ໃນຕອນເຊົ້າຂອງວັນທີ 30 ຕຸລາ 2019 ຢູ່ສະໂມສອນປົກຄອງເມືອງປາກຊັນ ໄດ້ຈັດພິທີເຜີຍແຜ່ - ເຊື່ອມຊຶມມະຕິຂອງກົມການເມືອງສູນກາງພັກວ່າດ້ວຍ ການຄົ້ນຄວ້າແນວຄິດ ໄກສອນ ພົມວິຫານ ແລະ ຫວນຄືນມູນເຊື້ອວັນສຳຄັນຕ່າງໆຂອງຊາດ ເປັນກຽດຂຶ້ນເຜີຍແຜ່ໂດຍທ່ານ ໄມຈອມ ວັນນະສານຄຳ ເຈົ້າເມືອງປາກຊັນ, ມີພະນັງານງານທະຫານ-ຕຳຫຼວດ, ຄູອາຈານ ແລະ ພະນັກງານຫຼັກແຫຼ່ງຂອງເມືອງເຂົ້າຮ່ວມ.

        ໃນພິທີ ຜູ້ເຂົ້າຮ່ວມໄດ້ຟັງການເຜີຍແຜ່ ແລະ ເຊື່ອມຊຶມຂອງບັນດາເນື້ອໃນເອກະສານຕ່າງໆ ທີ່ສຳຄັນ ເຊິ່ງປະກອບມີ 4 ເນືອເອກະສານ ຄື : ມະຕິຂອງກົມການເມືອງສູນກາງພັກປະຊາຊົນປະຕິວັດລາວເລກທີ 058/ກມສພ, ລົງວັນທີ 13 ທັນວາ 2018 ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ, ມະຕິຂອງກົມການເມືອງສູນກາງພັກປະຊາຊົນປະຕິວັດລາວ ເລກທີ 076/ກມສພ, ລົງວັນທີ 19 ສີງຫາ 2019 ວ່າດ້ວຍການປັບປຸງການແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະໃໝ່, ເອກກະສານລະນຶກວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຫຍາກຂອງ ສ ປປ ລາວ 17 ຕຸລາ 1987, 17 ຫາ 24 ຕຸລາ 2003, ວັນປະກາດເອກະລາດ 12 ຕຸລາ 1945, ວັນສ້າງຕັ້ງການທູດລາວ -ຈີນ ແລະ ວັນຊາດ ສປປ ຈີນ 1 ຕຸລາ 1949 ທັງນີ້ ກໍ່ເພື່ອເຮັດໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈເຖີງຄວາມໝາຍ, ຄວາມສຳຄັນ ເຊື່ອມຊຶມ, ຄົ້ນຄວ້າຮໍ່າຮຽນ, ເອົາແນວທາງຂອງພັກພ້ອມທັງສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະໃໝ່ ເວົ້າລວມ ເວົ້າສະເພາະ ກໍ່ຄື ພະນັກງານທຸກຂົງເຂດທຸກວຽກງານພາຍໃນເມືອງຕ້ອງເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານຂອງຕົນ ປະກອບສ່ວນເຂົ້າໃນພາລະກິດສ້າງສາ ແລະ ພັດທະນາປະເທດຊາດໃຫ້ມີຄວາມຈະເລີນສີວິໄລຂຶ້ນເທື່ອລະກ້າວ.