ທ້າຍອາທິດທີ່ຜ່ານມານີ້, ທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄໍາໄຊ ພ້ອມດ້ວຍຄະນະ ໄດ້ລົງກວດກາໂຄງການຮັບເໝົາກໍ່ສ້າງຄ້າຍຄຸມຂັງ-ດັດສ້າງໜອງດົງ ເມືອງປາກກະດິງ ແຂວງບໍລິຄໍາໄຊ, ໂດຍມີທ່ານ ພັນເອກ ທອງໃບ ລໍວັນໄຊ ຫົວໜ້າກອງບັນຊາການ ປກສ ແຂວງ ພ້ອມດ້ວຍຄະນະ,  ມີເຈົ້າຂອງບໍລິສັດ ບຸນສະຫວັນ ກໍ່ສ້າງເຄຫາສະຖານ, ມີຫົວໜ້າຄ້າຍຄຸມຂັງດັດສ້າງ, ພະແນກການທີ່ກ່ຽວຂ້ອງອ້ອມຂ້າງແຂວງ, ພະນັກງານ ຄ້າຍຄຸມຂັງ-ດັດສ້າງ ເຂົ້າຮ່ວມ.

          ໂຄງການຮັບເໝົາກໍ່ສ້າງຄ້າຍຄຸມຂັງ-ດັດສ້າງ ໜອງດົງ  ເມືອງປາກກະດິງ ແຂວງບໍລິຄໍາໄຊ  ໄດ້ເຊັນສັນຍາອະນຸມັດໃຫ້ ບໍລິສັດ ບຸນສະຫວັນ ກໍ່ສ້າງເຄຫາສະຖານ  ເປັນຜູ້ຮັບເໝົາກໍ່ສ້າງ  ເຊີ່ງໄດ້ລົງມືກໍ່ສ້າງມາແຕ່ປີ 2014 ເປັນຕົ້ນມາ, ມູນຄ່າການກໍ່ສ້າງທັງໝົດ 12.624.558.000 ກີບ( ສິບສອງຕື້ກ່ວາກີບ,  ອາຄານດັ່ງກ່າວເປັນອາຄານ 02 ຊັ້ນ, 01 ຫຼັງ,  ຕັ້ງຢູ່ບ້ານ ແສນສໍາລານ ເມືອງ      ປາກກະດິງ ແຂວງບໍລິຄໍາໄຊ,  ມີຂະໜາດ 12 x 40 ແມັດ, ມີກໍາແພງອ້ອມຮອບອາຄານ, ມີປ້ອມຍາມສູງ 02 ຫຼັງ, ເຮືອນພົບຍາດ 01 ຫຼັງ, ອ່າງເກັບນໍ້າສູງ 01 ຈຸດ, ມີຮ່ອງລະບາຍນໍ້າອ້ອມອາຄານ, ມີລະບົບໄຟຟ້າ, ນໍ້າປະປາ ຄົບຊຸດ, ສ່ວນພາຍໃນອາຄານມີຫ້ອງຄຸມຂັງ 24 ຫ້ອງ, ແຕ່ລະຫ້ອງແມ່ນໄດ້ປູກະໂລ, ຕິດເພດານ, ດອກໄຟ, ມີຫ້ອງນໍ້າ, ມີຝາ ແລະ ປະຕູເຫຼັກທີ່ແໜ້ນໜ້າຖາວອນ, ຖືກຕ້ອງສອດຄ່ອງຕາມແຜນຜັງທີ່ໄດ້ລະບຸໃນສັນຍາ ແລະ ຜ່ານການຕິດຕາມກວດກາຕົວຈິງ ສາມາດສະຫຼຸບຕີລາຄາ ໂຄງການກໍ່ສ້າງຄ້າຍຄຸມຂັງ-ດັດສ້າງໜອງດົງ ປະຈຸບັນແມ່ນກໍ່ສ້າງໄດ້ສໍາເລັດແລ້ວ 85%. ໂຄງການກໍ່ສ້າງຄ້າຍຄຸມຂັງ-ດັດສ້າງໜອງດົງ ແມ່ນນອນຢູ່ໃນແຜນພັດທະນາພາຍໃນຂອງແຂວງບໍລິຄໍາໄຊ, ໂດຍໄດ້ຮັບງົບປະມານຈາກລັດຖະບານ.