ໃນວັນທີ 4 ພະຈິກ 2019 ທີ່ຜ່ານມານີ້ ຢູ່ຫ້ອງປະຊຸມ​ຫ້ອງວ່າ​ການ​ປົກ​ຄອງ​ເມືອງວຽງທອງ ແຂວງ ບໍລິຄໍາໄຊ ໄດ້ມີພິທີປະກາດຮັບຮອງເອົາ 4 ​ບ້ານຂອງເມືອງວຽງທອງ ມີບ້ານ ນ້ຳ​ຕ້ອງ, ນາ​ໂທ, ນາ​ຊວງ ແລະ ບ້ານອຸ​ດົມ​ໄຊ ເປັນບ້ານວັດທະນະທໍາໃໝ່ ໂດຍເປັນກຽດເຂົ້າຮ່ວມຂອງ ທ່ານ ວົງ​ສີ​ ທອງ​ສີ​ອີນ​ທິ​ປັນ​ຍາ ເຈົ້າ​ເມືອງວຽງ​ທອງ, ທ່ານ ສົມ​ສີ ວິ​ໄລ​ຜົນ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງບໍລິຄໍາໄຊ,  ມີອໍານາດການປົກຄອງບ້ານ, ຕະຫຼອດຮອດພໍ່ແມ່ປະຊາຊົນພາຍໃນ 4 ບ້ານເຂົ້າຮ່ວມ.

          ໃນພິທີ ທ່ານ ອ່ອນ​ຄຳ ຄຳ​ບຸນ​ມີ ເລ​ຂາ​ພັກ​ບ້ານ-ນາຍ​ບ້ານ-ບ້ານ ອຸ​ດົມ​ໄຊ ໄດ້ໃຫ້​ກຽດ​ຕາງ​ໜ້າ​ໃຫ້​ທັງ 4 ບ້ານຂຶ້ນຜ່ານບົດສະຫຼຸບ ແລະ ທິດທາງແຜນການໂດຍຫຍໍ້ກ່ຽວກັບການເຄື່ອນໄຫວວຽກງານສ້າງຄອບຄົວ ແລະ ບ້ານ ວັດດທະນະທໍາວ່າ: ທັງ 4 ບ້ານປະກອບມີ  752  ຫຼັງຄາເຮືອນ, ມີ  836 ຄອບຄົວ, ມີພົນລະເມືອງທັງໝົດ 4.623 ຄົນ, ຍິງ 2.274 ຄົນ, ອາຊີບຕົ້ນຕໍຂອງປະຊາຊົນແມ່ນເຮັດນາ, ປູກຝັງ, ລ້ຽງສັດ ແລະ ຄ້າຂາຍຈໍານວນໜຶ່ງ.

          ໃນໄລຍະປະກາດສ້າງເປັນບ້ານແບບຢ່າງດ້ານວັດທະນະທໍາຜ່ານມາທາງອໍານາດການປົກຄອງໄດ້ສົມທົບກັບທີມງານສ້າງບ້ານວັດທະນະທໍາ ແລະ ຄະນະກອງກໍ່ສ້າງຮາກຖານພັດທະນາຊົນນະບົດນໍາເອົາແນວທາງຂອງພັກ-ລັດ ແລະ ລະບຽບມາດຖານ, ເງື່ອນໄຂຂອງການສ້າງບ້ານວັດທະນະທໍາມາເຜີຍແຜ່-ເຊື່ອມຊືມໃຫ້ພໍ່ແມ່ປະຊາຊົນຮັບຮູ້ ແລະ ເຂົ້າໃຈພ້ອມທັງຈັດຕັ້ງປະຕິບັດ. ຕາມການກວດ-ສັງລວມຕົວຈິງຕາມມາດຖານ-ເງື່ອນໄຂແມ່ນເຫັນວ່າມາດຖານວັດທະນະທໍາຄົບຕາມ 6 ມາດຖານ ແມ່ນໄດ້ 90%, ມາດຖານຄອບຄົວວັດທະນະທໍາ ເທົ່າກັບ 96,5% ແລະ ມາດຖານບ້ານກໍ່ມີການພັດທະນາຢ່າງຮອບດ້ານເຮັດໃຫ້ບ້ານມີຄວາມສະຫງົບ, ປະຊາຊົນຮັ່ງມີຜາສຸກ, ມີຄວາມສາມັກຄີປອງດອງ ຈຶ່ງສາມາດປະກາດຮັບຮອງບ້ານດັ່ງກ່າວ ເປັນບ້ານວັດທະນະທໍາໃໝ່. ໃນພິທີຍັງໄດ້ມອບໃບຢັ້ງຢືນບ້ານວັດທະນະທໍາ ແລະ ໃບ​ຍ້ອງ​ຍໍ​ໃຫ້​ທັງ 4 ບ້ານ ພ້ອມ​ນັ້ນ ຍັງໄດ້ເປີດປ້າຍ ແລະ ລັ່ນຄ່ອງ 9 ບາດ ເພື່ອ​ເປັນ​ສັນ​ຍາ​ລັກ​ວ່າ 4 ບ້ານນີ້​ໄດ້​ປະ​ກາດ​ຮັບ​ຮອງ​ເປັນ​ບ້ານ ວັດ​ທະ​ນາ​ທຳ​ຢ່າງ​ເປັນ​ທາງ​ການ.