ໃນວັນທີ 26 ພະຈິກ 2019 ຢູ່ຫ້ອງປະຊຸມຊັ້ນ III ຫ້ອງວ່າການປົກຄອງເມືອງວຽງທອງ, ແຂວງ ບໍລິຄໍາໄຊ ໄດ້ຈັດພິທີລະ​ນຶກວັນ​ສາ​ກົນເພື່ອ​ລຶບ​ລ້າງ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງຄົບຮອບ 19 ປີ ( 25 ພະຈິກ 2000 - 25 ພະຈິກ 2019) ໂດຍເປັນກຽດເຂົ້າຮ່ວມ ແລະ ປາຖະກະຖາຂອງ ທ່ານ ວົງສີ ທອງສີອິນທິປັນຍາ ເຈົ້າເມືອງວຽງທອງ, ມີບັນດາພະນັກງານ - ລັດຖະກອນ, ເອື້ອຍ - ນ້ອງແມ່ຍິງເຂົ້າຮ່ວມຮັບຟັງ.

       ທ່ານເຈົ້າເມືອງ ໄດ້​ໃຫ້ຮູ້ກ່ຽວກັບປະຫວັດຄວາມເປັນມາຂອງວັນ​ສາ​ກົນເພື່ອ​ລຶບ​ລ້າງ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງ ເປັນຕົ້ນແມ່ນບັນດານະໂຍບາຍ ແລະ ນິຕິກໍາຕ່າງໆຢູ່ໃນພາກພື້ນ ແລະ ສາກົນທີ່ມີຕໍ່ແມ່ຍິງ ແລະ ເດັກ ພ້ອມທັງກົນໄກສົ່ງເສີມຄວາມສະເໝີພາບລະຫວ່າງຍິງ-ຊາຍ. ຈຸດປະສົງການປາຖະກະຖາ ແມ່ນເພື່ອໃຫ້ພະນັກງານລັດຖະກອນ, ສະມາຊິກພັກ ສາມາດຮັບຮູ້ ແລະ ເຂົ້າໃຈວ່າເປັນຫຍັງຈຶ່ງບໍ່ໃຫ້ໃຊ້ຄວາມຮຸນແຮງຕໍ່ແມ່ຍິງ ແລະ ໃຫ້ຮູ້ກ່ຽວກັບສິດສະເໝີພາບລະຫວ່າງຍິງ - ຊາຍ, ສິດອັນຊອບທໍາຂອງແມ່ຍິງ ແລະ ເດັກຢູ່ໃນສັງຄົມເພື່ອເຮັດໃຫ້ປະກົດການຫຍໍ້ທໍ້ໃນການໃຊ້ຄວາມຮຸນແຮງຕໍ່ແມ່ຍິງໃນສັງຄົມນັບມື້ນັບຫລຸດລົງເທື່ອລະກ້າວ.

   ຕອນທ້າຍພິທີ ໄດ້ມອບໃບຢັ້ງຢືນແມ່ຍິງ 3 ດີ ຂອງແມ່ຍິງແຂວງໃຫ້ໜ່ວຍແມ່ຍິງ 3 ດີ ຄື: ໜ່ວຍແມ່ຍິງຫ້ອງການແມ່ຍິງ, ໜ່ວຍແມ່ຍິງກໍາມະບານ ແລະ ໜ່ວຍແມ່ຍິງໂຮງໝໍ ທີ່ມີຜົນງານດີເດັ່ນໃນການປະຕິບັດວຽກງານໄລຍະຜ່ານມາ.