ໃນວັນທີ 27 ພະຈິກ 2019 ຜ່ານມາ ທີ່ຫ້ອງປະຊຸມໃຫຍ່ ຫ້ອງວ່າການປົກຄອງເມືອງ ວຽງທອງ ແຂວງ ບໍລິຄຳໄຊ ໄດ້ຈັດພິທີ ເຊື່ອມຊືມຄຳແນະນຳ ເລກທີ 13/ອກ-ບຄ ລົງວັນທີ 29 ຕຸລາ 2019 ກ່ຽວກັບການສະຫຼຸບຕີລາຄາການຈັດຕັ້ງປະຕິບັດກົດລະບຽບພັກ ສະໄໝທີ X ໃນທົ່ວອົງຄະນະພັກຕົນ ແລະ ຄໍາແນະນຳຂອງຄະນະປະຈໍາພັກແຂວງ ເລກທີ 528/ຄປພ.ຂບຊ ລົງວັນທີ 20 ພະຈິກ 2019 ກ່ຽວກັບການສະຫຼຸບຕີລາຄາການຈັດຕັ້ງປະຕິບັດລະບຽບພັກ ສະໄໝທີ X ທົ່ວອົງຄະນະພັກແຂວງ, ໃຫ້ກຽດເຊື່ອມຊືມເອກະສານໂດຍສະຫາຍ ບູນຄຳ ໄຊເຍ່ຍລໍວື່ ຄະນະປະຈຳພັກແຂວງ, ປະທານກວດກາພັກ-ລັດແຂວງ, ມີຄະນະປະຈຳພັກເມືອງ, ກຳມະການພັກເມືອງ, ພະນັກງານຮາກຖານແຂວງ, ເລຂາຄະນະໜ່ວຍພັກອ້ອມຂ້າງເມືອງ ແລະ ກອງບັນຊາການ ປກຊ-ປກສ ເມືອງເຂົ້າຮ່ວມ.

      ໃນພິທີ ສະຫາຍ ບູນຄຳ ໄຊເຍ່ຍລໍວື່ ໄດ້ຍົກໃຫ້ເຫັນບາງເນື້ອໃນທີ່ສຳຄັນ ເປັນຕົ້ນແມ່ນດ້ານເນື້ອໃນ ການຕີລາຄາຄວາມຮັບຮູ້ ຄວາມເຂົ້າໃຈຂອງສະມາຊິກພັກ ຕໍ່ກົດລະບຽບພັກ ສະໄໝທີ X ໂດຍໄດ້ຊີ້ແຈງໃຫ້ເຫັນເຖີງການປະຕິບັດກົດລະບຽບພັກ, ບັນຫາທີ່ບໍ່ສອດຄ່ອງ, ບັນຫາທີ່ຄວນປັບປຸງ ຫຼື ເພີ່ມເຕີມ, ການຂະຫຍາຍສະມາຊິກພັກ  ແລະ ຄຸນນະພາບ ຕ້ອງສົມຄູ່ກັນ ກັບມາດຕະຖານ. ພ້ອມນັ້ນ ທ່ານຍັງໄດ້ຊີ້ນຳບາງບັນຫາເພີ່ມເຕີມກ່ຽວກັບເງື່ອນໄຂການສ້າງຄະນະພັກຮາກຖານ, ໜ່ວຍພັກ, ການຫຍຸບ - ການຂຶ້ນກັບ ຕ້ອງໄດ້ດຳເນີນຕາມລະບຽບ ແລະ ຕາມຂັ້ນຕອນທີ່ໄດ້ກຳນົດຢ່າງລະອຽດ.

    ພີທີ ໄດ້ຜ່ານຄໍາແນະນຳຂອງຄະນະປະຈໍາພັກແຂວງ ເລກທີ 528/ຄປພ.ຂບຊ ລົງວັນທີ 20 ພະຈິກ 2019 ກ່ຽວກັບການສະຫຼຸບຕີລາຄາການຈັດຕັ້ງປະຕິບັດລະບຽບພັກ ສະໄໝທີ X ທົ່ວອົງຄະນະພັກແຂວງ. ຫຼັງຈາກນັ້ນ ສະຫາຍ ວົງສີ ທອງສີອີນທິປັນຍາ ກຳມະການພັກແຂວງ, ເລຂາພັກເມືອງ-ເຈົ້າເມືອງ ວຽງທອງ ກໍ່ໄດ້ຂື້ນຊີ້ນຳເພີ່ມເຕີມກ່ຽວກັບ ຄໍາແນະນຳ ເລກທີ 13/ອກ-ບຄ ແລະ ຄຳແນະນຳ ເລກທີ 528/ຄປພ.ຂບຊ ໃຫ້ຄະນະຮັບຜິດຊອບຂັ້ນເມືອງລົງໄປເຊື່ອມຊື່ມໃຫ້ຮາກຖານບ້ານ ແລະ ຊີ້ນຳວຽກກ່ຽວກັບການປະເມີນໜ່ວຍພັກ ປອດໃສ ເຂັ້ມແຂງ ໜັກແໜ້ນ ໃຫ້ບັນດາເລຂາໜ່ວຍພັກ ເພື່ອນຳໄປຈັດຕັ້ງປະຕິບັດໃຫ້ໄດ້ຮັບຜົນສຳເລັດຕາມລະດັບຄາດໝາຍ.