້ກ່ວາກີບ, ມູນຄ່າປະຕິບັດໃນປີ 7, 065 ຕື້ກ່ວາກີບ ໃນນັ້ນ ທຶນປົກກະຕິ ມີ 24 ໂຄງການ ເຊິ່ງມີມູນຄ່າ 149, 941 ຕື້ກ່ວາກີບ ມູນຄ່າປະຕິບັດໃນປີ 2018 ປະຕິບັດໄດ້ 8 ຕື້ກ່ວາກີບ, ໃນປີ 2019 ປະຕິບັດໄດ້ 6 ຕື້ກ່ວາກີບ ມີໂຄງການສືບຕໍ່ 26 ໂຄງການ, ໂຄງການລົງທຶນຂອງລັດໃນຮ່ວງພັດທະນາຊົນນະບົດ ແລະ ລຶບລ້າງຄວາມທຸກຍາກ ມີຄື: ໂຄງການຈັດສັນພູມລໍາເນົາ ( ບ່ອນທໍາມາຫາກິນ) ຕໍ່ເຕີມໂຮງຮຽນປະຖົມບ້ານສົບຂອນມູນຄ່າລວມ 350 ລ້ານກີບ, ໂຄງການສືບຕໍ່ກໍ່ສ້າງໂຮງໝໍພ້ອມທັງອຸປະກອນຄົບຊຸດ ເມືອງໄຊຈໍາພອນມູນຄ່າ 3 ຕື້ກ່ວາກີບ, ໂຄງການສ້ອມແປງເສັ້ນທາງເທດສະບານເມືອງໄຊຈໍາພອນ ບ້ານໂພນສີ ມູນຄ່າ  600 ລ້ານກ່ວາກີບ. ບັນດາພື້ນຖານໂຄງລ່າງເສັ້ນທາງຍັງສືບຕໍ່ໂຄງການກໍ່ສ້າງທາງປູຫີນແຮ່ແຕ່ເມືອງວຽງທອງ-ໄຊຈໍາພອນ ມີຄວາມຍາວ 65 ກ່ວາ ກມ ສາມາດຈັດຕັ້ງປະຕິບັດໄດ້ 91, 11% ປະຈຸບັນບໍລິສັດສືບຕໍ່ກໍ່ສ້າງຄອງລະບາຍນໍ້າທັງສອງຝາກທາງເພື່ອປ້ອງກັນການເຊາະເຈື່ອນ ແລະ ຕິດຕັ້ງຫຼັກໝາຍໃສ່ປາກທໍ່, ພະແນກໂຍທາທິການ ແລະ ຂົນສົ່ງແຂວງ ໄດ້ປະສານກັບກຸ່ມບໍລິສັດດວງຈະເລີນ ສົມທົບກັບວິຊາການຫ້ອງການ ຍທຂ ເມືອງລົງສໍາຫຼວດແລວທາງເພື່ອກໍ່ສ້າງທາງດິນແດງອັດແໜ້ນ ໂພນສີ-ນໍ້າອ້ອນ, ການສຶກສາ ແລະ ສາທາລະນະສຸກໄດ້ກວມເອົາທຸກບ້ານ ທົ່ວເມືອງມີໂຮງຮຽນ 23 ແຫ່ງ ໃນນັ້ນ ອານຸບານ 2 ແຫ່ງ, ປະຖົມ 17 ແຫ່ງ, ມັດທະຍົມຕອນຕົ້ນ 2 ແຫ່ງ, ມັດທະຍົມສົມບູນ 2 ແຫ່ງ ມີນັກຮຽນທັງໝົດ 2,962 ຄົນ ຍິງ 1.332 ຄົນ.