ຕອນບ່າຍວັນທີ 30 ຕຸລາ 2019 ຢູ່ທີ່ຫ້ອງປະຊຸມກຸ່ມເສດຖະກິດເມືອງປາກກະດິງ ແຂວງບໍລິຄຳໄຊ ໄດ້ມີພິທີີປະກາດ 15 ບ້ານ ເປັນບ້ານສາມັກຄີປອງດອງຂອງເມືອງປາກກະດິງ ເປັນກຽດເຂົ້າຮ່ວມໂດຍທ່ານ ບຸນເສັງປະທຳມະວົງ ຮອງເຈົ້າແຂວງບໍລິຄຳໄຊ, ທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ, ມີບັນດາພະນັກງານຈາກແນວລາວສ້າງຊາດແຂວງ, ເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

        ໃນພິທີ ໄດ້ຜ່ານຂໍ້ຕົກລົງຂອງເຈົ້າເມືອງປາກກະດິງສະບັບເລກທີ 328/ມປດ, ລົງວັນທີ 20 ສິງຫາ 2019 ວ່າດ້ວຍການຢັ້ງຢືນຮັບຮອງເອົາ 3.672 ຄອບຄົວໃນ 15 ບ້ານ ເປັນຄອບຄົວສາມັກຄີປອງດອງ ເທົ່າກັບ 84,27% ທຽບກັບຄອບຄົວທັງໝົດ 4.357 ຄອບຄົວ ແລະ ໄດ້ມອບໃບຢັ້ງຢືນຄອບຄົວສາມັກຄີປອງດອງໃຫ້ຕາງໜ້າ 15 ບ້ານເພື່ອໄປມອບຕໍ່ໃຫ້ເຂົາເຈົ້າເກັບຮັກສາໄວ້ເປັນຫຼັກຖານ ແລະ ໄດ້ຜ່ານຂໍ້ຕົກລົງຂອງເຈົ້າແຂວງບໍລິຄຳໄຊ ສະບັບເລກທີ 457/ຂບຊ, ລົງວັນທີ 20 ສິງຫາ 2019 ວ່າດ້ວຍການຮັບຮອງເອົາ ບ້ານທົ່ງນາມີ, ບ້ານນ້ຳຄູ້, ບ້ານໂພນສະຫວ່າງ, ບ້ານນ້ຳເດື່ອ, ບ້ານວຽງຄຳ, ບ້ານໂພນທອງ, ບ້ານນາລຽງ, ບ້ານນາພົງ, ບ້ານນາບວຍ, ບ້ານທົ່ງຮາບ, ບ້ານນາຫີນ, ບ້ານໜອງບົວ, ບ້ານນາອິນ, ບ້ານນ້ຳທອນ ແລະ ບ້ານນ້ຳສາງ ເປັນບ້ານສາມັກຄີປອງດອງຂອງເມືອງປາກກະດິງ.

         ໃນຕອນບ່າຍຂອງວັນດຽວກັນ ຢູ່ກອງບັນຊາການທະຫານເມືອງປາກກະດິງ ໄດ້ມີພິທີທຳລາຍອາວຸດເຖື່ອນ, ອາວຸດລ່າເນື້ອ, ຈັກສະຕີນ ແລະ ເຄື່ອງມືຫາປາທີ່ບໍ່ຖືກຕ້ອງຕາມລະບຽບກົດໝາຍຈຳນວນ 1.728 ອັນ ທີ່ຄະນະຮັບຮັບຜິດຊອບວຽກງານເກັບກູ້ອາວຸດເຖື່ອນຂັ້ນເມືອງສາມາດເກັບກູ້ໄດ້ໃນໄລຍະຜ່ານມາ ໂດຍການເອົາລົງຂຸມຈູດ ແລະ ຖົມຖີ້ມ.