ກອງປະຊຸມເຊື່ອມຊຶມມະຕິວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ ໄດ້ຈັດຂຶ້ນໃນວັນທີ 07 ພະຈິກ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ ໂດຍການເຜີຍແຜ່ເອກະສານຂອງທ່ານ ບຸນສົງ ເພັດຈະເລີນ ກຳມະການພັກແຂວງ ຫົວໜ້າຫ້ອງວ່າການປົກຄອງແຂວງບໍລິຄຳໄຊ ມີບັນດາພະນັກງານລັດຖະກອນ ພາຍໃນຫ້ອງວ່າການແຂວງເຂົ້າຮ່ວມ.

ເພື່ອເຮັດໃຫ້ແນວຄິດ ໄກສອນ ພົມວິຫານ ກາຍເປັນແນວຄິດ-ທິດສະດີ ພື້ນຖານຂອງພັກເປັນເຂັມທິດເຍືອງທາງ ໃຫ້ແກ່ການປະຕິວັດ, ເປັນແຫຼ່ງຂໍ້ມູນແຫ່ງການຮຽນຮູ້, ຄົ້ນຄວ້າ ແລະ ໝູນໃຊ້ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ໃນພິທີທ່ານປະທານໄດ້ຜ່ານມະຕິຂອງກົມການເມືອງສູນກາງພັກ ເລກທີ 058/ກມສພ, ລົງວັນທີ 13 ທັນວາ 2018 ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ ທີ່ມີເນື້ອໃນກ່ຽວກັບ ຄວາມຈຳເປັນພາວະວິໄສ, ທັດສະນະຊີ້ນຳອັນເປັນພື້ນຖານ ແລະ ຄາດໝາຍກ່ຽວກັບການຄົ້ນຄວ້າແນວຄິດດັ່ງກ່າວ ພ້ອມນັ້ນຍັງຍົກໃຫ້ເຫັນເຖິງ ວຽກງານຈຸດສຸມໃນແຕ່ລະໄລຍະຄື: ແຕ່ນີ້ຮອດປີ 2020 ແມ່ນໃຫ້ສຸມໃສ່ຄົ້ນຄວ້າແນວຄິດຂອງເພິ່ນຕໍ່ຂົງເຂດຕ່າງໆ ເປັນຕົ້ນແມ່ນແນວຄິດປ່ຽນແປງໃໝ່ຮອບດ້ານ ແລະ ມີຫຼັກການ, 2021-2025 ແມ່ນສຸມໃສ່ຄົ້ນຄວ້າແນວຄິດຂອງເພິ່ນ ນັບແຕ່ໄລຍະຕໍ່ສູ້ກູ້ຊາດ ຈົນຮອດໄລຍະການປ່ຽນແປງໃໝ່ ແລະ ໄລຍະແຕ່ປີ 2026-2030 ແມ່ນໃຫ້ສືບຕໍ່ຄົ້ນຄວ້າຢ່າງເປັນລະບົບຄົບຊຸດ, ດຳເນີນການຈັດພິມປຶ້ມແບບຮຽນແນວຄິດ ໄກສອນ ພົມວິຫານ ແລະ ສ້າງເປັນຫຼັກສູດການຮຽນ ຢູ່ລະບົບໂຮງຮຽນຂອງພັກ ແລະ ສະຖາບັນການສຶກສາ ໃນທົ່ວປະເທດ. ຫຼັງຈາກນັ້ນຍັງໄດ້ຮັບຟັງເຜີຍແຜ່ ມະຕິຂອງກົມການເມືອງສູນກາງພັກ ເລກທີ 076/ກມສພ, ລົງວັນທີ 19 ສິງຫາ 2019 ວ່າດ້ວຍການປັງປຸງການແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງ ຂອງລະບົບບໍລິຫານລັດໃນໄລຍະໃໝ່.