ຕາມແຫລ່ງຂ່າວຂອງເຈົ້າໜ້າທີ່ ປກສ ເມືອງຄໍາເກີດແຂວງບໍລິຄໍາໄຊໄດ້ໃຫ້ຮູ້ວ່າ: ເວລາ 19 ໂມງຂອງວັນທີ 28 ທັນວາ 2019 ເຈົ້າໜ້າທີ່ກອງບັນຊາການທະຫານເມືອງຄໍາເກີດແຂວງບໍລິຄໍາໄຊ ໄດ້ຮັບການລາຍງານຈາກພົນລະດີວ່າ ມີບຸກຄົນຄ້າ - ຂາຍຢາເສບຕິດ ຈະເຄື່ອນຍ້າຍຢາເສບຕິດອອກຈາກເສັ້ນທາງເມືອງໄຊຈໍາພອນແຂວງບໍລິຄໍາໄຊເຂົ້າມາເມືອງຄໍາເກີດໂດຍນໍາໃຊ້ພາຫະນະປະເພດລົດຈັກເພື່ອຂົນສົ່ງໄປປະເທດໃກ້ຄຽງ.

        ພາຍຫຼັງໄດ້ຮັບແຫຼ່ງຂ່າວທາງເຈົ້າໜ້າທີ່ທະຫານຈຶ່ງໄດ້ຈັດຕັ້ງວາງກໍາລັງອອກຕິດຕາມກວດກາຢູ່ຕາມຈຸດຕ່າງໆຕາມເສັ້ນທາງເລກ 8A, ຮອດເວລາ 20 ໂມງຂອງວັນທີ 01 ມັງກອນ 2020 ຈຶ່ງພົບເຫັນຜູ້ຕ້ອງສົງໄສຈໍານວນ 01 ຄົນ ຂັບຂີ່ລົດຈັກທີ່ມີເປົາສອງໜ່ວຍມັດຕິດທ້າຍລົດຈັກແລ່ນມຸ່ງໜ້າເຂົ້າມາເມືອງຄໍາເກີດ, ເມື່ອມາຮອດສົ້ນຂົວບ້ານຫຼັກ 12 ເມືອງຄໍາເກີດເຈົ້າໜ້າທີ່ຈຶ່ງໄດ້ຈັດຕັ້ງກໍາລັງລັດລົດຈັກຄັນດັ່ງກ່າວເພື່ອກວດກາ, ໃນເວລາດຽວກັນ ຜູ້ຕ້ອງສົງໄສໄດ້ຖິ້ມລົດລົງແຄມທາງ ແລ້ວເອົາຕົວຫຼົບໜີແລ່ນເຂົ້າໄປໃນປ່າ, ຈາກນັ້ນ ເຈົ້າໜ້າທີ່ທະຫານຈຶ່ງໄດ້ເຂົ້າໄປກວດຄົ້ນລົດຈັກຄັນດັ່ງກ່າວ ເປັນລົດຈັກເວບ 100 ສີປອນ-ດໍາບໍ່ຕິດແຜ່ນປ້າຍທະບຽນ, ສ່ວນເລກຈັກ - ເລກຖັງ ຖືກລຶບອອກ, ມີເປົາ 02 ໜ່ວຍມັດຕິດຢູ່ທ້າຍລົດຈັກເປັນເປົາເປ້ 01 ໜ່ວຍ, ເປົາສີຂາວ 01 ໜ່ວຍ ບັນຈຸຢາໄອ໋ຈໍານວນ 25 ຫໍ່, ນໍ້າໜັກ 31 ກິໂລກຼາມ.

        ເຈົ້າໜ້າທີ່ທະຫານ ຈຶ່ງນໍາເອົາເຄື່ອງຂອງກາງຄະດີທັງໝົດ ມາສົ່ງມອບໃຫ້ເຈົ້າໜ້າທີ່ ປກສ ເມືອງຄໍາເກີດແຂວງບໍລິຄໍາໄຊ ເພື່ອທໍາການສືບສວນ - ສອບສວນຂະຫຍາຍຜົນຫາຜູ້ເປັນເຈົ້າຂອງລົດຈັກ ແລະ ຜູ້ທີ່ເປັນເຈົ້າຂອງຢາໄອ໋ຈໍານວນດັ່ງກ່າວມາດໍາເນີນຄະດີຕາມລະບຽບກົດໝາຍ.