ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານຮອບດ້ານ ປະຈຳປີ 2019 ແລະ ທິດທາງແຜນການ ປີ 2020 ຂອງແຂວງບໍລິຄຳໄຊ ຕໍ່ກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 14 ສະໄໝ ທີ VI ທີ່ໄດ້ໄຂຂຶ້ນໃນວັນທີ 08 ມັງກອນ 2020 ຢູ່ຫ້ອງປະຊຸມຫ້ອງວ່າການປົກຄອງແຂວງ.

 ໃນ 1 ປີຜ່ານມາ ດ້ວຍຄວາມເອົາໃຈໃສ່ຂອງຄະນະພັກ, ໄດ້ສຸມໃສ່ຈັດຕັ້ງຜັນຂະຫຍາຍມະຕິຕ່າງໆຂອງຄະນະພັກຂັ້ນເທິງວາງອອກ ເຮັດໃຫ້ທົ່ວແຂວງມີຄວາມສະຫງົບໂດຍພື້ນຖານ ພົ້ນເດັ່ນແມ່ນວຽກງານ ປສຊ - ປກສ ເຊິ່ງກອງບັນຊາການທະຫານແຂວງ ຄະນະພັກ - ຄະນະບັນຊາແຕ່ລະຂັ້ນ ໄດ້ເອົາໃຈໃສ່ສຶກສາອົບຮົມການເມືອງ - ແນວຄິດ ແລະ ເຄື່ອນໄຫວຊີ້ນຳ-ບັນຊາພະນັກງານ-ນັກຮົບ ເກັບກຳສະພາບການເຄື່ອນໄຫວຂອງສັດຕູ ແລະ ກຸ່ມຄົນບໍ່ດີຢ່າງເປັນປົກກະຕິ ຈົນສາມາດຍາດຜົນສຳເລັດໄດ້ຫຼາຍດ້ານເປັນຕົ້ນ ໄດ້ນຳໃຊ້ກຳລັງ 312 ສະຫາຍເຂົ້າທຳລາຍສວນຊາ, ສວນຝິ່ນ ລວມ 12 ຈຸດ ເນື້ອທີ່ 190,6 ຮຕ ມີ 218 ສວນ, ນຳໃຊ້ກຳລັັງ 15 ກົມກອງ ຈຳນວນພົນ 336 ສະຫາຍ ອອກເຄື່ອນໄຫວກວດຄົ້ນຈຸດຫຼໍ່ແຫຼມຕ່າງໆ ສາມາດຢຶດ ແລະ ທຳລາຍເຄື່ອງດູດແຮ່ຈຳນວນໜຶ່ງ, ອົບຮົມວິຊາປ້ອງກັນຊາດໃຫ້ນັກຮຽນ-ນັກສຶກສາບັນດາວິທະຍາໄລ ແລະ ໂຮງຮຽນໄດ້ 24 ແຫ່ງ, ລົງເຄື່ອນໄຫວເກັບກູ້ອາວຸດເສິກ, ອາວຸດລ່າເນື້ອ ແລະ ວັດຖຸອຶ່ນໆໄດ້ 1.311 ເປົ້າໝາຍ ຈຳນວນ 1.388 ຊະນິດ.

ກອງບັນຊາການ ປກສ ແຂວງ ເອົາໃຈໃສ່ປະຕິບັດ 4 ຄາດໝາຍ 4 ແຜນງານໃຫຍ່ ແລະ  41 ໂຄງການ ໂດຍການເພີ່ມທະວີເກັບກຳຂ່າວຮອບດ້ານ, ກຳແໜ້ນເປົ້າໝາຍຂອງສັດຕູໄດ້ 38 ແຫຼ່ງຂ່າວ, ກວດກາຄົນເຂົ້າເມືອງ 526.321 ຄົນ, ຍິງ 218.857 ຄົນ, ຄະດີເກີດຂຶ້ນທັງໝົດ 345 ເລື່ອງ ກັກຜູ້ກະທຳຜິດໄດ້ 108 ຄົນ ຍິງ 18, ທຽບໃສ່ປີຜ່ານມາ ຫຼຸດລົງ 87 ເລື່ອງ, ຂອງກາງເກັບກູ້ມາໄດ້: ລົດຈັກ 6 ຄັນ, ປືນອາກາ, ປືນກາລາບີນ, ປືນສັ້ນ, ປືນລູກຊອງ, ປືນແວງ ຢ່າງລະ 1 ກະບອກ ແລະ ເຄື່ອງອຶ່ນໆຈຳນວນໜຶ່ງ, ດຳເນີນຄະດີຢາເສບຕິດ 363 ເລື່ອງ, ກັກຕົວຜູ້ຕ້ອງຫາໄດ້ 241 ຄົນ ຍິງ 20, ຢຶດຢາບ້າໄດ້ 3.146.024 ເມັດ, ຢາໄອ 230 ກິໂລ, ກັນຊາແຫ້ງ 1.598 ກິໂລ, ຢາຝິ່ນ 2 ບັກ ເຮໂລອິນ 5 ຫຼອດນ້ອຍ, ປືນສັ້ນຊີແຊັດ 2 ກະບອກ, ປືນຫັນລີ 1 ກະບອກ, ປືນອາກາ 1 ກະບອກ, ປືນແກ໊ບ 16 ກະບອກ, ປືນແວ່ງ 2 ກະບອກ, ລົດໃຫຍ່ 45 ຄັນ, ລົດຈັກ 41 ຄັນ ແລະ ຂອງກາງອຶ່ນໆອີກຈຳນວນໜຶ່ງ, ມີອຸປະຕິເຫດເກີດຂຶ້ນ 303 ເລື່ອງ, ພາຫະນະເປ່ເພ 543 ຄັນ, ບາດເຈັບ 530 ຄົນ, ເສຍຊີວິດ 62 ຄົນ ລວມມູນຄ່າເສຍຫາຍປະມານ 17 ຕື້ກວ່າກີບ, ອັກຄີໄພເກີດຂຶ້ນ 13 ຄັ້ງ ມູນຄ່າເສຍຫາຍ 42 ຕື້ກີບ, ມີນັກໂທດ, ຜູ້ຕ້ອງຫາ ແລະ ຜູ້ດັດສ້າງເພີ່ມຂຶ້ນ 401 ຄົນ ຍິງ 14, ຄົນຕ່າງປະເທດ 10 ຄົນ, ປ່ອຍຕົວ 488 ຄົນ ຍິງ 33, ປະຈຸບັນຍັງເຫຼືອ 916 ຄົນ ຍິງ 57, ຕ່າງປະເທດ 13 ຄົນ, ຍິງ 3 ຄົນ.