ກອງປະຊຸມ ສະຫຼຸບການຈັດຕັ້ງປະຕິບັດກົດລະບຽບຂອງພັກປະຊາຊົນປະຕິບັດລາວ ສະໄໝທີ X ທົ່ວແຂວງບໍລິຄຳໄຊ ໄດ້ຈັດຂຶ້ນໃນຕອນເຊົ້າຂອງວັນທີ 07 ມັງກອນ 2020 ຢູ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ ໂດຍການເຂົ້າຮ່ວມເປັນປະທານຂອງສະຫາຍ ວັນໄຊ ພອງສະຫວັນ ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ, ສະຫາຍ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງບໍລິຄຳໄຊ, ມີເລຂາ, ຮອງເລຂາຄະນະພັກຮາກຖານພະແນກການອ້ອມຂ້າງແຂວງ ເຂົ້າຮ່ວມ.

   ອົງຄະນະພັກແຂວງບໍລິຄໍາໄຊ ປະກອບມີການຈັດຕັ້ງຮາກຖານພັກທັງໝົດ 855 ໜ່ວຍພັກ, ມີ 88 ຄະນະພັກຮາກຖານ, 767 ໜ່ວຍພັກ, ປະກອບມີໜ່ວຍພັກທີ່ຂຶ້ນກັບຄະນະຮາກຖານ ຈໍານວນ 420 ໜ່ວຍພັກ, ໜ່ວຍຮາກຖານ 347 ໜ່ວຍພັກ, ຂັ້ນເມືອງ 648 ຮາກຖານພັກ, ມີ 60 ຄະນະພັກຮາກຖານ, ມີໜ່ວຍພັກທີ່ຂຶ້ນກັບຄະນະພັກຮາກຖານ 277 ໜ່ວຍພັກ, ມີໜ່ວຍພັກທີ່ຂຶ້ນກັບຄະນະພັກເມືອງ 311 ໜ່ວຍພັກ, ຄະນະພັກ ປກຊ - ປກສ ແຂວງ ມີ 113 ຮາກຖານພັກ, ມີ 17 ຄະນະພັກຮາກຖານ, ມີໜ່ວຍພັກຂຶ້ນກັບຄະນະພັກຮາກຖານ 83 ໜ່ວຍພັກ, ໜ່ວຍພັກຮາກຖານ 13​ ໜ່ວຍພັກ, ທົ່ວແຂວງມີສະມາຊິກພັກທັງໝົດ 12.949 ສະຫາຍ, ຍິງ 3.056 ສະຫາຍ, ສະມາຊິກພັກສໍາຮອງ 845 ສະຫາຍ, ຍິງ 285​ ສະຫາຍ.

  ຄະນະກວດກາພັກແຂວງໄດ້ຜັນຂະຫຍາຍ ເຊື່ອມຊືມກ່ຽວກັບເອກະສານ 5 ບົດ ໃຫ້ບັນດາສະຫາຍຄະນະບໍລິຫານງານພັກແຂວງ, ເລຂາ, ຮອງເລຂາຄະນະຮາກຖານ, ຄະນະໜ່ວຍພັກຮາກຖານ, ຫົວໜ້າພະແນກການອ້ອມຂ້າງແຂວງ, ຄະນະກອງບັນຊາການ ປກຊ - ປກສ ແຂວງ, ເລຂາພັກເມືອງ, ຫົວໜ້າຄະນະຈັດຕັ້ງເມືອງ, ຈັດຕັ້ງປະຕິບັດຢູ່ບັນດາພະແນກການ, ອົງການອ້ອມຂ້າງແຂວງ ໂດຍໄດ້ຈັດຕັ້ງເປັນຂົງເຂດ ມີເອກະສານ 3 ບົດ, ຄະນະຮັບຜິດຊອບຂັ້ນເມືອງໄດ້ລົງນໍາພາຈັດຕັ້ງເຊື່ອມຊືມຢູ່ບັນດາຄະນະຮາກຖານກຸ່ມບ້ານ, ບ້ານໃຫຍ່, ໜ່ວຍພັກບ້ານ ແລະ ຮາກຖານສໍານັກງານຕາມຂົງເຂດ ໂດຍແມ່ນຄະນະປະຈຳພັກເມືອງເປັນຜູ້ນໍາພາໂດຍກົງ. ຜ່ານການຈັດຕັ້ງປະຕິບັດທົ່ວແຂວງມີສະມາຊິກພັກທີ່ໄດ້ເຂົ້າຮ່ວມເຊື່ຶອມຊືມ 11.050 ສະຫາຍ ຍິງ 2.427ສະຫາຍ, ກວມເອົາ 98,86% ຂອງຈໍານວນສະມາຊິກພັກທັງໝົດ, ສ່ວນຈໍານວນທີ່ຍັງເຫຼືອແມ່ນໄດ້ມອບໃຫ້ຄະນະພັກເປັນຜູ້ສືບຕໍ່ຈັດຕັ້ງເຜີຍແຜ່, ມາຮອດປະຈຸບັນແມ່ນສໍາເລັດ 100%.

  ໃນໄລຍະ 5 ປີຜ່ານມາມີສະມາຊິກພັກ - ພະນັກງານ ແລະ ອາສາສະໝັກຖືກປະຕິບັດວິໄນຮູບການຕ່າງໆທັງໝົດ 268 ສະຫາຍ ຍິງ 27​ ສະຫາຍ, ໃນນັ້ນ ສະມາຊິກພັກທີ່ເປັນພະນັກງານ - ລັດຖະກອນ 196 ສະຫາຍ, ຍິງ 21 ສະຫາຍ, ສະມາຊິກພັກເປັນປະຊາຊົນ 69 ສະຫາຍ, ຍິງ 6 ສະຫາຍ, ອາສາສະໝັກ 3 ສະຫາຍ, ພະນັກງານ-ລັດຖະກອນ 11 ສະຫາຍ, ຍິງ 1 ສະຫາຍ, ຮູບການປະຕິບັດວິໄນດ້ານພັກ ຂັ້ນກ່າວເຕືອນຄວາມຜິດ 109​ ສະຫາຍ ຍິງ 7 ສະຫາຍ, ປົດຕຳແໜ່ງ 102 ສະຫາຍ ຍິງ 15 ສະຫາຍ, ຮູບການປະຕິບັດວິໄນດ້ານລັດ ຂັ້ນກ່າວເຕືອນຄວາມຜິດ 76 ສະຫາຍ ຍິງ 4 ສະຫາຍ, ປົດຕໍາແໜ່ງ 5 ສະຫາຍ, ໂຈະການເລື່ອນຊັ້ນ - ຂັ້ນເງິນເດືອນ 15 ສະຫາຍ, ເອົາອອກຈາກລັດຖະກອນ 12 ສະຫາຍ ຍິງ 2 ສະຫາຍ, ເອົາອອກຈາກອາສາສະໝັກ 3 ສະຫາຍ.