ເຈົ້າໜ້າທີ່ ປກສ ເມືອງຄໍາເກີດ ແຂວງບໍລິຄໍາໄຊ ໃຫ້ຮູ້ວ່າ: ໃນວັນທີ 26 ພະຈິກ 2019 ເວລາປະມານ 12 ໂມງ ໄດ້ຮັບລາຍງານຈາກພົນລະເມືອງດີ ວ່າ: ມີເປົ້າໝາຍຈະເອົາຢາເສບຕິດ ໃສ່ລົດອອກຈາກເມືອງຄໍາເກີດ ແຂວງບໍລິຄໍາໄຊ ໄປປະເທດໃກ້ຄຽງ, ພາຍຫຼັງໄດ້ຮັບແຫຼ່ງຂ່າວ ເຈົ້າໜ້າຈຶ່ງໄດ້ແຕ່ງຕັ້ງພະນັກງານວິຊາສະເພາະ ອອກຕິດຕາມກວດກາ ແລະ ຈັດວາງກໍາລັງຢູ່ຕາມຈຸດຕ່າງໆ ໃນຂອບເຂດເທດສະບານ ເມືອງຄໍາເກີດ, ມາຮອດເວລາປະມານ 17 ໂມງ ຂອງວັນດຽວກັນ ເຈົ້າໜ້າທີ່ຈຶ່ງໄດ້ພົບເຫັນລົດເປົ້າໝາຍສົງໃສ  ແລ່ນດ້ວຍຄວາມໄວສູງ  ເຈົ້າໜ້າທີ່ຈຶ່ງໄດ້ໄລ່ຕິດຕາມລົດຄັນດັ່ງກ່າວໄປ ພໍຮອດໜ້າຮ້ານອາຫານແຫ່ງໜຶ່ງ, ລົດເປົ້າໝາຍທີ່ຕ້ອງສົງໃສໄດ້ໄປຕໍາກັບລົດທີ່ຈອດຢູ່ຮ້ານອາຫານແຫ່ງດັ່ງກ່າວ ເຂດບ້ານ ຫຼັກ 20 ເມືອງຄໍາເກີດ,  ພາຍຫຼັງເກີດອຸປະຕິເຫດແລ້ວ ລົດຄັນດັ່ງກ່າວ ກໍ່ແລ່ນໄປຕາມເສັ້ນທາງເລກ 8A ພໍໄປຮອດບ້ານ ໂພນແພງ ເມືອງ    ຄໍາເກີດ ຄົນຂັບກໍ່ໄດ້ຈອດລົດໄວ້ຢູ່ປ່າໃກ້ກັບວັດບ້ານ ໂພນແພງ ແລະ ໄດ້ເອົາຕົວຫຼົບໜີ, ທາງເຈົ້າໜ້າທີ່ ຈຶ່ງໄດ້ເຂົ້າໄປກວດກາລົດ ຜ່ານການກວດກາພົບເຫັນ ເຮໂລອິນ 1,032 ແທ່ງ ນໍ້າໜັກ 390 ກິໂລກຼາມ, ຢາໄອ້ ຈໍານວນ 200 ຫໍ່, ນໍ້າໜັກ 200 ກິໂລກຼາມ, ເອກະສານ 01 ຊຸດ ເປັນພາສາຈີນ  ແລະ  ຮູບພາບຈໍານວນໜຶ່ງ. 

     ປະຈຸບັນ ຄະດີຍັງຢູ່ໃນຂັ້ນຕອນການສືບສວນ-ສອບສວນ ຂະຫຍາຍຜົນເພື່ອຊອກຫາ ແລະ ກັກຕົວຜູ້ກະທໍາຜິດມາດໍາເນີນຄະດີຕາມລະບຽບກົດໝາຍ.