ພິທີເປີດງານຕັ້ງຄ້າຍມິດຕະພາບເຍົາວະຊົນທັນວາ ທົ່ວແຂວງບໍລິຄໍາໄຊ ຄັ້ງທີ 4 ທີ່ເມືອງປາກຊັນ ໄດ້ຈັດຂຶ້ນໃນວັນທີ 28 ພະຈິກ 2019 ຢູ່ເດີ່ນໂຮງຮຽນ ມັດທະຍົມຕອນຕົ້ນໂພສີ ເມືອງ ປາກຊັນ ແຂວງບໍລິຄຳໄຊ ໂດຍການເຂົ້າຮ່ວມຂອງ ທ່ານ ບຸນເສັງ ປະທໍາມະວົງ ຮອງເຈົ້າແຂວງບໍລິຄໍາໄຊ, ທ່ານ ໄມຈອມ ວັນນະສານຄໍາ ເຈົ້າເມືອງປາກຊັນ ແລະ ທ່ານ ທອງມະນີ ໂຄດປັນຍາ ເລຂາຄະນະບໍລິຫານງານຊາວໜຸ່ມແຂວງ, ມີຄະນະປະຈໍາພັກເມືອງ ເລຂາຄະນະບໍລິຫານງານຊາວໜຸ່ມ 7 ເມືອງ  ຄະນະຊາວໜຸ່ມຮາກຖານອ້ອມຂ້າງແຂວງ ຕະຫຼອດຮອດສະມາຊິກຊາວໜຸ່ມ - ເຍົາວະຊົນ  ຈາກໂຮງຮຽນແຫ່ງຕ່າງໆພາຍໃນເທດສະບານເມືອງ ເຂົ້າຮ່ວມ. 

   ໃນພິທີ ໄດ້ຮັບຟັງລາຍງານຫຍໍ້ ກ່ຽວກັບການຫ້າງຫາກະກຽມ, ການຈັດຕັ້ງປະຕິບັດວຽກງານໃນດ້ານຕ່າງໆ  ແລະ ຈຸດປະສົງວ່າ  ແມ່ນກິດຈະກໍາ ທີ່ຈັດຂຶ້້ນປີລະ 1 ຄັ້ງ ໂດຍຜັດປ່ຽນກັນເປັນເຈົ້າພາບ ຕາມບົດບັນທຶກເຊີ່ງມີທັງໝົດ 7 ເມືອງທົ່ວແຂວງ. ງານໃນຄັ້ງນີ້ ມີຄະນະນຳ ແລະ ຜູ້ຮັບຜິດຊອບເຍົາວະຊົນ, ນ້ອງນ້ອຍເຍົາວະຊົນ 6 ເມືອງ ແລະ 8 ໂຮງຮຽນອ້ອມຂ້າງເມືອງປາກຊັນເຂົ້າຮ່ວມ ລວມທັງໝົດ 378 ຄົນ, ມີຄ້າຍເຂົ້າຮ່ວມ 13 ຄ້າຍ, ຄ້າຍສາທິດ 8 ຄ້າຍ ແລະ ຄ້າຍແຂ່ງຂັນ 5 ຄ້າຍ ເພື່ອເປັນການແລກປ່ຽນ ແລະ ຖອດຖອນບົດຮຽນບັນດາກິດຈະກໍາໃນດ້ານຕ່າງໆ ຂອງນ້ອງນ້ອຍເຍົາວະຊົນທັນວາ ທັງເປັນການຮັດແໜ້ນຄວາມສາມັກຄີ, ມິດຕະພາບ ແລະ ສ້າງໂອກາດ ໃຫ້ນ້ອງນ້ອຍເຍົາວະຊົນໄດ້ພົບປະແລກປ່ຽນຄວາມ​ຮູ້ເຊິ່ງກັນ ແລະ ກັນ.

     ຫຼັງຈາກນັ້ນ ບັນດາຄະນະປະທານ ພ້ອມດ້ວຍແຂກທີ່ເຂົ້າຮ່ວມ ໄດ້ພ້ອມກັນລັ່ນຄ້ອງ 9 ບາດ ເພຶ່ອເປັນສັນຍາລັກໃຫ້ແກ່ການເປີດງານຕັ້ງຄ້າຍເຍົາວະຊົນທັນວາທົ່ວແຂວງບໍລິຄໍາໄຊ ຄັ້ງທີ 4 ທີ່ເມືອງ ປາກຊັນ ເປັນເຈົ້າພາບຂຶ້ນຢ່າງເປັນທາງການ.

        ງານຄັ້ງນີ້ ໄດ້ນຳເນີນໄປ ເປັນເວລາ 3 ວັນຈຶ່ງສຳເລັດ ໂດຍມີຫຼາຍກິດຈະກຳທີ່ໜ້າສົນໃຈ ເປັນຕົ້ນແມ່ນການທັດສະນະສຶກສາທາງດ້ານວັດທະນະທຳ, ການສະແດງສິລະປະ-ວັນນະຄະດີ ແລະ ຮ້ອງເພງ, ການແຂ່ງຂັນກິລາ, ຫຼີ້ນເກມປະເພດຕ່າງໆ, ການແຂ່ງຂັນຕັ້ງຄ້າຍ, ຕອບຄຳຖາມວິທະຍາສາດ ແລະ ແຕ້ມຮູບ.