ກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 14 ສະໄໝ ທີ VI ໄດ້ໄຂຂຶ້ນຢ່າງເປັນທາງການໃນວັນທີ 8 ມັງກອນ 2020 ຢູ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ, ກົມກອງ, ຫ້ອງການ, ວິສາຫະກິດຂອງລັດ ແລະ ພະນັກງານອາວຸໂສບຳນານ ເຂົ້າຮ່ວມ.

          ໃນກອງປະຊຸມ ໄດ້ຮັບຟັງການລາຍງານຫຍໍ້ ກ່ຽວກັບການຕີລາຄາສະພາບການຈັດຕັ້ງປະຕິບັດມະຕິກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 13 ສະໄໝ ທີ VI ວ່າ: ໄດ້ສຳເລັດການເຜີຍແຜ່ເຊື່ອມຊືມບັນດານິຕິກຳ ແລະ ເອກະສານສຳຄັນຕ່າງໆ, ໄດ້ເອົາໃຈໃສ່ຕໍ່ວຽກງານປ້ອງກັນຊາດ - ປ້ອງກັນຄວາມສະຫງົບ ໂດຍໄດ້ສຸມໃສ່ການຈັດຕັ້ງປະຕິບັດຜົນກອງປະຊຸມວິທະຍາສາດ 9 ຫົວຂໍ້, ການແກ້ໄຂ 4 ເຖື່ອນ, ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກງານຮອບດ້ານ ເຮັດໃຫ້ບັນດາຄາດໝາຍແຜນພັດທະນາເສດຖະກິດ-ສັງຄົມ ສ່ວນຫຼາຍບັນລຸຕາມເປົ້າໝາຍ ເຊິ່ງມັນໄດ້ສະແດງອອກໃນຫຼາຍດ້ານ ເປັນຕົ້ນແມ່ນ ທົ່ວແຂວງມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ມີຄວາມສາມັກຄີເປັນປຶກແຜ່ນ, ຊີວິດການເປັນຢູ່ຂອງປະຊາຊົນໄດ້ຮັບການພັດທະນາ ອັດຕາການຂະຫຍາຍຕົວຂອງເສດຖະກິດໃນລະດັບ 7,49%, ລວມຍອດຜະຕະພັນພາຍໃນ(GDP) ບັນລຸໄດ້ 5.758,9 ຕື້ກີບ, ສະເລຍ 2.159 ໂດລາຕໍ່ຄົນຕໍ່ປີ, ສາມາດຈັດເກັບລາຍຮັບທັງໝົດໄດ້ 759,63 ຕື້ກີບ ເທົ່າກັບ 87,63% ໃນນັ້ນ ພູດສູນກາງ 551,64 ຕື້ກີບ ເທົ່າກັບ 82,14% ແລະ ພູດຂອງແຂວງ 207,99 ຕື້ກີບ ລື່ນແຜນ 6,51%, ມີເນື້ອທີ່ປູກເຂົ້າ 40.465 ຮຕ, ຜະລິດຊີ້ນ, ປາ ແລະ ໄຂ່ ໄດ້ 16.302,94 ໂຕ່ນ, ພິສູດຫຼັກຖານໃບຕາດິນໄດ້ 8.326 ຕອນ ລື່ນແຜນ 9,69%, ປະຈຸບັນ ທົ່ວແຂວງມີຄອບຄົວພົ້ນທຸກ 51.203 ຄອບຄົວ ກວມເອົາ 97,23%, ຄອບຄົວທຸກຍາກຍັງເຫຼືອພຽງແຕ່ 939 ຄອບຄົວ. ນອກນັ້ນວຽກງານການບູລະນະປະຊາທິປະໄຕ ປະຊາຊົນ ຕາມທິດສ້າງລັດແຫ່ງກົດໝາຍ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ, ການຍົກສູງຄວາມສາມາດ ແລະ ເພີ່ມທະວີການນຳພາຂອງພັກ, ສ້າງພັກໃຫ້ປອດໃສ ເຂັ້ມແຂວງ ແລະ ໜັກແໜ້ນ, ການຕ່າງປະເທດ, ວັດທະນະທຳ-ສັງຄົມ ແລະ ວຽກງງານອື່ນໆ ກໍ່ໄດ້ຮັບການເອົາໃຈໃສ່ປັບປຸງ ແລະ ພັດທະນາ ໃຫ້ດີຂຶ້ນເປັນກ້າວໆ.

          ກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 14 ສະໄໝ ທີ VI ຈະໄດ້ດຳເນີນເປັນເປັນເວລາ 3 ວັນເຕັມ (8-10 ມັງກອນ 2020) ຈຶ່ງຈະໄດ້ອັດລົງ ເຊີ່ງບັນດາຜູ້ແທນກອງປະຊຸມ ຈະໄດ້ຮັບຟັງການປະຕິບັດວຽກງານແນວຄິດຂອງພັກປີ 2019, ລາຍງານແຜນຈັດສັນການລົງທຶນ 2020, ລາຍງານຜົນການຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານ ປີ 2019 ແລະ ແຜນ 2020, ຜ່ານຮ່າງນິຕິກຳໃໝ່ຂອງແຂວງ 2 ສະບັບ ແລະ ອື່ນໆ.