ເພື່ອແນ່ໃສ່ເຮັດໃຫ້ຮາກຖານບ້ານ, ເມືອງ, ກໍ່ຄືທົ່ວແຂວງ ໃຫ້ມີຄວາມສະຫງົບ, ມີຄວາມເປັນລະບຽບຮຽບຮ້ອຍດີ ເປັນຕົ້ນແມ່ນບັນດາຮາກຖານ, ບ້ານ ທີ່ເປັນຈຸດສູມຫຼໍ່ແຫຼມ ແລະ ມີບັນດາປະກົດການຫຍໍ້ທໍ້ທີ່ອາດຈະເກີດຂື້ນ, ດັ່ງນັ້ນ ທາງຄະນະພັກຂັ້ນເທີງຈຶ່ງເຫັນໄດ້ຄວາມສຳຄັນກັບບັນຫາດັ່ງກ່າວ, ໄດ້ແຕ່ງຕັ້ງບັນດາພະນັກງານນັກຮົບ, ພະນັກງານພາກສ່ວນທີ່ກ່ຽວຂ້ອງ ໄປປະຈຳການຢູ່ ຮາກຖານທ້ອງຖິ່ນຂອງແຂວງ ລົງໃກ້ຊິດຕິດແທດກັບພໍ່ແມ່ປະຊາຊົນບັນດາເຜົ່າ, ນໍາເອົາແນວທາງນະໂຍບາຍຂອງພັກ-ລັດ, ຂັ້ນເທິງ ແລະ ເອກະສານທີ່ສຳຄັນໄປຈັດຕັ້ງເຊື່ອມຊືມເຜີຍແຜ່ໃຫ້ເຂົາເຈົ້າຮັບຮູ້ ພ້ອມກັນຈັດຕັ້ງປະຕິບັດໃຫ້ເຂັ້ມງວດ, ປະກອບສ່ວນເຂົ້າໃນວຽກງານ ປກຊ-ປກສ ເພື່ອເຮັດໃຫ້ບ້ານຂອງຕົນມີຄວາມມສະຫງົບສຸກໂດຍພື້ນຖານ, ຕີຖອຍທຸກປະກົດການຫຍໍ້ທໍ້ຕ່າງໆທີ່ເກີດຂື້ນຢູ່ຕາມຈຸດດັ່ງກ່າວ.

   ສະນັ້ນ, ໃນທ້າຍອາທິດທີ່ຜ່ານ ຄະນະພັກກອງບັນຊາການ ປກສ ແຂວງບໍລິຄຳໄຊ ຈື່ງໄດ້ຕົກລົງຖອນ ແລະ ແຕ່ງຕັ້ງພະນັກງານກອງບັນຊາການ ປກສ ແຂວງ ລົງກໍ່ສ້າງຮາກຖານການເມືອງ ປະຈຳຢູ່ຈຸດຫຼໍ່ແຫຼມຂອງແຂວງ ໂດຍອີງໃສ່ມະຕິຕົກລົງຂອງຄະນະປະຈຳພັກແຂວງ ສະບັບເລກທີ 794/ຄປພ.ຂບຊ ລົງວັນທີ 21 ມີຖຸນາ 2018 ວ່າດ້ວຍການແຕ່ງຕັ້ງ, ຫົວໜ້າ, ຮອງຫົວໜ້າ  ແລະ ພະນັກງານກໍ່ສ້າງຮາກຖານການເມືອງ ທີ່ມາຈາກສູນກາງ, ແຂວງ, ເມືອງ ປະຈຳຢູ່ຈຸດຫຼໍ່ແຫຼມຂອງແຂວງ ປະຈຳປີ 2018-2019 ໂດຍການເປັນປະທານຂອງທ່ານ ພັນໂທ ໄຊຍະສຸກ ຫຼຽນຕະກຸນ ຫົວໜ້າຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ປກສ ແຂວງ, ມີອຳນາດການປົກຄອງບ້ານ, ພະນັກງານກໍ່ສ້າງຮາກຖານ ປະຈຳຢູ່ເຂດ ບ້ານພູຄຳ ເມືອງບໍລິຄັນ ແຂວງບໍລິຄຳໄຊ ເຂົ້າຮ່ວມ.

          ທ່ານພັນຕີ ທອງວັນ ວົງສຳພັນ ຮອງ ພະແນກ ປກສ ກຸ່ມບ້ານ ຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ປກສ ແຂວງ ໄດ້ຜ່ານມະຕິຕົງລົງ ຂອງຄະນະພັກປະຈຳພັກແຂວງບໍລິຄຳໄຊສະບັບເລກທີ04/ຄປພ.ຂບຊ ລົງທີ 10 ມັງກອນ 2020 ດ້ວຍການຖອນພະນັກງານ ປກສ ແຂວງ ທີ່ສຳເລັດການລົງກໍ່ສ້າງຮາກຖານການເມືອງ ປະຈໍາຢູ່ເຂດຈຸດຫຼໍ່ແຫຼມຂອງແຂວງ ຈຳນວນ 07 ສະຫາຍ ກັບຄືນກົມກອງ ແລະ ແຕ່ງຕັ້ງ ພະນັກງານກອງບັນຊາການ ປກສ ແຂວງ ລົງກໍ່ສ້າງຮາກຖານການເມືອງ ປະຈຳຢູ່ຈຸດຫຼໍ່ແຫຼມຂອງແຂວງ ຈຳນວນ 07 ສະຫາຍ, ໃນໂອກາດດຽວກັນ ທ່ານ ພັນໂທ ໄຊຍະສຸກ ຫຼຽນຕະກຸນ ກໍ່ໄດ້ໃຫ້ກຽດໂອ້ລົມ ເຊິ່ງທ່ານໄດ້ກ່າວສະແດງຄຳຍ້ອງຍໍຊົມເຊີຍບັນດາສະຫາຍທີ່ສຳເລັດການລົງປະຕິບັດໜ້າທີ່ວຽກງານໃນໜື່ງປີຜ່ານມາ  ພ້ອມທັງໄດ້ເນັ້ນໜັກໃຫ້ບັນດາສະຫາຍທີໄດ້ຮັບການແຕ່ງຕັ້ງລົງເຮັດວຽກງານກໍ່ສ້າງຮາກຖານການເມືອງໃນຄັ້ງນີ້ ຈົ່ງເອົາໃຈໃສ່ປະສານສົມທົບກັນຢ່າງກົມກຽວໃນທຸກບາດກ້າວຂອງການປະຕິບັດໜ້າທີ່ວຽກງານ ເພື່ອຮັບປະກັນໄດ້ເຖິງຜົນສໍາເລັດຕາມລະດັບຄາດໝາຍທີ່ວາງໄວ້ ແລະ ສາມາດຮັບປະກັນເຮັດໃຫ້ຈຸດຫຼຸໍ່ແຫຼມຕ່າງໆຂອງແຂວງໃຫ້ມີຄວາມສະຫງົບ, ຕີຖອຍທຸກບັນຫາປະກົດການຫຍໍ້ທໍ້ຕ່າງໆ ແລະ ແກ້ໄຂຕໍ່ກັບບັນດາເປົ້າໝາຍທີ່ຈະກໍ່ຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍທາງດ້ານສັງຄົມໃຫ້ໝົດໄປ.