ທ່ານ ຄຳພັດ ສຸລິຂັນ ວ່າການເລຂາພັກເມືອງ-ເຈົ້າເມືອງໄຊຈຳພອນ ໄດ້ຜ່ານບົດສະຫຼຸບວຽກງານພົ້ນເດັ່ນຮອບດ້ານ ປະຈຳປີ 2019  ຜ່ານມາ ຕໍ່ກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄໍາໄຊ ຄັ້ງທີ 14 ສະໄໝ ທີ VI ທີ່ໄດ້ໄຂຂຶ້ນໃນວັນທີ 08 ມັງກອນ 2020 ຢູ່ຫ້ອງປະຊຸມຫ້ອງວ່າການປົກຄອງແຂວງ.

          ເມືອງໄຊຈໍາພອນ ຍັງສືບຕໍ່ມີຄວາມສະຫງົບໂດຍພື້ນຖານ ສັງຄົມມີຄວາມເປັນລະບຽບຮຽບຮ້ອຍ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ຍັງມີຄວາມອຸ່ນອຽນທຸ່ນທ່ຽງເຊື່ອໝັ້ນຕໍ່ການນໍາພາຂອງພັກ, ການພັດທະນາເສດຖະກິດ-ສັງຄົມນັບມື້ນັບຂະຫຍາຍຕົວຢ່າງຕໍ່ເນື່ອງ. ເອົາໃຈໃສ່ຊຸກຍູ້, ສົ່ງເສີມປະຊາຊົນທໍາການຜະລິດທາງດ້ານກະສິກໍາ, ຫັດຖະກໍາຕິດພັນກັບການປົກປັກຮັກສາທໍາມະຊາດ ເປັນຕົ້ນ ຊຸກຍູ້ປະຊາຊົນປູກໝາກແໜ່ງທັງໝົດ 7 ບ້ານ, ໃນເນື້ອທີ່ 9,984 ຮຕ, ຈໍານວນ 25,320 ເບ້ຍ, ສົ່ງເສີມປະຊາຊົນບ້ານນໍ້າສັກ, ບ້ານພຽງດີປູກໝາກນັດຈໍານວນ 27 ຮຕ, ສາມາດສ້າງລາຍຮັບໄດ້ທັງໝົດ 54.000.0000 ກີບ, ສົ່ງອອກຜົນຜະລິດຂິງດໍາ ຈໍານວນ 35 ໂຕນ, ສາມາດສ້າງລາຍຮັບໄດ້ທັງໝົດ 300.500.000 ກີບ, ພ້ອມນີ້ ປະຊາຊົນຍັງມີລາຍຮັບຈາກການຂາຍໝາກກ້ວຍ ແລະ ໄດ້ທຶນຊ່ວຍເຫຼືອຈາກໂຄງການລາວ/030, ແຜນປີທັງໝົດ 15 ບ້ານ, ລວມມູນຄ່າທັງໝົດ 202.021.902 ກີບ, ໃນນັ້ນ ສະໜອງໄດ້ 5 ບ້ານ ລວມມູນຄ່າທັງໝົດ 77,100.000 ກີບ, ຕິດຕາມກວດກາ ປະເມີນຜົນບັນດາໂຄງການລົງທຶນຂອງລັດ, ໂຄງການຕ່າງໆທີ່ຄຸ້ມຄອງ ແລະ ໂຄງການຊ່ວຍເຫຼືອເພື່ອພັດທະນາ ເປັນຕົ້ນ ການຊ່ວຍເຫຼືອລ້າ ລາວ-ລຸກຊໍາບວກ ປຸກສ້າງຫໍພັກຄູອາຈານ ແລະ ນັກຮຽນ ມສ ນໍ້າອ້ອນ ມີມູນຄ່າທັງໝົດ 949.308.570 ກີບ  ປະຕິບັດໄດ້ແລ້ວ 50%, ຝຶກອົບຮົມວຽກງານບໍລິຫານການເງິນໃຫ້ຄະນະການພັດທະນາບ້ານໄດ້ 16 ບ້ານເປົ້າໝາຍຂອງແຜນງານລາວ/030, ກວດກາລາຄາສິນຄ້າ 14​ ລາຍການ ແລະ 106 ລາຍການໃຫ້ໄປຕາມລະບຽບຫຼັກການ  ແລະ ຊຸກຍູ້ການຊື້-ຂາຍຜົນຜະລິດການກະສິກໍາໃຫ້ກາຍເປັນສິນຄ້າ  ເປັນຕົ້ນແມ່ນການຊື້-ຂາຍຂິງດໍາ ຖ້າທຽບໃສ່ປີ 2018 ເຫັນວ່າມີທ່າອຽງທີ່ດີ ລາຄາສູງເຖິງ 12.000 ກີບ/ກິໂລ, ພ້ອມນີ້ ກໍ່ໄດ້ຊຸກຍູ້ປະຊາຊົນຄຸ້ມຄອງ ແລະ ເກັບຊາໃບໝ້ຽງພື້ນເມືອງ 1000 ປີ ຂາຍໃຫ້ຜູ້ປະກອບການ ເພື່ອສ້າງລາຍຮັບເພີ່ມໃຫ້ແກ່ປະຊາຊົນໃນລາຄາສູງສຸດເຖິງ 40.000ກີບ/ກິໂລ ໃນນັ້ນ ຊາດິບ 125 kg, ສາມາດຈັດເກັບລາຍຮັບເຂົ້າງົບປະມານໄດ້ເກີນທັງໝົດ 839.150.420 ກີບ, ເທົ່າກັບ 28,19%, ຄອບຄົວພົ້ນທຸກທົ່ວເມືອງມີ 1.725 ຄອບຄົວ ກວມເອົາ 87,1%, ຍັງບໍ່ທັນພົ້ນທຸກ 255 ຄອບຄົວ ກວມເອົາ 12,87% ຂອງຈໍານວນຄອບຄົວທັງໝົດ, ທົ່ວເມືອງປະກາດບ້ານເປັນບ້ານພົ້ນທຸກໄດ້ 2​ ບ້ານຄື ບ້ານສົບຄີ ແລະ ບ້ານໂພນງາມ.