ຕອນເຊົ້າ ວັນທີ 11 ກຸມພາ 2020 ນີ້, ຢູ່ທີ່ຫ້ອງປະຊຸມໃຫຍ່ກອງບັນຊາການ ປກສ ແຂວງບໍລິຄໍາໄຊ ໄດ້ເປີດກອງປະຊຸມທາບທາມບຸກຄະລາກອນ ຄັ້ງທີ I ທີ່ຈະສະໝັກປ່ອນບັດເລືອກຕັ້ງ ໃນກອງປະຊຸມໃຫຍ່ ຄັ້ງທີ III ຂອງຄະນະພັກກອງບັນຊາການ ປກສ ແຂວງບໍລິຄໍາໄຊ, ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງບໍລິຄໍາໄຊ.

          ການເປີດກອງປະຊຸມທາບທາມບຸກຄະລາກອນໃນຄັ້ງນີ້  ກໍ່ເພື່ອເຮັດໃຫ້ການດໍາເນີນກອງປະຊຸມໃຫຍ່ຄັ້ງທີ III ຂອງອົງຄະນະພັກກອງບັນຊາການ ປກສ ແຂວງບໍລິຄໍາໄຊ ໄດ້ດໍາເນີນໄປຢ່າງຖືກຕ້ອງ ໃນແຕ່ບາດກ້າວ, ຂັ້ນຕອນ ແລະ ລະບຽບການຂອງພັກ, ກອງປະຊຸມ ຍັງໄດ້ຮັບຟັງການເຜີຍແຜ່ເຊື່ອມຊືມເອກະສານ ຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 04/ຄລສພ ລົງວັນທີ 07 ພຶດສະພາ 2018 ວ່າດ້ວຍການກະກຽມດໍາເນີນກອງປະຊຸມໃຫຍ່ອົງຄະນະພັກກະຊວງ, ອົງການ, ແຂວງ-ນະຄອນຫຼວງ, ອົງຄະນະພັກເມືອງ-ນະຄອນ ແລະ ຮາກຖານພັກ ໃນຂອບເຂດທົ່ວປະເທດ. ເຊີ່ງໄດ້ກໍານົດຈຸດປະສົງລະດັບຄາດໝາຍ, ເນື້ອໃນການດໍາເນີນກອງປະຊຸມໃຫ່ຍຂອງພັກແຕ່ລະຂັ້ນ, ກໍານົດທິດທາງ, ໜ້າທີ່ ແລະ ບັນດາຄາດໝາຍໃຫ່ຍທີ່ຕ້ອງໄດ້ສູ້ຊົນນໍາພາໃນການຈັດຕັ້ງປະຕິບັດໃຫ້ຖືກຕ້ອງ, ສອດຄ່ອງກັບແນວທາງນະໂຍບາຍຂອງພັກ, ວິໄສທັດ ແລະ ຍຸດທະສາດການພັດທະນາເສດຖະກິດ-ສັງຄົມຂອງລັດ, ກໍານົດໄລຍະເວລາການດໍາເນີນກອງປະຊຸມໃຫຍ່ຄະນະພັກແຕ່ລະຂັ້ນ ແລະ ວິທີການຈັດຕັ້ງປະຕິບັດໃນແຕ່ລະບາດກ້າວ, ຂັ້ນຕອນ ໃຫ້ມີຄວາມຖືກຕ້ອງກັບລະບຽບການຂອງພັກວາງອອກ, ພ້ອມທັງຍົກໃຫ້ເຫັນມາດຖານ-ເງື່ອນໄຂ ຜູ້ທີ່ຈະສະໝັກຄັດເລືອກເຂົ້າເປັນຄະນະບໍລິຫານງານພັກກອງບັນຊາການ ປກສ ແຂວງບໍລິຄໍາໄຊ ຊຸດໃໝ່ ໂດຍຜູ້ທີ່ຈະສະໜັກເຂົ້າເປັນຄະນະພັກຊຸດໃໝ່ ຕ້ອງມີທັດສະນະຫຼັກໝັ້ນການເມືອງໜັກແໜ້ນ, ຈົ່ງຮັກພັກດີຕໍ່ອຸດົມການສັງຄົມນິຍົມ, ມີຄວາມບໍລິສຸດຕໍ່ຊາດ, ຕໍ່ປະຊາຊົນ, ມີບົດບາດອິດທິພົນ ໄດ້ຮັບຄວາມໄວ້ເນື້ອເຊື່ອໃຈຈາກສະມາຊິກພັກ, ມະຫາຊົນ ແລະ ປະຊາຊົນບັນດາເຜົ່າ, ມີຄວາມຊື່ສັດບໍລິສຸດຕໍ່ການຈັດຕັ້ງ, ໝູ່ຄະນະ, ມີຄວາມສາມັກຄີຮັກແພງຊ່ວຍຫຼືອເຊີ່ງກັນ ແລະ ກັນ, ມີຄວາມຮູ້ທາງດ້ານທິດສະດີການເມືອງ, ຮູ້ເຮັດວຽກງານກໍ່ສ້າງພັກ-ພະນັກງານ, ຮູ້ເຕົ້າໂຮມຄວາມສາມັກຄີພາຍໃນພັກ, ຮູ້ປຸກລະດົມຂົນຂວາຍມະຫາຊົນ, ສະມາຊິກພັກ, ພະນັກງານ-ນັກຮົບ ແລະ ປະຊາຊົນບັນດາເຜົ່າ ປະຕິບັດແນວທາງນະໂຍບາຍຂອງພັກ ແລະ ເຄົາລົບລະບຽບກົດໝາຍຂອງລັດ, ສາມາດກໍາແໜ້ນທິດສະດີມາກ-ເລນີນ ແນວທາງນະໂຍບາຍຂອງພັກ, ລະບຽບກົດໝາຍຂອງລັດເຂົ້າໃນຄວາມຮັບຜິດຊອບຂອງຕົນ, ມີຄວາມຕັດສິນໃຈເຮັດທຸກວຽກງານທີ່ການຈັດຕັ້ງມອບໝາຍໃຫ້ຢ່າງມີຫົວຄິດປະດິດສ້າງ ແລະ ມີປະສິດທິຜົນສູງ, ມີແບບແຜນວິທີນໍາພາທີ່ຖືກຕ້ອງທັນສະໄໝ, ປະຕິບັດຕາມຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ມີການແບ່ງວຽກງານ, ແບ່ງຄວາມຮັບຜິດຊອບລະຫວ່າງການນໍາພາພັກ-ລັດ, ຕ້ອງມີສຸຂະພາບແຂງແຮງດີ, ສາມາດປະຕິບັດໜ້າທີ່ໄດ້ຕະຫຼອດໃນໄລຍະສະໄໝ, ຕ້ອງແມ່ນສະມາຊິກພັກປະຊາຊົນປະຕິວັດລາວ ແລະ ເປັນສະມາຊິກພັກສົມບູນທີ່ມີອາຍຸພັກຢ່າງໜ້ອຍ 5 ປີຂື້ນໄປ.ສ່ວນເປົ້າໝາຍທີ່ຈະສະໝັກຄັດເລືອກເຂົ້າເປັນເລຂາຄະນະພັກກອງບັນຊາການ ປກສ ແຂວງ ຊຸດໃໝ່ ຕ້ອງແມ່ນຜູ້ທີ່ເຄີຍເປັນຮອງເລຂາຄະນະພັກ ຫຼື ຄະນະພັກກອງບັນຊາການ ປກສ ແຂວງມາກ່ອນ, ສ່ວນຜູ້ທີ່ຈະສະໝັກເປັນຮອງເລຂາຄະນະພັກ ປກສ ແຂວງ ຊຸດໃໝ່ ຕ້ອງແມ່ນຜູ້ທີ່ເຄີຍເປັນຄະນະປະຈໍາພັກ ຫຼື ກໍາມະການພັກກອງບັນຊາການ ປກສ ແຂວງ ມາກ່ອນ.    

          ໂອກາດດຽວກັນ ບັນດາຄະນະຮັບຜິດຊອບກອງປະຊຸມ ກໍ່ໄດ້ພັດປ່ຽນກັນຂື້ນອະທິບາຍເພີ່ມເຕີມ ກ່ຽວກັບວິທີການ, ຫຼັກການ ແລະ ຂັ້ນຕອນ ການຂີດໝາຍເອົາບຸກຄະລາກອນທີ່ຈະສະໝັກເຂົ້າເປັນຄະນະບໍລິຫານງານພັກກອງບັນຊາການ ປກສ ແຂວງ ຊຸດໃໝ່ ເພື່ອໃຫ້ມີຄວາມຖືກຕ້ອງ, ໂປ່ງໃສ່, ຍຸຕິທໍາ ແລະ ເປັນໄປຕາມລະບຽບຫຼັກການຂອງພັກ. ຫຼັງຈາກນັ້ນ ບັນດາຜູ້ແທນກອງປະຊຸມ ກໍ່ໄດ້ພ້ອມກັນປ່ອນບັດທາມທາມເອົາບຸກຄະລາກອນຊຸດໃໝ່ ຢ່າງເປັນທາງການ.