ພິທີພົບປະໂອ້ລົມຂອງທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງ ຊາວໜຸ່ມປະຊາຊົນປະຕິວັດລາວ ໄດ້ຈັດຂຶ້ນໃນຕອນບ່າຍຂອງວັນທີ 09 ມັງກອນ 2020 ຢູ່ສະໂມສອນໃຫຍ່ຂອງແຂວງບໍລິຄຳໄຊ, ມີຄະນະບໍລິຫານງານຊາວໜຸ່ມແຂວງ, ເລຂາ, ຮອງເລຂາຊາວໜຸ່ມຮາກຖານ ແລະ ຊາວໜຸ່ມໜ່ວຍຮາກຖານອ້ອມຂ້າງແຂວງ ເຂົ້າຮ່ວມ.

ໃນພິທີ ທ່ານ ທອງມະນີ ໂຄດປັນຍາ ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ໄດ້ຜ່ານບົດລາຍງານຂອງວຽກງານຊາວໜຸ່ມ - ເຍົາວະຊົນຂອງແຂວງໃນໄລຍະຜ່ານມາວ່າ: ປະຈຸບັນ ການຈັດຕັ້ງຊາວໜຸ່ມຂັ້ນແຂວງ ປະກອບມີ 1 ພະແນກ 27 ຮາກຖານ ແລະ 19 ໜ່ວຍຮາກຖານ, ມີຊາວໜຸ່ມໃນເກນອາຍຸ 76.231 ຄົນ ເປັນສະມາຊິກຊາວໜຸ່ມ 23.116 ສະຫາຍ, ຍິງ 11.051 ສະຫາຍ, ຂະຫຍາຍໃໝ່ 2.453 ສະຫາຍ, ເຍົາວະຊົນໃນເກນອາຍຸ 31.038 ນ້ອງ ຍິງ 16.262 ນ້ອງ ເປັນສະມາຊິກເຍົາວະຊົນ 19.766 ນ້ອງ, ສຳເລັດກອງປະຊຸມໃຫຍ່ ຊປປລ ຂັ້ນເມືອງ 7 ເມືອງ ແລະ ຂັ້ນຮາກຖານ, ໜ່ວຍຮາກຖານທີ່ຮອດວາລະສຳເລັດ 100%, ຈັດພິທີປາຖະກະຖາເລົ່າມູນເຊື້ອວັນສຳຄັນຕ່າງໆ ໄດ້ 30 ຄັ້ງ ມີຜູ້ເຂົ້າຮ່ວມ 7.093 ເທື່ອຄົນ, ໂຄສະນາຜ່ານທາງວິທະຍຸ ລາຍການຊາວໜຸ່ມພັດທະນາໄດ້ 69 ຄັ້ງ, ຊຸກຍູ້ຕິດຕາມການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປີ 2019 ອອກໃບຢັ້ງຢືນແລ້ວ 115 ພາກສ່ວນ, ທຸງໄຊນຳໜ້າ 4 ບຸກ 20 ພາກສ່ວນ, ພົ້ນເດັ່ນ ສຳເລັດງານຕັ້ງຄ້າຍພົບປະເຍົາວະຊົນທັນວາທົ່ວແຂວງຄັ້ງທີ 4 ທີ່ເມືອງປາກຊັນເປັນເຈົ້າພາບ ມີຜູ້ເຂົ້າຮ່ວມ 1.350 ຄົນ, ມີ 10 ກິດຈະກຳການແຂ່ງຂັນ, ສ້າງທາງຍ່າງເບຕົງໃຫ້ໂຮງໝໍ 30 ຕຽງ ທະຫານແຂວງ ຍາວ 50 ແມັດ, ມອບເຄື່ອງອຸປະກອນກິລາໃຫທະຫານ ຄໍ 23 ແລະ ກອງພັນ 616 ມູນຄ່າ 21 ລ້ານກີບ, ລະດົມວັດຖຸປັດໃຈຊ່ວຍເຫຼືອໄພນ້ຳຖ້ວມ ຢູ່ບັນດາແຂວງພາກກາງ - ພາກໃຕ້ ມູນຄ່າ 49 ລ້ານກ່ວາກີບ, ເປີດສອນພາສາອັງກິດ - ຄອມພິວເຕີເປັນປົກກະຕິ, ພິເສດ ໄດ້ຈັດຝຶກອົບຮົມພາສາອັງກິດລະບົບ 6 ເດືອນ ໃຫ້ພະນັກງານອ້ອມຂ້າງແຂວງ, ເຂົ້າຮ່ວມກອງປະຊຸມໃຫຍ່ສະຫະພັນຊາວໜຸ່ມແຂວງຮ່າຕິ້ງຄັ້ງທີ 5 ຊາວໜຸ່ມແຂວງເຫງະອານ ຄັ້ງທີ 6 ແລະ ກອງປະຊຸມພົບແລກປ່ຽນ 4 ແຂວງ: ບໍລິຄຳໄຊ, ຊຽງຂວາງ, ຫົວພັນ ແລະ ເຫງະອານ ທີ່ແຂວງເຫງະອານ.

