ກອງປະຊຸມຄະນະມະການຮັກສາຄວາມສະຫງົບຮຽບຮ້ອຍຕາມຊາຍແດນລາວ-ໄທ ລະຫວ່າງແຂວງບໍລິຄຳໄຊ-ຈັງຫວັດໜອງຄາຍ ຄັ້ງທີ 13 ໄດ້ຈັດຂຶ້ນໃນວັນທີ 26 ພະຈິກ 2019 ທີ່ຫ້ອງປະຊຸມຫ້ອງວ່າການແຂວງບໍລິຄຳໄຊ ໂດຍການເປັນປະທານຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ແລະ ທ່ານ ຣົນນະໄຊ ຈິດວິເສດ ຜູ້ວ່າຣາຊະການຈັງຫວັດໜອງຄາຍ, ມີຄະນະກຳມະການທັງສອງຝ່າຍ ເຂົ້າຮ່ວມ.

ກອງປະຊຸມ ໄດ້ທົບທວນຄືນ ການຈັດຕັ້ງປະຕິບັດ ບົດບັນທຶກກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ແຂວງບໍລິຄຳໄຊ-ຈັງຫວັດໜອງຄາຍ ຄັ້ງທີ 12 ວັນທີ 7 ກັນຍາ 2018 ທີ່ຈັງ​ຫວັດ​ໜອງ​ຄາຍ ຣາ​ຊະ​ອາ​ນາ​ຈັກ​ໄທ ເຫັນວ່າທັງສອງຝ່າຍໄດ້ເອົາໃຈໃສ່ເພີ່ມທະວີ ໃນການປະສານງານພົວພັນຮ່ວມມືກັນນັັບມື້ນັບເພີ່ມຂຶ້ນ ພ້ອມທັງມີຜົນສຳເລັດຫຼາຍດ້ານ ເຊິ່ງເປັນການປະກອບສ່ວນທີ່ສຳຄັນ ໃນການເສີມຂະຫຍາຍສາຍພົວພັນມິດຕະພາບຂອງທັງສອງຝ່າຍ ຊ່ວຍເຮັດໃຫ້ບໍລິເວນຊາຍແດນລາວ-ໄທ ກໍ່ຄືແຂວງບໍລິຄຳໄຊ-ຈັງຫວັດໜອງຄາຍ ມີຄວາມສະຫງົບ ແລະ ເປັນລະບຽບຮອບຮ້ອຍດີ, ບັນດາປະກົດການຫຍໍ້ທໍ້ຕ່າງໆ ແມ່ນໄດ້ຮັບການແກ້ໄຂຢ່າງທັນການ ແລະ ສຳເລັດລຸລ່ວງໄປດ້ວຍດີ.

   ພ້ອມກັນນັ້ນ ກໍ່ໄດ້ຄົ້ນຄ້ວາພິຈາລະນາ ແລກປ່ຽນຄວາມຄິດເຫັນຮ່ວມກັນ ດ້ວຍບັນຍາກາດອັນດີ ບົນພື້ນຖານຄວາມຖືກຕ້ອງສອດຄ່ອງ ຕາມນະໂຍບາຍຂອງສອງລັດຖະບານ ລາວ-ໄທ ​ເພື່ອ​ສ້າງ​ໃຫ້​​ເສັ້ນຊາຍ​ແດນລາວ-ໄທ ເປັນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະ ມີຄວາມສາມັກຄີ ເພື່ອຕອບສະໜອງ ແລະ ຮັກສາໄວ້ເຊິ່ງຜົນປະໂຫຍດ ຂອງປະຊາຊົນທັງສອງຝ່າຍໃນຖານະບ້ານໃກ້ເຮືອນຄຽງທີ່ດີຮ່ວມກັນ.

ທັງສອງຝ່າຍເຫັນດີຕົກລົງເປັນເອກະພາບກັນບາງເນື້ອໃນດັ່ງນີ້: ການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ການອຳນວຍຄວາມສະດວກ ແລະ ຄວາມປອດໄພ ໃນການເຂົ້າ-ອອກເມືອງ, ການຮ່ວມມືໃນການປ້ອງກັນ ແລະ ສະກັດກັ້ນບັນຫາຢາເສບຕິດ, ການ​ຮ່ວມ​ມື​ໃນການ​ຄຸ້ມຄອງການດຳ​ເນີນ​ກິດຈະກຳ​ຕ່າງໆ​ຕາມ​ລຳນ້ຳຂອງ, ການສົ່ງເສີມວຽກງານດ້ານຕ່າງໆ ແລະ ການແລກປ່ຽນວັດທະນະທຳປະເພນີ, ການ​ສົ່ງເສີມການຮ່ວມມືດ້ານແຮງງານ, ການ​ຮ່ວມ​ມື​ທາງ​ດ້ານ​ການ​ຕ້ານ​ການ​ຄ້າ​ມະນຸດ ແລະ ການ​ປະສານ​ງານ​ຮ່ວມ​ກັນ.

    ຕອນທ້າຍຂອງພິທີ ກໍ່ໄດ້ມີພິທີລົງນາມບົດບັນທຶກຮ່ວມກັນ ຕາງໜ້າແຂວງບໍລິຄຳໄຊລົງນາມໂດຍ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ແລະ ຈັງຫວັດໜອງຄາຍ ລົງນາມໂດຍ ທ່ານ ຣົນນະໄຊ ຈິດວິເສດ ຜູ້ວ່າຣາຊະການຈັງຫວັດໜອງຄາຍ.

     ຫຼັງຈາກນັ້ນ ທັງສອງຝ່າຍຍັງໄດ້ໄປຢ້ຽມຢາມໂຮງງານອຸດສາຫະກຳ ເອັສອີເອັສ ( SES ) ຈຳກັດຜູ້ດຽວ ຜະລິດ ແລະ ຈຳໜ່າຍ ໝໍ້ແປງໄຟຟ້າຫຍີ່່ຫໍ້ SK, ແຜ່ນມຸງຫຼັງຄາອາລູຊິງ ແລະ ເຫຼັກຮູບປະພັນທຸກຊະນິດ.