ພິທີປະກາດ 3 ບ້ານ ຄື: ບ້ານ ໂພນດູ່, ບ້ານ ນ້ຳກ້າງ ແລະ ບ້ານ ຫ້ວຍຫອຍ ເປັນ ຄອບຄົວ ແລະ ບ້ານ ແມ່ຍີງ 3 ດີ ຕິດພັນ ກັບການສ້າງບ້ານພັດທະນາຕາມທິດສາມສ້າງຂອງເມືອງ ໄດ້ຈັດຂຶ້ນໃນວັນທີ 26 ພະຈິກ 2019 ຜ່ານມາ ທີ່ສະໂມສອນບ້ານ ໂພນດູ່ ເມືອງ ວຽງທອງ ແຂວງ ບໍລິຄໍາໄຊ ໂດຍເປັນກຽດເຂົ້າຮ່ວມຂອງທ່ານ ຄຳມອນ ໄຊພົມມີ ຮອງເລຂາພັກເມືອງ-ຮອງເຈົ້າເມືອງວຽງທອງ,  ມີປະທານສະຫະພັນແມ່ຍິງເມືອງ, ພະນັກງານຮາກຖານແຂວງ, ເມືອງ, ເລຂາພັກບ້ານ, ນາຍບ້ານ ທັງ 3 ບ້ານ, ພໍ່ ແມ່ປະຊາຊົນ ແລະ ເອື້ອຍນ້ອງແມ່ຍິງພາຍໃນ 3 ບ້ານ ເຂົ້າຮ່ວມ.

ໃນພິທີ ທ່ານ ນາງ ຕຸ່ນ ໄຊພູວົງ ປະທານສະຫະພັນແມ່ຍິງບ້ານ ໂພນດູ່ ຕາງໜ້າໃຫ້ສະຫະພັນແມ່ຍິງທັງ 3 ບ້ານ ຂຶ້ນຜ່ານບົດສະຫຼຸບລາຍງານການປະເມີນການຈັດຕັ້ງປະຕິບັດວຽກງານການສ້າງຄອບຄົວ ແລະ ບ້ານ ສະຫະພັນແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງວ່າ: ອຳນາດການປົກຄອງ, ຄະນະສະຫະພັນແມ່ຍິງບ້ານ ໄດ້ສຶກສາອົບຮົມການເມືອງແນວຄິດໃຫ້ບັນດາເອື້ອຍນ້ອງແມ່ຍິງ ກ່ຽວກັບວຽກງານການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດສາມສ້າງ ຕາມຂະບວນການຈັດຕັ້ງປະຕິບັດແຕ່ລະບາດກ້າວ ແລະ ກິດຈະກຳຈັດຕັ້ງປະຕິບັດຕາມ 5 ບາດກ້າວທີ່ສູນກາງສະຫະພັນແມ່ຍິງລາວວາງອອກ. ພາຍໃນ 3 ບ້ານມີ 316 ຫຼັງຄາເຮືອນ, ມີ 384 ຄອບຄົວ, ມີພົນລະເມືອງທັງໝົດ 1.772 ຄົນ ຍິງ 848 ຄົນ, ມີ 2 ຊົນເຜົ່າ ຄືື: ເຜົ່າລາວລຸ່ມ ແລະ ເຜົ່າມົ້ງ, ໃນນັ້ນ ຈຳນວນເພດຍິງ 15 ປີຂຶ້ນໄປ ມີ 505 ຄົນ, ເຂົ້າເປັນສະມາຊິກແມ່ຍິງ 181 ຄົນ, ຜ່ານການປະຕິບັດໄລຍະຜ່ານມາ ບ້ານມີການປ່ຽນແປງຈາກເມື່ອກ່ອນ ເພາະວ່າປະຊາຊົນມີຄວາມສາມັກຄີກັນ ບໍ່ວ່າວຽກງານລວມ ເປັນຕົ້ນແມ່ນທຸກຄອບຄົວໄດ້ເຂົ້າຮ່ວມຂະບວນການອອກແຮງງານລວມບ້ານ, ຊຸກຍູ້ແມ່ຍິງໃຫ້ໄດ້ຕາມມາດຖານ, ເງື່ອນໄຂຂອງສູນກາງແມ່ຍິງລາວວາງອອກ ແລະ ເດັກນ້ອຍໃຫ້ໄດ້ຮັບການບໍລິການທາງດ້ານສາທາລະນາສຸກ ເຮັດໃຫ້ຄອບຄົວມີຄວາມຜາສຸກ, ພັດທະນາ ແລະ ຈະເລີນກ້າວໜ້າຂຶ້ນກ່ວາເດີມ.

      ໃນພິທີໄດ້ມອບໃບຍ້ອງຍໍໃຫ້ຄອບຄົວ ແລະ ບຸກຄົນທີ່ມີຜົນງານດີເດັ່ນໃນການປະກອບສ່ວນສ້າງຄອບຄົວ ແລະ ບ້ານ ສະຫະພັນແມ່ຍິິງ 3 ດີ ຕິດພັນກັບການສ້າງບ້ານພັດທະນາຕາດທິດ 3 ສ້າງ ພ້ອມທັງມອບໃບຢັ້ງຢືນໃຫ້ 3 ບ້ານເພື່ອເປັນນາມມະຍົດຂອງບ້ານ.