          ຫຼັງຈາກນັ້ນ ທ່ານ ອາລຸນໄຊ ສູນນະລາດ ໄດ້ໂອ້ລົມ ແລະ ໃຫ້ທິດຊີ້ນຳຄະນະຊາວໜຸ່ມແຂວງບໍລິຄຳໄຊວ່າ: ກ່ອນອື່ນ ທ່ານກໍ່ໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ແລະ ທ່ານ ກໍ່ໄດ້ເນັ້ນໜັກ 3 ບັນຫາໃຫຍ່ ເປັນຕົ້ນແມ່ນໃຫ້ຖືສຳຄັນໃນການເຕົ້າໂຮມຄວາມສາມັກຄີຄົນຮຸ່ນໜຸ່ມເປັນບັນຫາຕັດສິນ ເພາະເມື່ອໃດປະເທດຊາດ, ປະຊາຊົນບັນດາເຜົ່າ, ຖັນແຖວຊາວໜຸ່ມມີຄວາມສາມັກຄີ ປະເທດຊາດກໍ່ຈະມີຄວາມສະຫງົບ ມີຄວາມຮຸ່ງເຮືອງ ສະນັ້ນ ບໍ່ວ່າຈະຢູ່ອົງການຈັດຕັ້ງໃດກໍ່ຕາມ ຖ້າຫາກຂາດຄວາມສາມັກຄີກໍ່ຈະບໍ່ມີຜົນສຳເລັດ, ເອົາໃຈໃສ່ປັບປຸງການປ່ຽນແປງໃໝ່ແບບແຜນວິທີເຮັດວຽກ ແລະ ການເຄື່ອນໄຫວໃຫ້ສອດຄ່ອງກັບຈິດຕະສາດຄວາມຕ້ອງການຂອງຄົນຮຸ່ນໃໝ່ ໂດຍສະເພາະດ້ານເນື້ອໃນທາງດ້ານການເມືອງ-ດ້ານມູນເຊື້ອ, ທາງດ້ານການສຶກສາອົບຮົມ ຕ້ອງສຶກສາອົມຮົມໃຫ້ຖືກຕ້ອງຕາມຕາມຄວາມຮຽກຮ້ອງຕ້ອງການຂອງຄົນຮຸ່ນໜຸ່ມ, ຕ້ອງຕົວຈິງ ຄວາມເປັນຈິງ, ຂໍ້ມູນຂ່າວສານ ແລະ ສະຖານທີ່ຕ້ອງຕົວຈິງ, ບັນຫາປະກົດການຫຍໍ້ທໍ້ທີ່ເກີດຂຶ້ນກັບຊາວໜຸ່ມ ໂດຍສະເພາະບັນຫາຢາເສບຕິດ. ສະນັ້ນ ຈົ່ງໄດ້ພ້ອມກັນເອົາໃຈໃສ່ຕັ້ງໜ້າສ້າງຂະບວນການ 4 ບຸກ ຂອງຊາວໜຸ່ມ 3 ດີ 4 ຮູ້ ຂອງເຍົາວະຊົນໃຫ້ຫຼາຍຂຶ້ນ ດັ່ງຄຳຂະໜານນາມຂອງປະທານ ໄກສອນ ພົມວິຫານ ເວົ້າໄວ້ວ່າ: ຊາວໜຸ່ມຈົ່ງເປັນດັ່ງນົກອິນຊີທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນໄຊແຫ່ງຍຸກສະໄໝຂອງພວກເຮົາ ໃຫ້ສົມກັບຄຳອຳມະຕະຂອງຊາວໜຸ່ມວ່າ: ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມຜ່ານຜ່າ ບ່ອນໃດຊາດຮຽກຮ້ອງຕ້ອງການ ຊາວໜຸ່ມຂານອາສາ ຊາວໜຸ່ມລາວອາດຫານກ້າວຂຶ້ນ.