ເພື່ອເປັນການປະກອບສ່ວນ ຊຸກຍູ້ ແລະ ສົ່ງເສີມການສຶກສາໃຫ້ແກ່ເດັກນ້ອຍ ໃນວັນທີ 28 ພະຈິກ 2019 ຢູ່ໂຮງຮຽນອະນຸບານບ້ານສົມສະໜຸກ ເມືອງປາກກະດິງ ແຂວງບໍລິຄຳໄຊ ໄດ້ມີພິທີມອບຫ້ອງຮຽນໃໝ່ ທີ່ໄດ້ຮັບທຶນຊ່ວຍເຫຼືອ ຈາກກອງທຶນໜຶ່ງດວງໃຈ ໃຫ້ກຽດມອບໂດຍ ທ່ານ ນາງ ແອງ ໄຊສົງຄາມ ປະທານກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ ແລະ ຮັບໂດຍທ່ານ ຄຳເພັດ ໄຊປັນຍາ ຫົວໜ້າຫ້ອງການສຶກສາທິການ ແລະ ກິລາເມືອງປາກກະດິງ ຊ້ອງໜ້າໂດຍ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີການນຳຂອງແຂວງ, ເມືອງ, ແຂກທີ່ຖືກເຊີນ ແລະ ຄູອາຈານ ເຂົ້າຮ່ວມເປັນສັກຂີພະຍານ.

ການກໍ່ສ້າງໂຮງຮຽນອະນຸບານໃນຄັ້ງນີ້ ມີ 1 ຫຼັງ ຂະໜາດ 9 x 32 ແມັດ, ມີ 3 ຫ້ອງຮຽນ, 1 ຫ້ອງການ ແລະ ຫ້ອງນ້ຳ 7 ຫ້ອງ, ຕິດຕັ້ງໄຟຟ້າ ແລະ ພັດລົມໃສ່ອາຄານ, ອາຄານມຸງດ້ວຍອາລຸຊິ່ງ, ໂຄງຫຼັງຄາເປັນໂຄງເຫຼັກ, ກໍ່ຝາດ້ວຍດິນບ໋ອກ, ປູພື້ນດ້ວຍເບຕົງ ແລະ ເຟີນິເຈີ , ນອກນັ້ນ ຍັງໄດ້ສະໜອງເຄື່ອງຫຼິ້ນໃນຫ້ອງ-ນອກຫ້ອງ, ຕັ່ງນັ່ງນັກຮຽນ ລວມມູນຄ່າທັງໝົດ 161.737.000 ກີບ, ໃນນັ້ນ ປະຊາຊົນພາຍໃນບ້ານປະກອບສ່ວນ 71.500.000 ກີບ. ໃນໂອກາດນີ້ ກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ ແລະ ທ່ານນາງ ວຽງເງິນ ໄຂຄຳພິທູນ ຍັງໄດ້ນຳເອົາເຄື່ອງຫຼີ້ນສຳລັບເດັກນ້ອຍ ແລະ ເຂົ້າໜົມ ມາມອບໃຫ້ໂຮງຮຽນຕື່ມອີກ.

    ໃນພິທີ ຍັງມີພິທີມອບໃບຍ້ອງຍໍຂອງທ່ານເຈົ້າເມືອງປາກກະດິງໃຫ້ກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ ກ່າວມອບໂດຍທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ ແລະ ຮັບໂດຍທ່ານ ນາງ ແອງ ໄຊສົງຄາມ ປະທານກອງທຶນໜຶ່ງດວງໃຈ. ພ້ອມນີ້ ຍັງໄດ້ພ້ອມກັນປູກຕົ້ນໄມ້ຢູ່ຕໍ່ໜ້າໂຮງຮຽນດັ່ງກ່າວອີກດ້ວຍ.

          ໃນຕອນບ່າຍຂອງວັນດຽວກັນ ປະທານກອງທຶນໜຶ່ງດວງໃຈ ບໍລິຄຳໄຊຊ່ວຍເຫຼືອສັງຄົມ ພ້ອມດ້ວຍຄະນະ, ທ່ານນາງ ວຽງເງິນ ໄຂຄຳພິທູນ ແລະ ພະແນກສຶກສາທິການ ແລະ ກິລາແຂວງ ຍັງໄດ້ເດີນທາງໄປ ໂຮງຮຽນອະນຸບານບ້ານບຸ່ງກວາງ ເມືອງປາກກະດິງ ຫຼັງຈາກທີ່ກອງທຶນດັ່ງກ່າວ ໄດ້ໃຫ້ທຶນຊ່ວຍເຫຼືອສ້າງໂຮງຮຽນ ແລະ ມອບສຳເລັດແລ້ວໃນເດືອນ 9 ປີ 2018 ທີ່ຜ່ານມາ ໂດຍການນຳພາທາງຂອງທ່ານເຈົ້າເມືອງປາກກະດິງ ໃນການມາຢ້ຽມຢາມໃນຄັ້ງນີ້ ຍັງໄດ້ນຳເອົາອຸປະກອນເຄື່ອງຫຼິ້ນສຳລັບເດັກນ້ອຍ ແລະ ເຂົ້າໜົມຈຳນວນໜຶ່ງ ມາມອບໃຫ້ໂຮງຮຽນດັ່ງກ່າວ ເຊິ່ງເປັນບ້ານເກີດເມືອງນອນຂອງທ່ານນາງ ວຽງເງິນ ໄຂຄຳພິທູນ.