ສະຫາຍ ອາລຸນສັກ ປະທຳມະວົງ ຮອງເຈົ້າເມືອງວຽງທອງ ໄດ້ຜ່ານບົດສະຫຼຸບ​ຕີ​ລາ​ຄາ​ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ​-ສ​ັງ​ຄົມ 5 ປີຄັ້ງ​ທີ II (2014-2019) ຕໍ່ກອງປະຊຸມໃຫຍ່ອົງຄະນະພັກເມືອງວຽງທອງ ຄັ້ງທີ VII ທີ່ໄດ້ໄຂຂຶ້ນໃນວັນທີ 11 ກຸມພາ 2020 ຢູ່ຫ້ອງວ່າການເມືອງວຽງທອງ.

 ສະຫາຍໄດ້ລາຍງານວ່າ: ໃນລະຍະ 5 ປີຜ່ານມາ ເມືອງວຽງທອງມີສະຖຽນລະພາບທາງດ້ານການເມືອງ, ມີຄວາມສະຫງົບໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ຕັ້ງໜ້າແກ້ໄຂປະກົດການຫຍໍ້ທໍ້ໃຫ້ຫຼຸດໜ້ອຍຖອຍລົງ, ​ເສດຖະກິດ​ຂະ​ຫຍາ​ຍຕົວຢ່າງ​ຕໍ່​ເນື່ອງ ໂດຍການສຸມໃສ່ພື້ນຖານເສດຖະກິດໃຫ້ເຂັ້ມແຂງ, ຫຼຸດຜ່ອນຄວາມບອບບາງທາງດ້ານເສດຖະກິດ ຮັບປະກັນໃຫ້ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ ລວມຍອດຜະລິດຕະພັນພາຍໃນ (GDP) ໄລ​ຍະ 5 ປີ ປະຕິບັດໄດ້ 300 ຕື້ກ່ວາກີບ ສະເລ່ຍຕໍ່ຫົວຄົນ 1.012 ໂດລ່າ ໂຄງປະກອບທາງດ້ານເສດຖະກິດ: ກະສິກໍາກວມ 55%, ອຸດສາຫະກໍາ-ຫັດຖະກໍາກວມ 18% ແລະ ບໍລິການກວມ 25% ຂອງ GDP, ຜະລິດເຂົ້າເປືອກບັນລຸ 11 ພັນກ່ວາໂຕນ,  ສະເລ່ຍຕໍ່ຫົວຄົນ 360 ກິໂລກະລາມ/ຄົນ/ປີ, ເສດຖະກິດມີການຂະຫຍາຍຕົວ​ໃນ​ລະ​ດັບ 5,8 %, ເກັບລາຍຮັບໄດ້ທັງໝົດ 22 ຕື້ກ່ວາກີບ, ສະເລ່ຍ 4 ຕື້ກ່ວາກີບຕໍ່ປີ, ສະ​ເລ່ຍ​ໃນ​ແຕ່ລະ​ປີ​ລື່ນ​ແຜນ 10,35%,  ມີທຶນສິນເຊື່ອທັງໝົດ 32 ຕື້ກ່ວາກີບ ສາມາດປ່ອຍສິນເຊື່ອໄດ້ 21 ຕື້ກ່ວາກີບ, ລະດົມເງິນຝາກໄດ້ 16 ຕື້ກ່ວາກີບຈັດຕັ້ງປະຕິບັດໄດ້ 29 ຕື້ກ່ວາກີບ, ທຽບໃສ່ແຜນ 5 ປີປະຕິບັດໄດ້ 105%, ຜ່ານ​ມາ​ມີ 142 ​ໂຄງການ ​ໃນ​ນັ້ນ ​ແຂວງ​ຄຸ້ມ​ຄອງ 58​ ໂຄງການ​ ມູນ​ຄ່າ 3 ພັນຕື້ກ່ວາກີບ,​ ເມືອງ​ຄຸ້ມ​ຄອງ 84 ​ໂຄງການ​ມູນຄ່າ 112 ຕື້ກ່ວາກີບ, ການ​ຊ່ວຍ​ເຫຼືອລ້າ​ 11 ​ໂຄງການມູນຄ່າ 4 ຕື້ກ່ວາກີບ, ກອງ​ທຶນ​ພັດທະນາ​ບ້ານ 3​ ຕື້ກ່ວາກີບ, ກອງ​ທຶນ​ສິນ​ເຊື່ອມີຈໍານວນ 9 ບ້ານ 1 ​​ຕື້ກ່ວາກີບ.

ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ໄດ້ຢ່າງໜັກແໜ້ນ ແລະ ກ້ວາງຂວາງຕາມທິດ 3 ສ້າງ ປະຕິບັດຕາມດໍາລັດ 309, ມີຄອບຄົວພົ້ນທຸກກວມ 96,89%, ຄອບຄົວທຸກຍາກຍັງເຫຼືອ 3,11%, ບ້ານພົ້ນທຸກກວມ 70,73%, ຄອບຄົວ​ພັດທະນາກວມ 86,36%, ບ້ານພັດທະນາກວມ 24,39%, ເນື້ອທີ່ນາ 2 ພັນກ່ວາເຮັກຕາ, ສະມັດຕະພາບ 4,14 ໂຕ່ນຕໍ່ເຮັກຕາ, ເນື້ອທີ່ປູກເຂົ້າເນີນສູງ 1 ພັນ​ກ່ວາ​ເຮັກ​ຕ່າ, ສະມັດຕະພາບ 1,5 ໂຕ່ນຕໍ່ເຮັກຕ່າ, ຜົນຜະລິດເຂົ້າເປືອກໄດ້ທັງໝົດ 11 ພັນກ່ວາໂຕ່ນ, ສະເລ່ຍຕໍ່ຫົວຄົນ 3 ຮ້ອຍກ່ວາກິໂລ/ຄົນ/ປີ, ມີຊົນລະປະທານ 47 ແຫ່ງສາມາດຫົດເນື້ອທີ່ນາ 1 ພັນ​ກ່ວາເຮັກຕ່າ, ສົ່ງ​ເສີມ​ປະ​ຊາ​ຊົນ​ປູກມັນຕົ້ນ 8 ຮ້ອຍກ່ວາເຮັກຕ່າ ຜົນຜະລິດ 13 ພັນ​ກ່ວາໂຕ່ນ,​ ພືດ ແລະ ສັດອຶ່ນໆອີກຈຳນວນ​ໜຶ່ງ, ອັດຕາເຂົ້າຮຽນລວມເດັກອາຍຸ 3-5 ປີ ປະຕິບັດໄດ້ 32,97%, ອັດຕາເຂົ້າຮຽນລວມຊັ້ນປະຖົມ ບັນລຸໄດ້ 114,7% ລື່ນແຜນການ 14,7%, ອັດຕາເຂົ້າຮຽນສຸດທິຊັ້ນປະຖົມບັນລຸໄດ້ 95,3%, ອັດຕາເລື່ອນຂັ້ນ-ຈົບຊັ້ນປະຖົມປະຕິບັດໄດ້ 93,9%, ອັດຕາການປະລະຊັ້ນປະຖົມ 3,3%, ອັດຕາການປະລະການຮຽນຊັ້ນ ມ ຕົ້ນ 8,9%, ອັດຕາປະລະຊັ້ນມັດທະຍົມປາຍ 11,2%, ການ​ຮູ້​ໜັງສື​ຂອງ​ກຸ່ມປະຊາກອນ​ອາຍຸ​ 15-45 ປີ ປະຕິບັດໄດ້  94,88%, ໄດ້​​ຮັບ​ຮອງ​ເປັນ​ເມືອງ​ຈົບ​ຊັ້ນ​ມັດ​ທະ​ຍົມ​ຕົ້ນ​ບຳ​ລຸງ, ສົ່ງເສີມກິລາແຕ່ລະປະເພດຢ່າງກ້ວາງຂວາງ, ເຂົ້າ​ຮ່ວມ​ແຂ່ງ​ຂັນ​ລະ​ດັບ​ແຂວງ - ຊາດ ສາ​ມາດ​ຍາດ​ໄດ້​ປະ​ເພດ​ດີ, ສະໜອງການບໍລິການສົ່ງໄປສະນີ, ຈົດໝາຍ, ວັດຖຸສິ່ງຂອງ, ບໍລິການຮັບ-ໂອນເງິນ, ສັນຍານຮັບ-ສົ່ງໂທລະສັບ ແລະ ອີນເຕີເນັດ ກວມ 92% ພື້ນທີ່ທົ່ວ​ເມືອງເພີ່ມ​ຂຶ້ນ 15%, ລະ​ດົມ​ທຶນ​ຈາກ​ສັງ​ຄົມປຸກເຮືອນໃຫ້ຄອບຄົວອະນາຖາ​ຈຳ​ນວນ 5 ຫຼັງ.