ໃນວັນທີ 29 ພະຈິກ 2019 ການນຳແຂວງ ນຳໂດຍ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ແລະ ກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ ໄດ້ນຳເອົາເຄື່ອງອຸປະໂພກ-ບໍລິໂພກ ໄປມອບໃຫ້ຄົນເຈັບຢູ່ໂຮງໝໍໂຮງໝໍທະຫານ ແລະ ໂຮງໝໍແຂວງບໍລິຄຳໄຊ. ທ່ານເຈົ້າແຂວງກ່າວວ່າການມາມອບເຄື່ອງອຸປະໂພກ-ບໍລິໂພກໃນຄັ້ງນີ້ວ່າ ກໍ່ເພື່ອເປັນການສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຄົບຮອບ 44 ປີ (2 ທັນວາ 1975-2 ທັນວາ 2019) ພ້ອມນັ້ນ ຍັງເປັນການລົງມາພົບປະພໍ່ແມ່ປະຊາຊົນ ແລະ ໃຫ້ກຳລັງໃຈຄົນເຈັບ ທີ່ເຂົ້າມາຮັບການປິ່ນປົວ. ຫຼັງຈາກນັ້ນທ່ານເຈົ້າແຂວງ ຍັງໄດ້ນຳພາເປີດຜ້າປິດຕາ ແລະ ມອບແວ່ນຕາໃຫ້ຄົນເຈັບທີ່ເຂົ້າມາຜ່າຕັດແກ່ນຕາຂຸ້ນ ໃນວັນທີ 27-28 ພະຈິກທີ່ຜ່ານມາ ທີ່ໄດ້ຮັບການຊ່ວຍເຫຼືອຈາກທີມງານຊ່ຽວຊານຕາ ແຂວງຮ່າຕີ້ງ ສສ ຫວຽດນາມ ຈຳນວນ 55 ຄົນ ລວມມູນຄ່າການຊ່ວຍເຫຼືອທັງ 307.718.740 ດົ່ງ.